Powari Standard Project
आमोस 2
मोआब
यहोवा यो कव्हासे, “मोआब को तीन का, पर चार पाप को कारन लक भी, मी वोको सजा नही सोड़ु, काहेका ओना एदोम को राजा की हाड़गीन ला पेटाय के राख कर दियो। एकोलाय मी मोआब मा स्तो धाड़ू। अना वोको लक करिय्योत को किला भस्म होय जाहेत। अना मोआब हुल्लड़ अना ललकार अना नरसिंगा को सबद होत-होत मर जाहेत। मी उनको बीच मा लक न्यायी सासक हुनला नास करहु, अना सँगा-सँगा वोको सब अधिकारी हुनला भी मार डाखू।” यहोवा को यो गोस्टी आय।
यहूदा
यहोवा असो कव्हासे, “यहूदा को तीन का, पर चार पाप को कारन लक मी वोको सजा नही सोड़ीन, काहेका उनना परमेस्वर को करार नेम ला बेकार जान्यो, अना मोरो हुकूम ला नही मानयो, अना आपरो खोटो देव को कारन लक जोन को मंघा उनको आजा पुरखा चलत होतीन, वय भी भटक गयीन। एकोलाय मी यहूदा मा स्तो धाड़ू अना वोको लक येरूसलेम नगर को किले भस्म होय जाहेत।”1
इसराइल मा परमेस्वर को नियाव
यहोवा असो कव्हसे, “इसरायल को तीन का, पर चार पाप को कारन लक भी, मी वोको सजा नही सोड़ू, काहेका उनना निरदोस ला दाम को लाय अना गरीब ला एक जोड़ी पनहीहुन को भाव मा बीक डाकिसेत।” वय गरीब गोर को डोस्का पर की बारु को लोभ करासे, अखीन गरीब लोक गीन ला रस्ता लक हटाय देवा सेत। अना बाप-बेटा दूई एकच जुवान टूरी को जवर जासेत, जेनको लक ऊ मोरो पवीतर नाव ला भी असुध्द ठयरावसेत। वय हर एक वेदी को जवर गिरवी को कपरागिन मा सोवसेत। अना दन्ड को रुपयो लक ले लियो गयो अंगूर को रस आपरो देव को घर मा पीवासेत।
“मी ना उनको पूढा लक एमोरी जाति ला नास करयो होतो, जोन ऊच्चो बड़ को झाड़ अना उनकी ताकत बांज झाड़ को जसो होती; तबा भी मी ना वरता को ओको फर, खाल्या लक वोको जड़ ला नास कियो। मी तुम्ही ला मिसर देस लक हेड़ के आनयो, अना जगंल मा चालीस साल तकन तुमला लियो फिरत रह्यो, का तुमीला एमोरी देस को अधिकारी बनाहुँ। मी ना तोरो टूरा मा लक एक भविस्यवक्ता अना तुम्हारो मा लक काही जुवान नाजीर2 होवन को लाय ठयरायो सेउ। ओ इसरायली गिनति, का यो सबा खरो नहाय?” यहोवा को यो सबद आय।3 पर तुम्ही ना नाजीर गिनला अंगूर रस पिलायो, अवर भविस्यवक्ता गिनला परमेस्वर को हुकुम देन लक रोकयो। “चोवो मी तुमी ला असो दबाहूँ, जसो बोझा लक गाड़ी खाल्या को कन दबायो जासे। एकोलाय तेजी लक परान वालो ला परावन को जघा नही भेटेत, अना ताकतवर को ताकत काही काम नही देहेत। अना महान ताकतवर भी आपरो पिरान ला नही बचाय सकासे। तीर चलावन वारो उभो नही रव्ह सकासे, अना तेजी लक परावन वालो भी नही बच सकासेत। घुड़सवार भी आपरो पिरान ला नही बचा सकासेत। अना बाहदुर सैनिकगिन मा सूरवीर जोन लगत धीर होय, उ भी वोना दिवस नंगरो होयके पराय जाहेत।” यहोवा को यो सबद आय।
Source notes (3)
- Cross-reference होसे 8:14
- Footnote परमेस्वर को लाय जोन खास उपास रखा सेत डोई को केस नही काटत अना दारु नही पीवत ,लास ला नही लुकावत जोन अलोक अक्कल पिरापत कर सेत।
- Cross-reference गिनती 6:1-8
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.