Powari Standard Project
पैदाइस 6
मानूस गीनको खोटो काम
जबा मानूस गीन को गिनती भुई पर बढ़न लगीन, अना उनको टूरी गीन भी पैदा होवन लगीन। तबा देव टुरा ना मानूस को टूरी गीन ला चोयीन का वय खोप सूरत सेति। उनना उनमा लक जेना टुरीगीन ला पसन्द करीन, उनला बायको बनाय लेईन। परमेस्वर ना कह्यो, “मोरो आतमा मानूस मा हरामेसा रव्हे नही, काहेकि मानूस केवल तन से। ओको जिंदगी को बेरा एक सौ बीस बरस को होव्हे।” उन देव टुरा गीनना मानूस को टूरी संग मा सोयीन । उनलक जो टुरा पैदा भईन, वय पुरानो बेरा का ताकतवर अना दानव घाई होतीन। परमेस्वर ना देखयो का धरती पर मानूस को दुराचार बढ़ गयो से, अना ओको मन को सबच बिचार हमेसा बुराई को लाई होसेत। यो गोस्टी लक परमेस्वर ला दुख भयो का ओना धरती पर मानूस ला बनायीसेस। ओको दिल लगत दुखी हुयो। परमेस्वर ना कहिसेस, “मी मानूस ला धरती पर लक मिटाय देहू, जेला मीना बनायी होतो। मि मानूस गीन ला, जनावर गीनला, रेंगनवारा कीट अना बादर को पक्सीगीन ला नास करुंह, काहेका मोला यो गोस्टी को दुख से का मीना उनला बनायी सेऊ।” पर नूह पर परमेस्वर को किरपा को नजर होती। यो नूह को परिवार को चरचा सेत, नूह भगत मानूस होतो। उ आपरो बेरा को लोकहून मा सबलक लगत निरदोस होतो। उ परमेस्वर को संगा होतो। नूह लक तीन लेकरा पैदा भयीन;सेम, हाम, अना याफत।
पानी परलय को पानी जहाज को बनावनो
परमेस्वर को नजर मा धरती बुरी होय गयी होती। वा हिंसा लक भर गयी होती। परमेस्वर ना धरती ला चोयो का वा बुरी होय गयी, काहेकी सबच जिवगीन ना धरती मा आपरो सुभाव बुरो कर लेयी होतीन। परमेस्वर ना नूह लक कह्यो, “मीना सबच जिवगीन को खातमा करने को मन कर लैईसेउ। उनको कारन धरती हिंसा लक भर गयी से। मी धरती सकट उनला नास करहु। तू गोफेर झाड़ को लकड़ी को एक पानी को जहाज बनाव। तू ओमा खोली बनावजोस। ओको बाहेर भीतर राल भी पोत देजोस। यो रिती लक तू पानीजहाज बनावना; पानी जहाज को लम्बाई ड़ेढ सौ फुट, चौड़ाई पच्चीस फुट अना ऊँचाई पंद्रह फुट राखजोस। जलयान मा एक खिड़की बनावना जलयान मा एक कना दुवार राखना तु जलयान को तीन खंड गीन ला बनावना खाल्या को खंड बीच को खंड अना वरता खंड। मी बादर को खाल्या वय सबच पिरानी गीन ला जिनमा जीवन को सास से उनको नास करनो को लाई धरती पर पानी को पिरलय करुहू धरती का सब पिरानी मर जाहेत। पर मी तोरो संग अपरो विधान राखू तु अपरी बायको अपरो टुरा गीन अना बहु गीन सहित जलयान मा धसनो करना। हर एक जात को जिन्दो पिरानी गीन मा लक दुई-दुई मरद अना मादा अपरो संग जलयान मा लिजावन जेको लक वय तोरो संग जिन्दो रव्हे। हर एक किसम-किसम को पक्सी जनावर गीन भूई पर चलन वालो जन्तु गीन मा लक दुई-दुई तोरो जवर आहेत का तु उनला जिन्दो राखेत। हर एक जात ला जेवन जोन-जोन करेहे जमा कर लेवना उ तोरो अना उनको जेवन को लाई होहे।” नूह न असोच करीस वोना परमेस्वर को हुकूम को जसो सबच काही करीस।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.