होसे 12

1एपरेम वारा ला अपरो जेवन बनाव से अखिन सारो दिवस दिन उगती वारा को मघा जावतो रव्हसे। उ सदा झुठ अना उत्पात ला बढावतो रव्हासे; वोय अस्सुर को संग करार बांधसेत अना मिसर देस मा तेल धाडासेत।

2यहूदा को संग परमेस्वर को मुक़द्दमा से, अखीन उ याकूब ला, उनको चालचलन को अनुसार वोला सजा देहेत। ओको काम गीनको अनुसार वोला बदला देहेत। 3आपरो माय को पोट मा च ओना आपरो भाऊ एसाव ला धोका दियो, अना मोठो होयके उ परमेस्वर को संग लड़यो।1 4उ दूत लक लड़यो, अना जीत भी गयो, उ रोवन लग्यो, अना वोना ओको लक गिड़गिड़ा के बिनती करयो। बेतेल नगर मा उ वोला भेटयो, अना उतच परमेस्वर ना आमी लक गोस्टी करयो।2 5यहोवा, सेना गीनको परमेस्वर, को हेत यहोवा को नाव लक होवासे। 6एकोलाय तु अपरो परमेस्वर को कन मुरक, दया अना नियाव को काम करतो रव्ह, अना अपरो परमेस्वर को रस्ता चोवतो रव्ह।

निवाव को मोहरा को सबद

7उ धन्धा करनवारो आय, अना ओको हात मा कपट को तवल से, अन्धेर करनो च वोला पियारो सेत 8एपरेम कव्हसे, “मि धनी भय गयो, मी ना मोला धन भेटयो से, मोरो कोनी काम मा असो खोट नही पायो गयो, जोन लक पाप लगहेत।” 9मी यहोवा, मिसर देस लक आनयो हुयो लक, तोरो परमेस्वर सेऊ, मी तोला तम्बू मा असो बसाहुँ जसो पक्को बेरा को तिहार को दिवस गिनमा होतो रह्यो सेत।3

10मी ना भविस्यवक्ता गीनको कन लक गोस्टी करयो, अना बार-बार दरसन देवत रहयो, अना भविस्यवक्ता को कन लक बोध कथा साँगत आयीसेऊ। 11का गिलाद लोखहुन कुकरमी नहात? वय पूरो छली भय गयो सेत। गिलगाल जघा मा बईल चघायो जावासेत, पर उनको वेदी गीन उन ढग गीन को जसो से, जोन खेत को घार को ढेर जवर होवासेत।

12याकूब अराम को बर्रा मा पराय गयो होतो, उता इसराइल ना एक बायको को लाय सेवा करयो, अना बायको को लाई उ चरवाही करत होतो।4 13एक भविस्यवक्ता को लक परमेस्वर इसराइल ला मिसर देस लक हेड़के लायो, अखिन मोसे भविस्यवक्ता च लक वोको रक्सा भयी। 5 14एपरेम ना लगत गुस्सा दिलायो से, एकोलाय वोको कियो गयो खून वोको च मा बनयो रहेत, अना वोना आपरो परमेस्वर को नाव मा जोन बट्टा लगायो से, उ वोच ला लवटायो जाहेत।