Powari Standard Project
पैदाइस 7
पानी पूरा
तबा यहोवा परमेस्वर ना नूह लक कह्यो. तू आपरो पूरो घराना समेत जहाज मा जाय काहेका मीना यो बेरा को लोक हुन लक मी तोला च निवाड़ी सेऊ। अना तोला नेक मानूस को रूपमा पायी सेऊ। तू उन जनावर गीन को जोन सुध्द सेत सात-सात जोड़ा मजे मरद अखिन मादा लेवजोस, जोन लक उनको खानदान धरती मा बचयो रहेत। बादल को पक्सीगीन मा लक मरद अना मादा को सात जोड़ा लेवजोस, का उनको बस बचके सप्पा धरती मा बन्यो रहेत। काहेका सात दिवस को मघानी मी धरती मा पानी बरसाहू। अखिन चाड़ीस दिवस अखिन राती तकन पानी बरसात रहीन, अखिन जितरो जीव मीना बनायो सेऊ उन सबला धरती लक नास कर देहू। परमेस्वर को यो हुकुम को अनुसार नूह ना करीस। नूह को उमर छय सौ साल को होतो तबा पानी पूरा आयो होतो। नूह आपरो टूरा हुन बायको अखिन बहु गिनको संग पानी पूरा लक बचन काजी जहाज मा गयो। सुध्द अखिन असुध्द दुई परकार को जनावर मा लक पक्सी गिन, अखिन जमीन मा रेंगन वालो जीव लक, दूई-दूई मजे मरद अखिन मादा जहाज मा नूह को जवर आइन। जोनला परमेस्वर हुकुम दियो होतो। सात दिवस को मघानी पूरा को पानी धरती मा भरन लगयो। जब नूह को उमर को छय सौ साल को दूसरो महीना को सतरा दिन आयो, वोच दिन मोठो गहेरो को सप्पा जघा फूट गयीन अना बादल फट गयो। अखिन धरती पर चालीस दिवस अखिन चालीस रात लगातर बरसात होवत रही। वोनच दिवस नूह, आपरो टुरा सेम, हाम अखिन याफत, नूह की बायको, अखिन वोकी तीनो बहुगिन ला साथ मा लेयके जहाज मा चली गयो। अना वोको साथ मा सबच किसम-किसम का जंगली जनावर अखिन पालतु जनावर, रेंगनवारा जन्तु, चलन वारा जनावर अना सबच तरीको का उड़न वाला पक्सी गिन ला लेयके जहाज मा चली गयो। येनो पिरकार लक वय सबच, जोन मा साँस होती, नूह को जहाज मा चघ गईन। नूह ना परमेस्वर की मरजी को अनुसार, जहाज मा सबच जनावर का मरद अना मादा ला आनीस, अखिन सब ला भीतर आनन को बाद मा पिरभु ना किवाड़ ला बंद कर देइस। धरती मा चालीस दिवस अखिन चालीस राती तक पानी पड़त रहयो पानी वरता होतो गयो अना जहाज भी वरता उठत गयो। पानी लक सप्पा धरती डूब गई, अखिन जहाज पानी को वरता तिरन लगियो। पानी धरती पर इतरो बढ़ गयो कि मोठा-मोठा पहाड़ गिन डूब गईन। पानी पहाड़ को लगभग 20 फुट वरता होए गयो। धरती पर सबच काही नास होय गयो; हर कोनी जीवतो पिरानी जोन धरती पर चलत होतिन-पक्सी, जनावर, जंगली जनावर, वय सबच पिरानी जोन धरती मा बेजा होतिन अखिन सबच मानूस जाति भी मर गईन। धरती मा का सबच जिवतो पिरानी गिन मर गईन। येनो पिरकार लक परमेस्वर ना धरती का सबच मानूस, जनावर, चलनवाला जनावर, रेंगनवारा जन्तु, बादर मा उड़न वाला पक्सी, सबच को नास कर देयिस। अना नूह अखिन वोको परिवार अखिन जोन पिरानी जहाज मा होतिन वय बचाया रहिन। 150 दिवस तकन धरती पानी मा बुड़ो रहयो।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.