होसे 11

अपरो बिदरोही इसरायल को लाय परमेस्वर को माया

1जब इसराइल टूरा होतो, तबा मी ना ओको लक पिरेम करयो, अना आपरो टूरा ला मिसर लक हाकलयो।1

2पर जितरो मीना उनला बुलायो होतो,

ओतरो च वय पारय जावत होतीन,

वय बाल देव को लाय बली करासेत,

अना खुदरो हुयो मुरत गीन को लाई धूप जरातो गईन।

3मी च एपरेम ला पाय-पाय रेंगात होतो,

अना उनला कन्हिया मा लेयके फिरत होतो।

पर वय नही जानत होतीन का उनला साजरो करन वालो मी सेऊ।

4मि उनला मानूस जानके माया को दोरी लक झीकत होतो,

अना जसो कोनी बईल को गरो को जोता हेड़ के वोको पूढा चारा राख देव,

वसोच मी ना उन लक करयो।

5उ मिसर देस मा लवटन नही पाहेत, अस्सुर च वोको राजा होहेत। काहेका वोना मोरो कन मुरकन लक मना कर दियो से। 6तरवार उनको नगर मा चलहेत, अना उनको बेंड़ों ला पूरो नास करेती, अना यो उनको जुक्ती गिन को अन्त को कारन होहे। 7मोरो पिरजा मोरो कन लक मुरक जावन मा लगयो रव्हासे, मंग वय उनला परमेस्वर को कन बुलावासेत, तबा भी उन मा लक कोनी भी मोरी महिमा नही करासे।

8ओ एपरेम, मी तोला कसो छोड़ देऊ? अगो इसरायल,

मि कसो तोला बयरी को बस मा कर देऊ?

मि कसो तोला अदमा को जसो छोड़ देऊ,

अना सबोयीम को जसो कर देऊ?

मोरो मन ला ता उलट–पुलट भय गयो,

मोरो मन को माया मारे पिघल गयो सेत।2

9मि आपरो गुस्सा ला भड़कन नही देहुँ,

अना मि मंग एपरेम ला नास करू;

काहेकि मि मानूस नही परमेस्वर सेऊ,

मी तोरो बीच मा रव्हनवालो पवीतर सेऊ,

मी गुस्सा करके नही आहूँ।

10वय परमेस्वर को मंघा- मंघा चलहेत, उ सेर को जसो गरजेत, अना तोरो टूरा दिन बुड़ती कन लक काँपत आहेत, 11वय मिसर लक पक्सी को जसो अना अस्सुर को देस लक परेवा को जसो काँपत आहेत। अना मी उनको घर मा निवास देहू, यहोवा को यो सबद आय।

इसराइल अना यहूदा को निन्दा

12एपरेम ना झूठ लक, अना इसरायल को घरानो ना छल लक मोला घेर रख्यो से, अना यहूदा अबा तकन पवीतर अना बिस्वास को काबील परमेस्वर को कन सही रव्हसे।