आमोस 7

फाफा को दिसनो

1यहोवा परमेस्वर ना मोला असो दिसायो, अना मी चोवासू का वोना ना पिछलो गवथ को उगन को बेरा मा फाफा पैदा करयो, अना उ राजा को कटनी को मघा को मंगा गवथ होती। 2जबा वय फाफा गवथ खाय लियो होतो, तबा मी ना कह्यो, “ओ परमेस्वर यहोवा, छमा कर। नही ता याकूब कसो लक पिक्को रव्ह सकासे? उ कितरो कमजोर से।” 3एको बारे मा परमेस्वर ना आपरो मन बदलयो, अना ओना कह्यो, “असो गोस्टी अबा नही होयेत।”

स्तो को दिसनो

4यहोवा परमेस्वर ना मोला असो दरसन दिसायो, अना काजक चोवासू का यहोवा परमेस्वर ना स्तो को कन लक मुकद्दमा लड़ाई करन ला हाकलीस, अना उ स्तो लक महासागर सूक गयो, अना देस भसम होवन लगयो होतो। 5तबा मी ना कह्यो, “ओ परमेस्वर यहोवा, रुक जा! नही ता याकूब कसो लक पिक्को रव्ह सकासे? उ कसो कमजोर से।” 6एको बारे मा भी यहोवा,आपरो मन बदलयो, अना परमेस्वर ना कह्यो, “असो गोस्टी मंग नही होयेत।”

साहुल को दरसन

7ओना मोला यो भी चोवायो, मी ना चोयो का पिरभू साहुल लगायके बनायो गयो कोनी भीत मा उभो से, अना ओको हात मा साहुल से। 8यहोवा परमेस्वर ना मोरो लक कह्यो, “हे आमोस तोला काजक दिसासेत?” मी ना कह्यो, “एक साहुल।” तबा परमेस्वर ना कह्यो, “चोव, मी आपरो पिरजा इसरायल को बीच मा साहुल लगाय के बिन डन्ड को नही सोड़ू। 9इसहाक को उच्चो जाघा बिरान, अना इसरायल को पवीतर वेदी को जाघा सुनसान होय जाहेत, अना मी यारोबाम को खानदान मा तलवार झिकयो हुयो चघाई करहु।”

आमोस अना अमस्याह को दरसन

10तबा बेतेल नगर को याजक अमस्याह इसराइल को राजा यारोबाम को जवर साँगके धाड़िस, “आमोस ना यिसरायील को घरानागीन को बीच मा तोरो लक राजबिदिरोह को योजना कियो से, वोको सप्पा गोस्टी ला देस नही सह सकासे। 11काहेका आमोस असो कव्हसे, यारोबाम तलवार लक मारो जाहेत, अना इसराइल आपरो जमीन मा लक पक्को गुलामी मा जाहेत।” 12तबा अमस्याह ना आमोस लक कह्यो, “ओ चोवनवाला, यहान लक हिटके यहूदा देस मा पराय जाय, अना उतच भाकर कमाय अना जेवन कर, अना उतच भबिस्यबानी करयो कर। 13पर बेतेल नगर मा कबच भबिस्यबानी नोको करने, काहेकि यो राजा को पवीतर जाघा अना राज-नगर 1से।” 14आमोस ना अमस्याह लक कह्यो, “मी ना ता भबिस्य बतान वालो होतो, अना नही भबिस्य बतान वालो को टूरा, मि ता गायकी अना उम्मर को झाड़ को छाँटनवालो होतो।2 15अना यहोवा परमेस्वर ना मोला सेरी मेंढी को मंघा-मंघा हिन्डन लक कहीस, ‘जाय, मोरो परजा इसराइल लक भबिस्यबानी कर।’ 16एकोलाय अबा तू परमेस्वर को गोस्टी आयक, तु कव्हसेस, ‘इसरायल को बिरोध मा आवन वारो गोस्टी नोको कर, अना इसहाक को घराना को बिरोध मा, बार-बार गोस्टी नोको आयकयो।’ 17यो कारन लक यहोवा यो कव्हसे, तोरी बायको नगर मा बेसिया होय जाहेत, अना तोरो लेकरागिन तलवार लक मारा जाहेत, अना तोरो जमीन दोरी डाकके बाट लियो जाहेत, अना तू खुदच असुध्द देस मा मार दियो जाहेत, अना इसराइल आपरो जमीन मा लक पक्को गुलामी मा जाहेत।”