आमोस 8

फर लक भरयो टोपली को दरसन

1परमेस्वर यहोवा परमेस्वर ना मोला यो दिसायो। का दुफारी को फर1 लक भरयो हुयो एक टोपली सेत। 2वोना कव्हयो, “हे आमोस तोला काजक दिसासेत?” मी ना कह्यो, “दुफारी को फर लक भरयो एक टोपली।” तबा परमेस्वर ना मोरो लक कह्यो, “मोरो परजा इसरायल को आखीर आय पड़यो सेत। अबा मी वोला अना नहीं छोडू।” 3परमेस्वर को यो सबद से, “वोना दिवस राजमन्दिर को गाना हाहाकार मा बदल जाहेत, अना मुरदा को मोठो ढेर होहेत, अना सब जघा मा वय चूपचाप रहके फेक दियो जाहेत।”

इसराइल को नास

4यो गोस्टी ला आयको, तुमी जोन गरीबगोर गिन ला गिटकनो अना देस को नरम लोक गीन ला नास करनो चाव्ह सेव। 5जोन कव्हसेव “नवतो चंदा कबा बीतेत का आमी अनाज बिक सकेत? बिसराम को दिवस कबा बीतेत। का हमी अनाज को ढोला उघाड़के एपा ला लहान अना सेकेल ला भारी कर दे, अना कपट लक दांडी मारेत।2 6का आमी गरिब ला सिक्का देके, अना गरीबगोर ला एक जोड़ी पनही देयके मोल लेहेत, अना बेकार अनाज बिकेत?” 7यहोवा, जोन पर याकूब ला गरब करनो साजरो से, उ आपरो किरिया खाय के कव्हसे, “मी तुमरो कोनी काम ला कबच नही बिसरू। 8का यो कारन लक भुई नही कपकपाहे? का उन पर रव्हन वारा सबच दुख नोको करहेत, यो देस को सप्पा मिसर देस को नील नद्दी को जसो होयेत, जोन बड़ासे, मंग लहरगीन उछलासे, अना कम होय जासे।”3 9परमेस्वर यहोवा को यो सबद आय, वोना बेरा मी दिन ला दुफारी को बेरा बुड़नो करू, अना यो देस ला दिवस दुपहरी इंधार कर देहू।4 10“मी तुमरो तिहार को खुसी ला दुहुर करके दुख कर देहुँ, अना तुमरो सप्पा गानागिन ला दुहुर करके सोक को गाना गवाहूँ, मि तुमी सब को कमर मा बोरा बंधवाहूँ, अना तुमी सब को डोस्का ला मुंडावाहूँ, अना असो दुखी करहुँ जसो एकठो टूरा को लाय होवासे, अना वोको आखीर कठीन दुख को दिवस को जसो होयेत।” 11परमेस्वर यहोवा को यो सबद आय, “चोवो, असो दिवस आवासेत जबा मी यो देस मा महँगी करू, वा मा नही ता अनाज को भूक अना पानी को तहान होयेत, पर परमेस्वर को बचन ही को आयकन को भूक तहान होयेत”। 12लोक परमेस्वर को बचन को खोज मा सागर लक समुंदर तकन अना उत्तर लक दिन उगती तकन मारा-मारा फिरेत, पर वोला नही पाहेत। 13“वोना बेरा खोपसुरत कुवारीगिन अना जुवान मानूस दुई तहान लक बेहोस होय जाहेत। 14जोन लोक सामरिया राज को पाप मूल देवता को कसम खावसेत, अना जोन कव्हासेत, दान को देव को जिंदगी को कसम, बेरसेबा देवता को कसम, वय सबच पड़ जाहेत, अना मंग नही उभा होहेत।”