आमोस 4

1“ओ बासान को गाईगिन, सामरिया को बायको यो गोस्टी ला आयको, तुमी जोन सामरिया परबत पर सेव, जोन गरीब गोरगिन मा अन्धेर करासेव, अना लाचारगिन ला कुचल डाकासेव। अना आपरो-आपरो नवरा लक कव्ह सेव, आन, दे आमी पीवबोन।” 2यहोवा परमेस्वर आपरो पवीतरपन को किरिया खाय के कव्हासे, चोवो, तुम्ही पर एक दिवस असो आवन वालो से, का तुमी कांटा लक, अना तुम्हरी औलाद मसरी को छड़ीगीन लक आन लियो जाहेत। 3“तुमी परकोट को नाकागीन लक होयके सीध्धी हिट जाव अना हरम्मोन पहाड़ को कन डाक देयी जाहो,” यहोवा को यो सबद आय।

इसराइल सुधरन मा असुफल

4“बेतेल नगर मा आयके पाप करो, अना गिलगाल मा लगत सा पाप करो, आपरो बली चघावा पहट ला, अना आपरो दसवा हिस्सा हर तीसरो दिवस लेयके आवनो। 5धन्यवाद बली खमीर मिलाय के चघावो, अना आपरो खुदको सोच लक बलिगिन को चरचा, चलायके उनको परचार करो, काहेका ओ इसरायली गिन, असो करनो तुमला साजरो अना पियारो लगासे।” परमेस्वर यहोवा को यो सबद आय। 6“मी ना तो तुमरो सबच नगर मा दांत को सपाई कराय दियो, अना तुमरो सप्पा जघा मा भाकर को कमी करयो सेउ, तबा भी तुमी मोरो कन मुरक के नही आयो।” यहोवा को यो सबद आय। 7“जबा फसल कटनी को तीन महिना रह गयीन, तबा मी ना तुमरो लाय बरसात नही करयो, मी ना एक नगर मा पानी बरसायके दुसरो मा नही बरसायो, एक खेत मा पानी बरसो, अना दुसरो खेत जोन मा नही बरसयो, उ सूक गयो। 8नगर को लोग पानी पिवन को लाय मारा-मारा हिंडता फिरत हुयो एक च नगर मा आइन, पर संतुस्ट नही भयीन, तबा भी तुमी मोरो कन नोको फिरीन” यहोवा को यो सबद आय। 9“मी ना तुमला घाम मारनो अना गेरुई रोग लक मारयो सेउ, अना जबा तुमरो बगीचा अना अंगूर को बाग, अना अँजीर अना जयतून को झाड़ लगत भय गयीन, तबा फाफा उनला खाय गयीन; तबा भी तुमी मोरो कन मुरक के नही आयीन।” यहोवा को यो सबद आय। 10“मीना तुमरो बीच मा मिसर देस को जसो मरही फैलाई, मी ना तुमरो हिसकयो हुयो घोड़ो को सगं-संग तुमरो जावानगिन ला तरवार लक मार डालयो। अना तुमरो डेरा को लास को बदबु तुमरो जवर धाड़यो; तबा भी तुमी मोरो कन मुरक के नही आयो।” यहोवा को यो सबद आय। 11“मी ना तुमी मा लक काही ला नास कर दियो, जसो परमेस्वर ना सदोम अना गोमेरा ला नास कर दियो होतो, अना तुमी स्तो लक हेड़ी गयी लुठ्ठी को जसो सेव, तबा भी तुमी मोरो कन मुरक के नही आयो।” यहोवा को यो सबद आय। 12“यो कारन लक, ओ इसरायल, मी तोरो लक असो च करू, अना एकोलाय की मी तोरो मा यो काम करन पर सेव, ओ यिसरायील, आपरो यहोवा परमेस्वर को मोहरा नियाय को सामना करन लाय तैय्यार भई जाव।” 13चोव, पहाड़गिन को बनानवारो अना वारा को सिरजनवालो, अना मानूस ला ओको मन को बिचार बतानवालो पहाट ला इन्धयार करनवालो, अना जोन धरती को ऊँच्चो जाघागिन पर चलनवालो से, वोको च नाव सेनागिन को परमेस्वर यहोवा आय1।