Powari Standard Project
होसे 10
इसराइल एक लहलहातो हुयो अंगूर को बेला को जसो से, जोन मा लगत सा फर भी लगहेत, पर जसो- जसो ओको फर बढयो, तसो-तसो वोना जादा वेदी बनायो, जसो-जसो ओकी जमीन सुधरी, वसोच वय खोपसूरत पवीतर गोटा बनावतो गईन। उनको मन भटकयो हुयो से, अबा वय दोसी ठयरेत। अना उनको वेदी गिनला तोड़ डाकेह, अना उनको पवीतर गोटा को मूरती ला टुकड़ा- टुकड़ा कर डाकेत।
अबा वय कहेत, “हमरो कोनी राजा नहात, काहेका आमी ना परमेस्वर को भेव नही मानयो, एकोलाय राजा आमरो काजक कर सकासे?” वय गोस्टी बनावतो अना झुठी किरिया खाय के करार बांधासेत। यो काजी खेत को पार मा धतूरा को जसो नियाव फूलेत-फरेत।
सामरिया सहर को निवासी बेतावेन को बईल को लाय डरात रहेत, अना ओको लोग गीन वोको लाय सोक करहेत। अना वोको पुजारी जोन वोको कारन मगन होत होतीन वोको परताप को लाय यो कारन लक रोहेत। काहे की उ उनमा लक हेड़ दियो गयो से। उ मुरत ला यारेब राजा को बली ठयरान को लाय अस्सुर को देस मा धाडयो जाहेत। एपरेम लजा जाहेत, अना इसराइल आपरो जुक्ति लक लजाहेत। सामरिया आपरो राजा समेत पानी को बुलबुला को वरता तिनका को जसो मिट जाहेती। आवेन1 को वरता जघा जोन इसरायल को पाप सेत, वय नास होहेत। उनको वेदी गिन पर बोर को झाड़, अना जड़ी जंकड उगहेत, अना वोना बेरा लोक गीन पहाड़ी ला कहेत, आमी ला लुका लेव अना परबत लक का आमरो पर पड़ जाव2।
परमेस्वर लक इसरायल पर सजा को घोसना
अगो इसरायल, तु गिबा को दिवस लक पाप करतो आयोसे। वय वोच मा बनो रहेत, का वय गिबा मा खोटो मानूस गीन को संग कज्या मा नही फसेत? जबा मोरी मरजी होहेत तबा मी उनला दन्ड देहुँ, अना देस-देस को लोक उनको बिरोध मा जमा भयी जाहेत। काहेका वय आपरो दूई बेझा बुराई मा फसयो सेत।
एपरेम सीकी हुई बछिया आय, जोन अनाज को दाँवन लक पिरेम करासे, पर मी ना ओकी खोपसूरत गरदन मा जुवान्डी रख्यो से, मि एपरेम मा बसके चघाऊ, यहूदा नांगर, अना याकूब बख्खर चलाहे। अपरो लाई नियाव को बीज बोवो तबा दया को अनुसार खेत कापन पावने, आपरो पड़त जमीन ला जोतो, चोवो अबा परमेस्वर को मंघा भई जान को बेरा सेत, का उ आये अना तुमरो पर सूटकारा बरसाय।3 तुमी ना दुस्टता को लाय नांगर जूपयो अना अननियाव को खेत कापयो से, अना तुमी ना धोखा को फर खायोसे। यो एकोलाय भयो,
काहेकि तुमी ना आपरो रस्ता पर अना लगत सा बीर गीन पर भरोसा राख्यो होतो। यो कारन तुमरो लोकगीन मा हुल्लड़ उठेत, अना तुमरो सप्पा किला असो नास कियो जाहेत जसो बेतरबेल नगर लड़ाई को बेरा सलमन को लक नास करयो गयो। ओनो बेरा मायगीन आपरो लेकरा गीन समेत पटक दियो गयो। तुमरी लगत बुराई को कारन ओ बेतेल नगर लक भी असोच परकार को बरताव कियो जाहेत। पहट को बेरा इसरायल को राजा पूरो रीत लक मिट जाहेती।
Source notes (3)
- Footnote आवेन दुस्मन को घर अखिन “मुरत पूजा को घर”
- Cross-reference लूका 23:30; परकासित वाक्य 6:16
- Cross-reference यिर्मयाह 4:3
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.