Pengo Bible
ଜିସାଇୟ 24
ସବୁନିପ୍ଣି ପୁର୍ତିନି ବିଚାର୍
ହୁଡ଼ାଟ୍, ନିତ୍ରେମାପ୍ରୁ ୱାରାକା ଆରି ସିଣ୍ଦା କିତାନ୍ନା, ଆରେ ହେଦାଂ ଉଲ୍ଟାୟ୍ କିଜ଼଼ି ହେବେନି ବାହାକିତାକାରିଂ ଜେଡ଼େକେତେ କିତାନ୍ନା । ତାପାଚେ ଇନେସ୍କି ମାନାୟାର୍, କି ମାପ୍ରୁହେବାକିନାକାନ୍; କି ଆଡ଼ିଏନ୍, ହେଲାକେ ତା ହାଉକାର୍ତି; କି ଆଡ଼ିୟାଣିତି, ହେଲାକେ ତା ହାଉକାରିଣିତି; କି କଡ଼୍ନାକାନ୍ତି, ହେଲାକେ ପ୍ରନାକାନ୍ତି; କି ମାଜାନ୍ତି, ହେଲାକେ ଅର୍କିତ୍ତି; କି କାନ୍ତାର୍ଏନ୍ନାକାନ୍ତି, ହେଲାକେ କାନ୍ତାର୍ହିନାକାନ୍ତି କାଜିଂ ଗିଟାନାତ୍ । ପୁର୍ତି ପୁରା ୱାରାକା ଆରି ପୁରା ନସ୍ଟ ଆନାତ୍; ଇନାକିଦେଂକି ନିତ୍ରେମାପ୍ରୁ ଇ କାତା ଇଚାନ୍ନା । ପୁର୍ତି କାନ୍ଦାଣ୍ ଆଜ଼ି ୱାଚ୍ନାତା ଆନାତା, ରାଜି ଚିନ୍ତା କିଜ଼ି ନାଦାର୍ ଆନାତା, ପୁର୍ତିନି ଉଚ୍ନି ମାନାୟ୍ ୱାଜ୍ଜି ହାନାରା । ପୁର୍ତି ବାହାକିତାର୍ ପାଦ୍ ତାରେନ୍ ରାଡ଼ା ଆତାତ୍ନା, ଇନାକିଦେଂକି ହେୱାର୍ ବିଦିସବୁ ପିସ୍ତାର୍ନା, ବିଦି ଅନ୍ୟାୟ୍ କିନାରା, ୱିସ୍ୱିକାଡ଼୍ ନିୟମ୍ ପିସ୍ତାର୍ । ଇଲାକେ ସାଇପ୍ ପୁର୍ତିତିଂ ଗୁସ୍ତାତାତ୍ନା ଆରି ତାରେନ୍ନିକାର୍ ଦସି ଆତାର୍ନା; ହେଦାଂ କାଜିଂ ପୁର୍ତିତ ବାହାକିତାକାର୍ କାଡ଼୍ନାରା ଆରି ଅଲପ୍ ଲକ୍ ବାକି ମତର୍ ମାନାର୍ । ପୁନି ଅଙ୍ଗୁର୍ରାସ୍ ଆଡ଼ବାନାତା, ଅଙ୍ଗୁର୍ କୁଡ଼଼ି ୱାଚ୍ଜି ହାନାତା, ୱାରିକିନାକା ୱିଜ଼଼ାର୍ ବେସି ନେଞ୍ଜ୍ନାକା ପିହ୍ନାରା । ତବଲାନି ୱାରି ଟେବା ଆନାତା, ୱାରିକିନାର୍ କାଟ୍ ସେସ୍ ଆନାତା, ଗମଣ୍ନି ୱାରି ବନ୍ଦ୍ ଆନାତା । ମାନାୟାର୍ କେର୍ନି ହୁଦାଂ ଅଙ୍ଗୁରାସ୍ ଉଣୁର୍; କାଲିଂ ଉଣାକାରିଂ ହେ କାଲିଂ କେନିକ୍ । ସିଣ୍ଦା ଗାଡ଼୍ ଡ୍ରିଙ୍ଗ୍ନାତା; ଇମ୍ଣି ମାନାୟ୍ ପା ବିତ୍ରେ ହାଞ୍ଜେଙ୍ଗ୍ ଆଡୁର୍, ଇଦାଂକାଜିଂ ୱିଜ଼଼ାର୍ ଇଲ୍ ଗେହ୍ୟା ଆତାତ୍ନା । ଅଙ୍ଗୁର୍ରାସ୍ କାଜିଙ୍ଗ୍ ହାଡ଼ାକ୍ତ କିକିରାଡ଼ିଂ ଆନାତ୍; ସବୁ ବାନି ୱାରି ମାଜ୍ଗା ଆନାତା, ଦେସ୍ନି ୱାରି ହାଚାତ୍ନା । ଗାଡ଼୍ଦ ବୁଡାନାତ୍ ମତର୍ ବାକି ମାନାତ୍ ଆରି ଦୁୱାର୍ ଡ୍ରିଙ୍ଗ୍ଜି ବୁଡାଆନାତା । ଇନାକିଦେଂକି ଇନେସ୍କି ଜିତ୍ମାର୍ ପାଡ଼୍ ଡ଼଼ାତ୍ନିହିଂ ଆରି ଅଙ୍ଗୁର୍ପାଡ଼୍ ରୁଣ୍ଡାୟ୍ କିତି ପାଚେ ଇନେସ୍କି ଅଙ୍ଗୁର୍ କଡ଼ଜା କିନିହିଂ, ହେଲାକେ ପୁର୍ତିନି କୁଟୁମ୍ ବିତ୍ରେ ଗିଟାନାତ୍ । ଇୱାର୍ ଗାଜା କାଟ୍ କିନାର୍, ଇୱାର୍ ୱାରିନି ଗାର୍ଜେନ୍ କିନାର୍; ନିତ୍ରେମାପ୍ରୁତି ପାଣ୍ କାଜିଂ ହେୱାର୍ ୱେଡ଼଼ାହାନି ଦିଗ୍ତାଂ ଗାଜା କାଟ୍ କିନାର୍ । ଇଲାକେ ଏପେଙ୍ଗ୍ ୱେଡ଼଼ାହନିଦେସ୍ତ ନିତ୍ରେମାପ୍ରୁତି, ଇଚିସ୍, ଇସ୍ରାଏଲ୍ନି ପର୍ମେସ୍ୱର୍ ନିତ୍ରେମାପ୍ରୁତି ତର୍ନି ଜାଜ୍ମାଲ୍ ହାମୁଦୁର୍ନି ଏସ୍କୁପ୍ଲିକାଂ ହପାଟ୍ । ଦାର୍ମିର୍ ହଲ୍ନାର୍, ଇ କେର୍କଣ୍ ଆପେଙ୍ଗ୍ ପୁର୍ତିନି ବାଟା ହାନ୍ଦିତାଂ ୱେଚାପ୍ନା । ମାତର୍ ଆନ୍ ଇଚାଙ୍ଗ୍, ଆନ୍ ନାଦାର୍ ଆନାଙ୍ଗା ଆନ୍ ନାଦାର୍ ଆନାଙ୍ଗା, ଆନ୍ ଦୁକ୍ନିକାଂ, ବିସାସ୍ତ ବିସ୍ହିନାକାର୍ ବିସ୍ହିନିକାତା କିନାରା; ଆଁ, ବିସାସ୍ତ ବିସ୍ହିନାକାର୍ ବେସି ବିସାସ୍ତ ବିସ୍ହିନିକାତା କିନାରା । ଏ ପୁର୍ତିନି ଲକୁ, ମି କାଜିଂ ପାଣ୍ଡ୍ରୁ, କ୍ଡୁକି ଆରି ଡ଼ୁକା ଜାଲ୍ଦି ଆତାତ୍ନା । ଆରେ, ଇଲାକେ ଗିଟା ଆଦ୍ନାତ୍, ଇନେର୍ ଜଦି ପାଣ୍ଡ୍ରୁନି ଦାକାତାଂ ହନ୍ନାନ୍, ହେୱାନ୍ କ୍ଡୁକିତ ଆର୍ନାନ୍; ଇନେନ୍ କ୍ଡଇଦାଂ ନିଂଜି ୱାତିସ୍, ହେୱାନ୍ ଡ଼ୁକାତ ହେସ୍ନାନ୍; ଇନାକିଦେଂକି ଜପିତାଂ ଜାଡ଼଼ାଂ ସବୁ ଜେୟାତିକ୍ନା ଆରି ପୁର୍ତିନି ବୁଇଁ ସବୁ କମ୍ପାଆନାତା । ପୁର୍ତି ନିଜେ କାଣ୍ଡିୟାକାବ୍ରା ଆନାତା, ପୁର୍ତି ନିଜେ ରୁଗ୍ନାତା, ପୁର୍ତି ବେସି ବିପ୍ତି ଆନାତା । ପୁର୍ତି ହଚ୍ଚି ମାନାୟ୍ ଲାକେ ଜଲାନାତା ଆରି କୁଡ଼ିୟା ଇଲ୍ ଲାକେ ଇନ୍ଆନି ଜଲାଆନାତ୍; ଆରେ, ତା ନାହାୟ୍ କିତାକା ତା ଜପି ବେସି ବଜ୍ ଆନାତ୍, ତାପାଚେ ହେଦାଂ ଆର୍ନାତ୍, ଆରେ ନିଙ୍ଗୁତ୍ । ଆରେ, ହେ ଦିନା ନିତ୍ରେମାପ୍ରୁ ଜପିତାଂ ସାର୍ଗେନିକାରିଂ ମେଲ୍ୟାୱିଜ଼଼ାରିଂ ଆରି ବୁଇଁତାରେନି ବୁଇଁନି ରାଜାରିଂ ଡାଣ୍ଡ୍ ହିନାନ୍ । ତାପାଚେ ଇନେସ୍କି ବନ୍ଦିନିକାର୍ କ୍ଡଇଦ ରବେଆନାର୍, ହେଲାକେ ହେୱାର୍ ରବେ ଆଜ଼଼ି ବନ୍ଦି ଇଞ୍ଜ ଗେହ୍ୟାନାର୍, ଆରେ, ବେସି ଦିନ୍ ପାଚେ ହେୱାର୍ତି ବିଚାର୍ କିୟାନାତ୍ । ହେକାଡ଼୍ଦ ଲେଞ୍ଜ୍ ଅଜଡ଼୍ ଆଉତ୍ ଆରି ୱେଡ଼ା ଇନାୱେଡ଼଼ାଂ ପଙ୍ଗୁତ୍; ଇନାକିଦେଂକି ଆଦିକାର୍ନି ନିତ୍ରେମାପ୍ରୁ ସିୟନ୍ ମାଡ଼ିତ, ଜିରୁସାଲମ୍ତ ଆରି ତା ପାରାଚିନାର୍ ଲାଗାଙ୍ଗ୍ ବେସି ସାକ୍ତିତାଂ ରାଜ୍ କିନାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.