होसे 6

पछतावा करन को दिखावा

1“चलो आमी परमेस्वर को कन मुरकबीन, काहेका वोच ना फाड़ी से, अना वोच साजरो भी करेत, वोच ना मारयो, अना वोच आमरो फोडा मा पट्टी बाँधेत 2दुई दिवस को मंघा उ आमी ला जित्तो करयेत, अना तीसरो दिवस उ अमीला उचल के उभो करहेत, तबा अमी वोको पूढा जित्तो रहेत। 3आवो, अमी गियान ला ढून्डबोन अखीन परमेस्वर को गियान भेटन को लाय कोसीस भी करो, काहेका परमेस्वर को परगट होवनो सक्कार को जसो पक्को से, वा बारीस को जसो आमरो पर आहेत, अना बरसात को आखीर को बारीस को जसो जोन लक जमीन सिंचासेत।”

4परमेस्वर कव्हसे “ओ एपरेम, मी काजक करु?” ओ यहूदा, मी काजक करु? तुमरो पिरेम ता सक्कार को पानी को बद्दल को जसो, अना सक्कारी को उड़ जानवाली ओस को जसो से। 5यो कारन मी ना भविस्यवक्ता गिन को कन लक मानो उनको पर टंगीया चलायके उनला काप दियो, अना आपरो टोंड लक बचन लक उनला मार दियो, अना मोरो न्याय उजियार को जसो चमकासेत। 6काहेका मि बलिदान लक नही , पर पक्को माया लक खुस होवासेऊ, अना होमबली लक लगत यो चाव्हासू का लोक परमेस्वर को गियान राखेत।1

7पर उन लोकगीन ना आदम को जसो करार ला तोड़ दियो, उनना उता मोरो लक दगाबाजी करयो सेत। 8गिलाद नाव को सहर ता अनरथ करनवालो लक भरयो से, उ खून लक भरयो हुयो से। 9जसो डाकूगीन को दल कोनी को घात मा बसासेत। वसोच याजक को दल सकेम को रस्ता मा खून करासेत, अखीन उनना महापाप भी करयो सेत। 10यिसरायील को घरानागीन मा मी ना रूवा उभो होवन को कारन चोयो से, ओमा एपरेम ला छिनाला अना इसरायल को असुद्धता पायो जासे।

11ओ यहूदा, जब मी आपरो लोकहुन ला बँधुआई लक लवटाय के आनू , वोना बेरा को लाय तोरो लाय भी बदला ठयरायो हुयो सेत।