आमोस 3

1ओ इसरायली गिन , यो गोस्टी ला आयको, जोन परमेस्वर ना तुमरो बारे मा, मजे सप्पा खानदान को बारे मा कह्यो से जेनला मी मिसर देस लक आनयो सेऊ। 2“धरती मा को पूरो घरानों मा लक मी ना सिरप तुम्ही ला निवाड़ लियो सेउ, एको कारन मी तुमरो सप्पा अनियाव को काम को दन्ड देहुँ।

भविस्यवक्ता को काम

3“अदी दुई मानूस एक मा हिस्सेदार नही होहेत। तो का वय एक संग चल सकासेत। 4का सेर बिना सीकार मिल्यो जंगल मा गरजेत? का जुवान सेर आपरी मांद मा बिना काही सिकार धरयो गुरराहे? 5का चिड़ी बिना फन्दा लगाय फँसेहे? का काही फँसयो बिन फन्दा जमीन मा उचकेत?1 6का कोनी नगर मा नरसिंगा फूँकन पर लोगहुन नही थरथराहेत? का परमेस्वर को बिना धाड़यो गयो कोनी नगर मा कोनी आफद पड़हे? 7येना पिरकार लक पिरभू यहोवा आपरो दास भविस्यवक्ता पर आपरो भेद बिना परगट कियो काही भी नही कर सकासेत।2 8जबा सेर गरजे, ता कोनी नही डरेत? जबा परमेस्वर यहोवा ना कह्यो, का मी भविस्यवक्ता लक कव्हू तो का ऊ भविस्यवानी नही करेत?”

सामरिया को नास

9असदोद को किला अना मिसर देस को राजकिला मा परचार करके कव्हो, “सामरिया को पहाड़ गिनमा जमा होयके चोवो, वोमा केतरो हुल्लड़ अना वोको बीच केतरो इन्धारो को काम होय रह्यो सेत।” 10यहोवा को यो सबद आय, “जोन आपरो किलाहुन मा सताव अना डकैती को धन सकेल के राखी सेत, वय सिधाई लक काम करनो जानत च नही” 11यो कारन लक परमेस्वर यहोवा असो कव्हासे, “देस ला घेरनवाला एक बयरी होहे, अना उ तोरो बल तोड़ेत, अना तोरो किला लुट जाहेत।”3 12यहोवा असो कव्हसे, “जसो परकार लक चरानवालो सेर को टोन्ड लक दुई पाय या कान को एक हिस्सा सुड़ावसेत, वसोच इसरायल लोगहुन जोन सामरिया मा हतरन को एक कोनटा अना लाल पिढो पर बसयो काही लोग, सुड़ाया जाहेत।” 13सेनागिन को परमेस्वर, पिरभू यहोवा को यो सबद आय, “चोवो, अना याकूब को खानदान लक यो गोस्टी चिताकर असो कव्हने, 14जोन बेरा मी इसरायल ला ओला दन्ड देहुँ, वोच बेरा मी बेतेल नगर को वेदिहुन ला भी नास करूँ, अना वेदी को सींग टूटके जमीन मा पड़ जाहेत।4 15मी दव को घर ला, अना दुफारी को घर, दुही ला पाड़हुँ, अना हाथीदाँत लक सजयो हुयो घर, अना मोठो-मोठो घर नास भई जाहेती।” यहोवा को यो सबद आय।