Pengo Bible
ହିତପଦେସ 25
ସଲମନ୍ତି ଆଦିକ୍ ହାର୍ଦି ହିକ୍ୟା
ତାରେନ୍ଲେକାତି ହାର୍ଦିହିକ୍ୟା ସବୁ ନେ ସଲମନ୍ତି ରଚ୍ଚି ଆରି ଜିହୁଦାନି ରାଜା ହିଜକିୟନି ମାନାୟାର୍ ହେଦାଂ ହୁଡ଼୍ଜି ଉତ୍ରାୟ୍ କିତାର୍ । ବିସ୍ରେନିକା ଡ଼ୁକ୍ଚି ଇଟ୍ନାକା ପର୍ମେସ୍ୱର୍ତି ଜାଜ୍ମାଲ୍; ମତର୍ ବିସ୍ରେନିକା ଡେକ୍ନି କାଜିଂ ରାଜାତି ଗାଜା ଜାଜ୍ମାଲ୍ । ଉଚା କାଜିଂ ସାର୍ଗେ ଆରି ଡେଙ୍ଗା କାଜିଂ ପୁର୍ତି, ଆରେ ରାଜାର୍ତି ବାବ୍ନା ବୁଜାଆଦେଂ କସ୍ଟନିକା ଆନାତ୍ । ରୁପାତାଂ ପିଙ୍ଗ୍ ଉନ୍ଦାଟ୍, ଲାଗିଂ ହନାରି କାଜିଂ ର ବାହା ହତ୍ନାତ୍ । ରାଜା ମୁମ୍ଦାଂ ଦୁସ୍ଟରିଂ ଦେହା କିୟାଟ୍, ଆରେ, ତା ଗାଦି ଦାର୍ମିତ ହାର୍ତିର୍ ଆନାତ୍ । ରାଜା ମୁମ୍ଦ ଜାର୍ତି ବାଡ଼ାପନ୍ କିମାଟ୍, ଆରେ ମୁଡ଼୍ ମାନାୟାର୍ ବାହାତ ନିଲ୍ମାଟ୍ । ଇନେକିଦେଂକି ଇମ୍ଣି ମୁଡ଼୍ଦାକାନିଂ ନି କାଣ୍କୁ ହିତାୟ୍ନା, ହେୱାନ୍ ମୁମ୍ଦ ନିଦାଂ ତାରେନ୍ ବାଟା ଇଚିସ୍ ଇବେ ୱା ଇଞ୍ଜି ନିଙ୍ଗେଙ୍ଗ୍ ଇଞ୍ଜ୍ନାକା ହାର୍ । ଗଣ୍ଡ୍ଗଲ୍ କିଦେଂ ତ୍ରିପ୍କୁ ବିଚାର୍ନାତ ହାଲ୍ମାଟ୍, ହାଚିସ୍ ହେବେ ହାରିହାରା ମି ପାଡ଼୍ହାଇଞ୍ଜାକାର୍ ମିଙ୍ଗେଙ୍ଗ୍ ଲାଜୁକୁଇ କିତି ପାଚେ ଏପେଙ୍ଗ୍ ଇନାକିନାଦେର୍? ଜାର୍ ପାଡ଼୍ହାଇଞ୍ଜାକାର୍ ଲାହାଂ ଜାର୍ ଗଣ୍ଡଗଲ୍ତିଂ ବନ୍ଦ୍ କିୟାଟ୍, ଆରେ, ଲକାର୍ ଡ଼ୁକ୍ତି କାତା ହପ୍ମାଟ୍ । ଆୱିତିସ୍ ୱେନାକାନ୍ ମିଙ୍ଗେଙ୍ଗ୍ ଲାଜ୍ କିତିସ୍, ନି ବଦ୍ଲାମ୍ ଗୁଚା ଆଉତ୍ । ରୁପା ତାଡ଼ିୟାତ ଇଟ୍ୟାସି ମାନି ହେନ୍ତି ନାର୍ଙ୍ଗି ପାଡ଼୍ ଇନେସ୍ ଟିକ୍ ସମୁନି କାତା ହେ ଲାକେ । ହନା କିତୁଲ୍ତ ତୁସ୍ନି ମୁଦ୍ରାଂ ଆରି ହାର୍ଦି ହନା ହାସ୍କୁ ଇନେସ୍, ମାନ୍ଦ୍ୟାନ୍ହିନି କିତୁଲ୍ କାଜିଂ ଗିଆନିତି ଆନାକାର୍ ହେଲାକେ । ତାସ୍ ସମୁତ ଅସ୍ କାକାର୍ ଇନେସ୍, ପକ୍ତାକାର୍ କାଜିଂ ପାର୍ତିନି ଦୁତ୍ ହେଲାକେ; ଇନେକିଦେଂକି ହେୱାନ୍ ଜାର୍ ମୁଣିକାର୍ ପାରାଣ୍ତ ସୁସ୍ତା ହିନାତ୍ । ବାର୍ହାହିଲି ବାଦାଡ଼୍ ଆରି ଡ଼ୁଇ ଇନେସ୍, ଜାର୍ ଦାନ୍ ବିସ୍ରେ ମିଚ୍ ବଡ଼୍ପାଣିୟା ହେଲାକେ । ଲାମାହୁଦାର୍ ହୁଦାଂ ସାସନ୍କାରିୟା ବାଙ୍ଗାୟ୍ କାତାତ ଇନ୍ୟାଆନାନ୍, ଆରେ କୱାଣ୍ ୱେନ୍ଦୁଲ୍ ପ୍ଡେକୁ ଡ୍ରିକ୍ନାନ୍ । ଜଦି ଏନେଙ୍ଗ୍ ପୁକି ଗାଟାତାତ୍ନା ? ନିଂ ଏଚେକ୍ ଦର୍କାର୍, ହେ ଏଚେକ୍ ତିନା; ବେସି ଚିଚିସ୍ ଏପେଙ୍ଗ୍ ହେଦାଂ କାକ୍ୟା ଆନାଦେର୍ । ଏପେଙ୍ଗ୍ ଜାର୍ ପାଡ଼୍ହାଇଞ୍ଜାକାର୍ ଇଞ୍ଜ ଦିନ୍କେ ହାଲ୍ମାଟ୍ । ନଲେ ମି ବିସ୍ରେ ୱାସ୍ତି ହେୱାନ୍ ମିଙ୍ଗେଙ୍ଗ୍ ଗିଣ୍ କିଦ୍ନାନ୍ । ପାଡ଼୍ହାଇଞ୍ଜାକାର୍ ବିରୁଦ୍ତ ଇନେନ୍ ମିଚ୍ ସାକି ହିନାନ୍, ହେୱାନ୍ ଜୁଜ୍ କୁଟ୍ଲା ଆରି କାଣ୍ଡା ଆରି ଦାରା ଆମ୍ ଲାକେ; ବିପଦ୍ ସମୁତ ବିସ୍ହିନାକାର୍ ମାନାୟାର୍ତାକେ ପାର୍ତି କିନାକାନ୍ ଇନେସ୍; ଡ୍ରିଙ୍ଗ୍ତି ଟାଡା ଆରି ଚଟା ହାନ୍ଦ୍ଣି ପିଟାତି କାଲ୍କୁ ହେ ଲାକେ । ପିନିମାସ୍ତ ହେନ୍ଦ୍ରା ଉନ୍ନ୍ଦି ଅନାକା ଆରି ଗାଉତ ସଡ଼ା ଜପି ଅଙ୍ଗୁର୍ରାସ୍ ମେହାୟ୍କିନି ମାନାୟ୍ ଇନେସ୍, ଦୁକ୍କିନି ଲାଗାଂ କେର୍କଣ୍ କେର୍ନି ମାନାୟ୍ ହେଲାକେ । ମି ସାତ୍ରୁ ନାସ୍କି ଆତିସ୍, ତାଙ୍ଗ୍ ଆରାଣ୍ ଚିଚ୍ପାଟ୍; ଆରେ, ହେୱାନ୍ ଏସ୍କି ଆତିସ୍, ତାଙ୍ଗ୍ ଏଜ଼ୁଙ୍ଗ୍ ଉଟ୍ପାଟ୍; ହେବେ ଏପେଙ୍ଗ୍ ତା କାପ୍ଡ଼ାତ ଏଜ଼ୁଙ୍ଗ୍ ରିକାଂ ଇଟ୍ନାଦେର୍, ଆରେ ନିତ୍ରେମାପ୍ରୁ ମିଙ୍ଗେଙ୍ଗ୍ ଇନାମ୍ ହିଦ୍ନାନ୍ । ଇନେସ୍ ଉତର୍ଦିଗ୍ନି ଡ଼ୁଇ କାଣ୍କୁ ହତ୍ନାକା, ହେଲାକେ ଚକ୍ଲି ୱେନ୍ଦୁଲ୍ ରିସାତ ଆନାନ୍ । ଜଗ୍ଡ଼ାକିନି କଗ୍ଲେ ଲାହାଂ ରଚେ ଇଞ୍ଜ ବାହା କିନି ବାଟା ଚାତ୍ତ ର କନାତ ବାହା କିନାକା ହାର୍ । ଏସ୍କି ପାରାଣ୍ତିଂ କାକାର୍ ଏଜ଼ୁଙ୍ଗ୍ ଇନେସ୍, ଦେହା ଦେସ୍ତାଂ ନେକ୍ରିକାବୁର୍ ହେଲାକେ । ଗକାଂ ଏଜ଼ୁଙ୍ଗ୍ ଆରି ମେହାତି ଚୁରାଣ୍ ଇନେସ୍, ଦୁସ୍ଟ ମାନାୟ୍ ଆଗେ ବିଲ୍କିଆନି ଦାର୍ମି ମାନାୟ୍ ହେ ଲାକେ । ବେସି ପୁକି ତିଞ୍ଜେଙ୍ଗ୍ ଇନେସ୍ ହାର୍ ଆକାୟ୍, ହେଲାକେ ମାନାୟାର୍ ଜାର୍ ଗାଜା ଜାଜ୍ମାଲ୍ ଡେକ୍ନି କାଜିଂ ଜାଜ୍ମାଲ୍ ଆକାୟ୍ । ଇନେର୍ତି ନିଜ୍ତିଂ ତଲ୍ୟା ଆକାୟ୍, ହେୱାନ୍ ଡ୍ରିଙ୍ଗ୍ତି ଆରି କୁୱାଡ଼୍ହିଲି ଗାଡ଼୍ ଲାକେ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.