Powari Standard Project
होसे 7
जबा मी इसरायल ला साजरो करासू, तबा एपरेम को अधरम अना सोमरोन को लगत बुराई परगट होय जासेत, वय छल लक काम करासेत, चोर घर भीतर धसासेत, अना डाकूगीन को दल बाहेर हिसक लेवासेत तबा भी वोय नही सोचत का यहोवा परमेस्वर आमरो सप्पा बूराई ला हेत राखासे। एकोलाय अबा वय आपरो काम को जाल मा फँसेत, काहेका उनको बुरो काम मोरो निघा मा बनयो सेत।
राजमहल मा साजिस
वय राजा ला बुराई करन लक, अना अधिकारी ला खोटो बोलन लक खुसी होवासेत। वय सब खोटो काम करनवालो सेत, वय वोना तन्दूर को जसो सेत जोनला पकानवालो तातो करासे, पर जबा तकन कनीक गुन्डयो नही जावासेत अना खमीर लक फूल नही जावासेत, तबा तकन उ स्तो ला नही उसकावासेत। आमरो राजा को जलम दिवस मा अधिकारी अंगूर को रस पिवके चूर भयीन, ओना मजाक करनवारा लक आपरो हात मिलायो। जबा तकन वय घात लगाय रव्हसेत। तबा तकन वय आपरो मन तन्दूर को जसो तैय्यार करयो सेत। उ सक्कारी तन्दूर को समान गुस्सा मा आग बबूला भय जाहेत।
वय सबरी को सबरी तन्दूर को जसो धधकतो, अना आपरो सासक करनवालो ला भसम करासेत। उनको सबरी राजा मारयो गयो सेत। अना उन मा लक कोनी मोरी दोहाई नही देवासे।
इसराइल अना बेगरो रास्ट
एपरेम देस-देस को लोकगीन लक मिला-जुला रव्हसे। एपरेम असी भाकरी जसो से जोन पलटायो नही गयो सेत। परदेसी गिनना ओको ताकत तोड़ डाकयो। पर वय एला नही जानासे, ओको डोस्का मा कही-कही पिक्को चुन्दी सेत, पर एला नही मालूम सेत। इसराइल को घमंड वोच को बिरोध मा गवाही देवा सेत। यो सब गोस्टी को रहतो हुयो भी वय अपरो यहोवा परमेस्वर को कन नही मुरकयो अना ना वोला तपासो से। एपरेम एक भोलो परेवा जसो भयी गयो, जोनमा काही अक्कल नाहती, वय मिसरी की दोहाई देवासे, अना अस्सुर ला चलयो जावासेत। जबा वय जाय, तबा वोको वरता मी आपरो जाल बगराहुँ, मि उनला असो झींक लेहुँ, जसो बादल को पक्सी झीकयो जासेत, मी उनला असो दन्ड देहुँ, जसो की मण्डली आयक गयो सेत।
उन पर हाय, काहे की वय मोरो जवर लक भटक गईन। उनको नास होय, काहेका उनना मोरो लक बिदरोह करयो से! मी ता उनला बचावत रहयो, पर वय मोरो लक खोटो सांगतो आयो सेत। वय मन लक मोरी दोहाई नही देवासे, पर आपरो हतरन पर पड़यो हुयो हाय-हाय करासेत। वय अनाज अना नवतो अंगूरी रस पावन लाई गरदी लगाय के मोरो लक बिदरोह करासेत। अना मी न उनको भुज्जा हुनला ताकतवर करतो आयो तबा भी वोय मोरो बिरोध मा खोटो कलपना करासेत। वय मुरकासेत तो सही पर परमेस्वर को कन नही, वय धोखा देवनवारा धनुस को जसो सेत, एकोलाय उनको अधिकारी आपरो गुस्सा भरयो गोस्टी को कारन तलवार लक मारो जाहेत। मिसर देस मा उनको मजाक उड़ान को योच कारन होहेत।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.