Powari Standard Project
आमोस 5
पस्तावा करन को बुलावा
ओ इसरायली को घरानागीन, यो सोक को गाना को बचन आयक, जोन मी तुमरो बारे मा कव्हसू। “इसरायली कुवारी टूरी पड़ गयी, अना मंग वा उठ नही सका सेत, उ आपरो धरती मा पटक दियो गयो से, अना वोको उठानवारो कोनी नहात।” काहेका यहोवा परमेस्वर इसरायल लक असो कव्हसे, “जोन नगर लक हज़ार सैनिक हीटत होतीन, ओको मा यिसरायील को घरानागीन को सौ च बचयो रहेति, अना जोन लक सौ हीटत होतीन, ओमा दहा बचयो रहेत।” यहोवा, इसरायल को खानदान लक असो कव्हसे, मोरी खोज मा लगो, तबा तुम्हि जिन्दो रव्हने।1 बेतेल नगर को खोज मा नही लगो, नही गिलगाल मा, अखीन बेरसेबा जावो, काहेकि गिलगाल पक्को बँधुआई मा जाहेत, अना बेतेल नगर सफा चक्काक होहेत।2 यहोवा परमेस्वर की खोज करोह, तबा तुम्हि जिन्दो रव्हने, नही ता उ यूसूफ को खानदान मा स्तो को जसो भड़के, अखीन उ ओला भस्म करहे, अना बेतेल नगर मा कोनी वोको बुझानवालो नही होयेत। ओ नियाव को बिगाड़नवारो अना न्यायीपन ला धरती मा मिलानवारो। जोन कचपचिया अना मिरगसिरा नकछतर को बनानवारो से, जोन घोर इन्धार ला सक्कार को उजाड़ बनावासे। जोन दिवस ला इन्धार करके रात बनयो देवासे, अना समुंदर को पानी धरती को वरता बहा देवासे, वोको नाव परमेस्वर से।3 उ लवकर ताकतवर को नास कर दे, अना किला को नास करा से। जोन मानुस कचेरी मा नियाव को लक बैर राखासे, अना खरो गोस्टी बोलन वालो लक नफरत करासेत।4 तुमी जो गरिब ला लात लक मारासेव ,अना जमा कव्हके उनला अनाज जबरन लेवासो एकोलाय जोन घर तुमी ना घुस को गोटा को लक बनायो सेव। उनको मा रव्हन नही पावने, अना जोन मन ला सजरो अंगूर को बाग तुमी ना लगाईस सेत, उनको अंगूर को रस नही पिवन पावने। काहेका मि जानसेऊ का तुमरो पाप गजब सेत। तुमी नेक मानूस ला तंगासेव अना घूस लेवासेव, अना बेसकुड़ मा गरीब कंगाल ला न्यायलय को दुवार लक भगाय देवा सेव। यो कारन लक जोन अक्कलवर होय, उ असो बेरा चुप रव्ह, काहेकि बेरा बुरो से। ओ लोगो बुराई ला नही भलाई ला ढुँढो जोनलक तुम्हि जित्तो रव्हो। अना तुमरो यो बात खरो से का सेनागिन को परमेस्वर यहोवा तुमरो संग से।5 बुराई लक ईरसा अना सुवारत लक माया राखो, अना कचेरी मा न्याय ला पक्को करो, कोनजाने सेनागिन को यहोवा परमेस्वर यूसूफ का बचया हुया लोगहुन पर किरपा करे।6 यो कारन लक सेना को परमेस्वर, यहोवा असो कव्हसे, “सब चवकगीन मा रोना-पीटना होहेत। अना सबच रास्ता मा लोक हाय-हाय, करयेत। वय सबा किसानगिन ला दुखी करन को लाय, अना जोन लोग रोवनों मा पक्को सेत, उनला रोवन-पीटन ला बुलाहूँ। अना सब अंगूर को बाड़ी मा रोवनो-पीटनो होयेत”, काहेकि यहोवा असो कव्हसे, “मी तुमरो बीच मा लक डन्ड लेयके आहूँ।” तुम पर हाय, जोन परमेस्वर को दिवस को लालसा करा सो, यहोवा को दिवस लक तुमरो काजक फायदा होहेत। उ ता उजाड़ को नही इन्धारो को दिवस होयेत। यो वसो च होहे जसो कोनी मानुस सेर लक जीयान बचाय के पराय रहयो से अखिन परायो हुयो ओको सामना रीछ लक होय अना ऊ घर को भीतर आयो अखिन आराम को लाय भीत मा हात टेके अखिन ओला सरप काट लेहे। का यो खरो नाहती का यहोवा को दिवस उजाड़ को नही पर इन्धार को होयेत? हव असो घनो इन्धार को जोन मा काही भी चमक नोको होय। “मी तुमरो तिहार लक बइर राखासेउ। अना उनला निकम्मो जानासेऊ अना तुमरो मोठी सभाहुन लक मि बेहद खुस निहाऊ7”। चाहे तुमी मोरो लाई इस्तोबली अना अनाज बली चघावनो चघावो, तबा भी मि खुस नही सेउ, अना तुमरो पाले हुयो जनावर को मेलबली हुन को कन भी नही ताकूँ। आपरो गीतहुन को हड़कम मोरो लक दुहूर करो, तुमरो सारंगी हुन को सुर मी नही आयकु। पर न्याय ला नदी को जसो, अना न्यायीपन ला मोठी नदी को जसो बहोन देव। “ओ इसरायल को घरानो, तुमी जंगल मा चालीस साल तकन जनावर बली अना अन्न बलि का मोला च चघावत रहे। काहेका तुम्ही ना आपरो राजा देव सुक्कत अना आपरो तारा देवता केवान को मुरती को पूजा करयो से, एकोलाय तुम्ही मूरतगिन ला आपरो संग लेजावनो से। यो कारन मी तुमी ला दमिस्क नगर को वोना गन बँधुआई मा कर देहू, सेना को परमेस्वर यहोवा को यो गोस्टी से”।8
Source notes (8)
- Cross-reference होसे 10:12
- Cross-reference आमोस 4:4; 8:14
- Cross-reference अय्यूब 9:9; 38:31
- Cross-reference गलातियो 4:16
- Cross-reference भजनसंहिता 34:12-16; मत्ती 7:7
- Cross-reference रोमियो 12:9
- Cross-reference यसायाह 21:11
- Cross-reference हिटनो 12:12
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.