आमोस 6

इसराइल ला नास

1“धिक्कार से, वोना लोख पर जोन सिय्योन मा सुख लक रव्हसे, अना उन पर जोन सामरिया को परबत पर बेखटका रव्ह सेत,1 वय जोन साजरो लोक मा मानयो-जानयो सेत। जोनको जवर इसरायल को खानदान आवासे”। 2कलने नगर मा जायके चोवो, अना वहान लक हमात नाव को मोठो नगर मा जावो, तबा पलिस्ती को गत नगर ला जाव। का वय इन राज लक साजरो से? का उनको देस, तुमरो देस लक काही मोठो से? 3तुमी बुरो दिवस ला दुहुर कर देवासो। वा हिंसा राज को जवर ले आयो सेव। 4“तुमी हाँती को दांत को पलंग पर सोवासेव, अना आपरो-आपरो हतरन मा पाय फैलाए झोपासेव, अना सेरी मेंढी को पाठी अना कोठा मा लक जनावर खावोसो। 5तुमी सारंगी को संग गाना गाते, अना दाऊद को जसो लगत परकार को बाजा अक्कल लक हेड़ासेव। 6अना कटोरा मा लक अंगूर को रस पिवता, अना साजरो खुसबू वालो तेल लगावासो, पर यूसूफ पर आवनवालो आफद को हाल आयक के दुखी नही होवासेव। 7यो कारन लक वय अबा बँधुआई मा पयले जाहेत, अना जोन पाय पसारया झोपत होतीन। उनको मौज-मस्ती जावत रहेत।” 8सेनागिन को परमेस्वर यहोवा को यो सबद आय, (परमेस्वर यहोवा ना आपरो च किरिया खायो से), “जोन पर याकूब गरब करा सेत, वोको लक मी घिरना, अना ओको राज दरबार लक बैर राखासेव। अना मी यो नगर ला वोय सबरी संगा जोन ओको मा से, बयरी को बस मा कर देहू।” 9अदी कोनी घर मा दहा मानूस बचया रहबीन, तबा भी उ मर जाहेत। 10जबा कोनी को काका, जोन ओको पेटानवालो वोकी हाड़गिन ला घर लक बाहेर हेड़न को लाय मदत करहेत, अना जोन घर को कगर मा सेत, वोको लक कहे, “का तोरो जवर कोनी अखीन से?” तबा उ कहेत, “कोनी नहात।” तबा उ कहेत, “उघा-मूघा रव्ह! अमी परमेस्वर को नाव नही लेनो चाव्हासेजन।” 11काहेका परमेस्वर को हुकूम लक मोठो घर मा छेद, अना लहान घर मा दरार होयेत। 12का घोड़ा चट्टान मा धावबिन? का कोनी समुदर को जघा मा बइल लक जोतन वालो नांगर चलाहे जहान तुमी लोकगीन ना न्याय ला जहर मा, अना धरम को फर ला कड़वे फर मा बदल दियो से? 13तुमी असी गोस्टी को कारन लक खुस सेव जोन बेकार2 सेत। अना कव्हसो, “का आमी आपरो हिसाब लक ताकत लक करनाई नगर ला हरादेईन ?” 14यो कारन लक सेनागिन को परमेस्वर यहोवा को यो सबद आय, “ओ इसरायली को घरानागीन, चोव, मी उनको बिरोध मा एक असो लोख उभा करू, जोन हमात की घाटी लक अराबा को नद्दी तकन तुमिला मुसीबत मा पाड़े।”