होसे 5

1ओ याजकहुन, यो गोस्टि आयको! ओ इसरायली को घरानागीन, धियान देयके आयको! ओ राजा को घराना, तुमी भी कान लगाव, काहेकि तुमरो न्याय कियो जाहेत, काहेका तुमी मिसपा मा फन्दा, अना ताबोर पर लगायो हुवो जाल बन गयो सेव। 2उन बिगड़ो हुया ना लगत खून कियो से एकोलाय, मी सबरी ला सजा देहुँ। 3मी एपरेम को भेद जाना सेऊ अना इसरायल को दसा मोरो लक लुको नाहत, ओ एपरेम, तू ना छिनाला करयो, अना इसरायल असुध्द भयो से।

मुरत पुजा को बिरोध मा भविस्यवक्ता होसे को चेतावनी

4उनको काम उनला आपरो परमेस्वर को कन मुरकन नही देवा सेत। काहेका छिनाला करनवारी आतमा उनमा रव्हसे। अना वय परमेस्वर ला नही जानासेत। 5इसराइल को घमंड वोच को बिरोध मा गवाही देवासे, अना इसरायल अखिन एपरेम आपरो पाप को कारन लक खोद्दा खाहेत, अना यहूदा भी उनको संग खोद्दा खायेत 6वय आपरो सेरी-मेन्ढी गिन अना सबा जनावर लेके परमेस्वर ला तपसन जाहेत, पर उ उनला नही भेटेत, काहेका उ उन लक दुहुर भय गयो से। 7वय छिनालापन लक जनयो लेकरा सेत, एकोलक उनना परमेस्वर को लक बिस्वास नही कियो सेत, एकोलाय अबा नवतो चंदा उनको अना उनको हिस्सा को नास को कारन होहत।

इसराइल अना यहूदा को बीच लड़ाई

8गिबा मा नरसिंगा, अना रामा मा तुर्रा फूँको। बेतावेन मा ललकार के कव्हो, ओ बिन्यामीन, आपरो मंघा चोव! 9न्याय को दिवस मा एपरेम बिरान भय जाहेत, जोन गोस्टी को होवनो पक्को से, मी ना वोच को खबर इसरायल को सबच गोत ला दियो से। 10यहूदा को अधिकारी उनको जसो भयो से, जोन आपरो हद बढ़ा लेवासेत, मी आपरो हिजड़नो, पानी को जसो उबडाहूँ 11एपरेम पर अन्धेर करयो गयो से, उ मुक़द्दमा हार गयो सेत। काहेका उ देवतागिन को रस्ता मा मन लगाय के उ हुकूम मा चलयो, 12एकोलाय मी एपरेम को लाय किड़ा-काटकुर को जसो, अना यहूदा को घराना को लाय सडाहट को जसो होऊ।

13जबा एपरेम ना आपरो बीमारी, अना यहूदा ना आपरो घाव चोयो, तबा एपरेम अस्सुर को जवर गयो, अना यारेब1 राजा ला खबर धाडीस। पर उ तुमला नातो साजरो कर सका सेत, नातो तुमरो घाव ला साजरो कर सकासेत। 14काहेका मी एपरेम को लाय सेर, अना यहूदा को घराना को लाय जुवान सेर बनहु। मी खुदच उनला फाड़के ले जाहुँ, जबा मि उचल ले जाहुँ,तबा मोरो पंजा लक कोनी नही छुड़ाय सकेत।

15जबा तकन वय आपरो आपला दोसी मानके मोरो दरसन को खोजी नही होहेत। तबा तकन मि आपरो जघाम नही लवटू, अना वय संकट मा पडहेत, तबा वय जीव लगायके मोला तपासन लगहेत।