होसे 4

परमेस्वर को इसरायल पर आरोप

1ओ इसराइल हुन, परमेस्वर को गोस्टी आयको, यो देस को निवासी गीनको संग परमेस्वर को मुक़द्दमा सेत। यो देस मा काही नातो सही से, ना काही करूना अना ना काही परमेस्वर को गियान से। 2यहान सिराप देवन, खोटो बोलन। खून करनो, चुरानो, अना खोटो काम करन ला सोड़ काही नही होवासे। वय मोसे को नियम को हद को पार कर के खोटो करम करासेत, अना खून च खून होतो रव्हासेत। 3यो कारन लक यो देस रोवत रहेत, अना बर्रा को जीव–जन्तु, अना बादर को पक्सी गीन को संग वोको सब रव्हन वाला, कुम्हला जाहेत, अना सागर को मसरी नास भई जाहेत।

परमेस्वर को याजकहुन पर आरोप

4चोवो, कोनी बहेस नोको करो, ना कोनी डांटेत, काहेका तोरो लोख त याजक लक बहेस करन वारा को जसो से। 5तू दिवस को दुफार मा खोद्दा खायेत, अना रात ला भविस्यवक्ता भी तोरो सँग खोद्दा खायेत, अना मी तोरो माय इसरायल ला नास करहुँ। 6मोरो गियान को नही होवन लक मोरो परजा नास भयी गयी, तू ना मोरो गियान ला बेकार जानयो एकोलाय मी तोला आपरो याजक रव्हन को ना काबील ठैराहुँ। एकोलाय का तू ना अपरो परमेस्वर को मोसे को नियम ला तज दियो से, मी तोरो लेकरा गिनला सोड़ देहू।

7जसो वय बड़त गयीन, वसोच वय मोरो बिरोध मा पाप करतो गयो। मी उनको मान को बदला मा उनको बेइज्जती करहुँ। 8तुमी मोरो लोखहुन को पाप लक धनी बना सेत ,अखिन येकोलय तुमी चाहव सेव की वोय अखिन लगत पाप करेत। 9एकोलाय जोन परजा को दसा होहेत, वसोच याजक को भी होहेत, मी उनको चालचलन को सजा देहुँ, अना उनको काम को अनुसार उनला बदला देहू। 10तुमी बली का आपरो भाग खावजोस , पर उनको पोट नही भरेत,अना वय बेगरो देवतागिन को पूजा तो करेत पर बढेत नही। काहेका उनना परमेस्वर को कन मन लगावनो सोड़ दियो से।

परमेस्वर लक मुरत पुजा को निंदा करनो

11परमेस्वर कव्हसे बेसिया को संग सोवनो,अंगूर को रस अना ताजो अंगूर को रस, यो तीनी अक्कल ला भिरस्ट करासेत। 12मोरो परजा को लोक लकड़ी को पुतरा लक सवाल-जवाब करासेत, अना उनको छड़ी उनला आवनवारो गोस्टि सांगासेत। काहेका छिनाला करान वारी आतमा न उनला बहकायो से, अना वय आपरो परमेस्वर को संग सोड़के छिनाला करासेत। 13बांज, चिनार, अना लहान बांज झाड़ को सावली साजरी होसे, एकोलाय वय उनको खाल्या अना पहाड़ को उचाई मा यग करासेत, अना पहाड़ मा धूप जलावासेत।

यो कारन लक तुम्हि लोक गिनकी टूरीहुन छिनाल अना तुमरो बहुँगिन छिनाल भयी गयी। 14जबा तुमरो टूरी छिनाला अना तुमरो बहुहुन छिनालापन करहेती, तबा मी उनला दन्ड नही देहुँ, काहेकि मानूस खुदच बेसिया को संग एकलो मा जावासेत, अना देवदासि गिनको संगी होयके यग करासेत; अना जोन लोक नही समजासेत वय नास भयी जाहेत।

15अगो इसरायल, मंग तु छिनाला करासे, मंग भी यहूदा दोसी नही बनयो। गिलगाल ला नोको आव अना नही बेतावेन1 ला चघ जाव, अना परमेस्वर को जिंदगी को किरिया नोको खाव। 16काहेका इसराइल ना हठीली कलोर को जसो हठ करयो से, का परमेस्वर उनला मेंढी को बच्चा को जसो लम्बो- चवडो मा चराहेत? 17एपरेम मुरत गीन को संगी भयी गयो से, एकोलाय ओला रव्हन देव, 18वय जबा अंगूर को रस पी जावासेत तबा बेसीया को संग सोवनो मा लग जावासेत। उनको मुखिया गीन, बेइज्जत होवन लक लगत माया राखासे। 19आँधड़ उनला आपरो पंखा मा बाँधके उडायके ले जाहे, अना उनको बली को कारन लक उनकी बेज्जती होय जाहेत।