Pengo Bible
ହିତପଦେସ 26
ଇନେସ୍ କାରାମାସ୍ତ ଅସ୍ ଆରି ତାସ୍ ସମୁତ ବାର୍ହା, ହେଲାକେ ମୁର୍କିୟାଙ୍ଗ୍ ଗାଜା ମାନି ଆକାୟ୍ । ସାଇପ୍ ମିଙ୍ଗେଙ୍ଗ୍ କେତି କିଦ୍ଦେଂ ଆଡ଼୍ଦୁତ୍ ଜଦି ଏପେଙ୍ଗ୍ ହେଦାଂ ପାୟାଦେଂ ଜଗ୍ ଆକାୟ୍ । ହେୱାର୍ ପଟିଂ ଲାକେ ଉମ୍ଜି ବୁଲା ଆନାର୍ ଆରେ ଇନାୱାଡ଼ାଂ ପା ତାଦାଂ ତିର୍ ଆଉତ୍ । ଗଡ଼ା କାଜିଂ କର୍ଡା; ଗଦ କାଜିଂ ବାକାର୍, ଆରେ, ମୁର୍କିୟାତି ଗାଗାଡ଼୍ କାଜିଂ ବେଡ୍ଗା । ମୁର୍କତିଂ ତା ଅଗିୟାନି ଇସାବ୍ରେ ଉତର୍ ହିମାଟ୍, ହିତିସ୍ ଏପେଙ୍ଗ୍ ପା ତା ସମାନ୍ ଆନାଦେର୍ । ମୁର୍କତିଂ ତା ଅଗିୟାନି ଇସାବ୍ରେ ଉତର୍ ହିୟାଟ୍, ନଲେ ହେୱାନ୍ ଜାର୍ କାଣ୍କୁତ ଜାର୍ତିଂ ଗିଆନି ବାବିକିନାନ୍ । ମୁର୍କିୟା କେଇଦ ଇନେନ୍ କାବୁର୍ ପକ୍ନାନ୍, ହେୱାନ୍ ଜାର୍ ପାନା ନିଜେ କେତି କିନାନ୍ । ଚଟାର୍ତି ପାନା ଇନେସ୍ ଲିଡ଼ଲାଡ଼ା, ଅଗିୟାନି ୱେଇଦ ହେଲାକେ ହାର୍ଦିହିକ୍ୟା ବଚନ୍ । ଇନେସ୍ ବର୍ଙ୍ଗାଡରିତ କାଲ୍ ଇନେସ୍ ଇଡ଼୍ନାକା ହେଲାକେ ହେୱାନ୍, ଇନେନ୍ ମୁର୍କିୟାଂ ଗାଜା ମାନି କିନାନ୍ । ମାତ୍ଲି ମାନାୟ୍ତି କେଇଦ ନିକ୍ୟାଆନି ୱାଡ଼ିଙ୍ଗ୍ ଇନେସ୍ ମୁର୍କିୟାତି ୱେଇଦ ହାର୍ଦିହିକ୍ୟା ବଚନ୍ ହେଲାକେ । ବାଣ୍ୱେନ୍ ଇନେସ୍ ୱିଜ଼ାରିଂ ଗାଉଦାଉ କିନାତ୍, ହେଲାକେ ହେ ମାନାୟ୍, ଇନେନ୍ ମୁର୍କିୟାଂ ବୁତି ହିନାନ୍ ଆରି ଇନେନ୍ ହାସ୍ଦିଂ ହାନି ମାନାୟ୍ତିଂ ବୁତି ହିନାନ୍ । ଜାର୍ କାକ୍ତିକିଙ୍ଗ୍ ଆରେରଗ ନିକୁଡ଼୍ ତିନାତ୍ ଇନେସ୍, ବାର୍ ବାର୍ ଜାର୍ ଅଗିୟାନିତି କାମାୟ୍ କିନି ମୁର୍କ ହେଲାକେ । ଇନେନ୍ ଜାର୍ କାଣ୍କୁକାଂ ଗିୟାନି, ଏଲେଙ୍ଗ୍ବାର୍ତି ମାନାୟ୍ତିଂ ହୁଡ଼୍ତାଦେର୍ଣ୍ଣା କି ? ହେଦାଂ ବାଟା ମୁର୍କିୟା ବିସ୍ରେ ଆଦିକ୍ ବାର୍ସି ମାନାତ୍ । ନିସ୍ତାୟ୍ ଇନାନ୍, ହାଜ଼ିତ ସିୟଁ ମାନାତ୍, ଚକ୍ତ ସିୟଁ ମାନାତ୍ । ଇନେସ୍ କାବ୍ଜାତାଂ କାପାଟ୍ ବୁଲାନାତ୍, ହେଲାକେ ନିସ୍ତାୟ୍ ଜାର୍ ଟାଟିତ ମାନ୍ଜି କିନାନ୍ । ନିସ୍ତାୟ୍ ତାଡ଼ିୟାତ କେଇ ମେତ୍ତି ଆରେରଗ ହେଦାଂ ୱେଇଦ ଅଦେଂ ୱାହ୍ନାନ୍ । ସାତ୍ ଜାଣ୍ ହାର୍ବିଚାର୍ନିକାର୍ ଉତର୍ ହିନାକାର୍ ବାଟା ନିସ୍ତାୟ୍ ଜାର୍ କାଣ୍କୁକାଂ ବୁଦିକାରିୟା ମାନେ କିନାନ୍ । ଇମ୍ଣି ମାନାୟ୍ ହାଜ଼ିତ ହାଲୁ ହାଲୁ ଜାର୍ତି ଜାଣାହିଲ୍ୱି ଜଗ୍ଡ଼ାତ ରିସା ଆନାନ୍, ହେୱାନ୍ ନିକୁଡ଼୍ କିତୁଲ୍ ଆହ୍ନି ମାନାୟ୍ ଲାକେ । ନାଣି ଆହ୍ନି ଆମ୍, ଆରି ପାଗ୍ନି ଆମ୍ ବାୟା ତୁହିନାକାନ୍ତି ଇନେସ୍; ଜାର୍ ପାଡ଼୍ହାଇଞ୍ଜାକାର୍ ଇମ୍ଣି ମାନାୟ୍ ବୁଲାୟ୍ କିଜ଼ି ଇନାନ୍ ଆନ୍ ଇନାକା ଚକଣ୍ କିଦୁଙ୍ଗା, ହେୱାନ୍ ହେ ଲାକେ । ୱେଜ଼୍ଗୁ ୱିସ୍ତିସ୍ ନାଣି ହାନାତ୍, ଚୁଗ୍ଲିୟା ହିଲ୍ୱିତିସ୍ ଜଗ୍ଡ଼ା ବନ୍ଦ୍ ଆନାତ୍ । ଇନେସ୍ ଆହ୍ନି ଗଡାକାଂ ଗଡାଂ ଆରି ନାଣିତ ୱେଜ଼୍ଗୁ ହେଲାକେ ଗଣ୍ଡ୍ଗଲ୍ ବାଡାୟ୍କିଦେଂ ଜଗ୍ଡ଼ାନି ମାନାୟ୍ । ଚୁଗ୍ଲିୟା କାତା ହୱାଦ୍ ଲାକେ, ହେଦାଂ ବିତ୍ରେ ମାନ୍ତ ମାନ୍ଗାନାତ୍। ଅଟିତ ହୱାଦ୍ କାତା ମାନ୍ ବିତ୍ରେ ବାନ୍ୟା ବାବ୍ନା ଇନେସ୍, ରୁପା ପିକାଂ ରଚ୍ଚି ଚିକ୍ଲା କଣ୍ଡି ଲାକେ । ଗିଣ୍କିନାକାର୍ ଜାର୍ ୱେଇତ କୁଟ୍ କିନାନ୍, ମତର୍ ମାନ୍ତ ଟକାୟ୍ କିନାକାନ୍ । ହେୱାନ୍ ହୱାଦ୍ କାଟ୍ତାଂ ଇଚାନ୍, ତାଙ୍ଗ୍ ପାର୍ତି କିମାଟ୍, ଇନେକିଦେଂକି ତା ମାନ୍ତ ସାତ୍ଗଟା ଗିଣ୍ ବିସ୍ରେ ମାନ୍ଗାନାତ୍ । ହେୱାନ୍ତି ଗିଣ୍ କୁଟ୍ ଜାର୍ତିଂ ମଦାୟ୍ କିତିସ୍ପା ହେୱାନ୍ତି ବାନ୍ୟା ୱିଜ଼ାର୍ ମୁମ୍ଦ ହନାତ୍ । ଇନେନ୍ କ୍ଡଇ କାର୍ନାନ୍, ହେୱାନ୍ ନିଜେ ହେ ବିତ୍ରେ ଆର୍ନାନ୍; ଆରେ, ଇନେନ୍ କାଲ୍ ଗୁତ୍ନାନ୍, ହେଦାଂ ହେୱାନ୍ ଜପି ଲାଦିଆନାତ୍ । ମିଚ୍ଇନାକାନ୍ ୱେନ୍ଦୁଲ୍ ଇନେରିଂ ଗୁଣ୍ଡା କିନାତ୍, ତାଙ୍ଗେଙ୍ଗ୍ ନେ ଗିଣ୍ କିନାତ୍; ଚିକ୍ଣିୟା ୱେଇ ସବୁନାସ୍ ଉବ୍ଜାୟ୍ କିନାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.