Pengo Bible
ଜିସାଇୟ 23
ସର ସିଦନ କାଜିଂ ବେଣ୍ବାକ୍ଣାୟ୍କିନାକା
ସର ବିସ୍ରେନି ବେଣ୍ବାକ୍ଣାୟ୍କିନାକା ଏ ତର୍ସିସ୍ନି ଜାଜ୍ସବୁ, ଏପେଙ୍ଗ୍ ଦୁକ୍କିୟ୍ କିୟାଟ୍; ଇନାକିଦେଂକି ହେଦାଂ ଇଲାକେ ଗୁଣ୍ଡ୍ଗୁଣ୍ଡା ଆତାତ୍ ଜେ, ହେ ବିତ୍ରେ ଇମ୍ଣାକାପା ଇଲ୍ ହିଲୁତ୍, କି ହାନିୱାନି ହାଜ଼ି ହିଲୁତ୍; କିତିମ ଦେସ୍ତାଂ ଇଦାଂ ହେୱାର୍ କାଜିଂ ହପ୍ୟାତାତ୍ । ଏ ବାହାକିତାକାଦେର୍, ଏପେଙ୍ଗ୍ ଚିମ୍ରା ଆଡ; ହାମ୍ଦୁର୍ ପାଡ଼୍ହାନି ସିଦନ୍ୟାନି ବେପ୍ରିୟାର୍ ମି ଦେସ୍ତିତିଂ ପୁରା କିତାର୍ । ଆରେ, ବେସିଏସ୍ଜାତ୍କୁନି ସିୟର୍ତି ତାସ୍ ଆରି ନିଲ୍ନାଗୁଡ଼୍ତି ତାସ୍ ତାଦି ଲାବ୍ ମାଚାତ୍; ଆରେ, ହେଦାଂ ବାରବିନି ଦେସ୍କିନାର୍ କିଣାବିକାନି ବେପାର୍ ବାହା ମାଚାତ୍ । ଏ ସିଦନ୍, ଏନେଂ ଲାଜୁଆ, ଇନାକିଦେଂକି ହାମୁଦୁର୍, ହାମ୍ଦୁର୍ନି ଦେହା ପାତେକ୍ ଇ କତା ଇଚାନ୍ନା, “ଆପ୍ ଗାଟାନିନନାକା ପାୟା ଆଉପା, ଗାଟା ଆଉପା କି ବେଣ୍ଡିୟାତି ରୱାଣ୍ମାନ୍ କିଉପା, କି ଜିପଲିକ୍ତି ରୱାଣ୍ମାନ୍ କିଉପା ।” ଇ କାବୁର୍ ମିସର୍ ଏକିତିସ୍, ମାନାୟାର୍ ସର ବିସ୍ରେନି କାବୁର୍ତ ବେସି ତ୍ରିପ୍କାନାର୍ । ଏପେଙ୍ଗ୍ ନାସି ହାଲ୍ଜି ତର୍ସିସ୍ତ ହାଲାଟ୍; ଏ ଏସ୍କୁପ୍ଲିନି ବାହାକିତାକାଦେର୍, ତରହର ଆଡ । ଇଦାଂ କି ମି ୱାରିନି ଗାଡ଼୍ ? ଇଦାଂ ପ୍ଡାନି କାଡ଼୍ଦ ହିନା ପ୍ଡାନାକା ମାଚାତ୍; ଇବେନି ପାନା ଦେହା ଦେସ୍ତ ହଟ୍ପିନି କାଜିଂ ଇଦେଲିଂ ଅସିହାଚାତ୍ । ମୁକୁଟ୍ ବାଟାକିନାକାଦେଲ୍ ସରନି ବେପ୍ରିୟାର୍ ରାଜା ଲାକେ, ତା ମାଜାନିଂ ପୁର୍ତିନି ଆଦିକାରି; ତା ସବଦ୍ ଇ ଜଜନା ଇନେର୍ ଇଚାର୍ନା ? ୱିଜ଼଼ୁତିଂସାକ୍ତିକାଟି ନିତ୍ରେମାପ୍ରୁ ତା ଗରବ୍ନି ଆକାର୍ତିଂ ନାସ୍ କିନି କାଜିଂ ଆରି ପୁର୍ତିବିନି କୁଟୁମ୍ ମାନାୟ୍ୱିଜ଼଼ାରିଂ ରାଡ଼ା କିନି କାଜିଂ ଇ ଜଜନା କିତାନ୍ନା । ଏ ତର୍ସିସନି ଗାଡ଼୍ଚେ, ଏପ୍ ନିଲ୍ନାଗୁଡ଼୍ ଲାକେ ଜାର୍ ଦେସ୍ ପା ହିଜ଼଼ି ହାଲାଟ୍, ମିଂ ଇନେର୍ ମୁନା କିଦ୍ନାକାର୍ ହିଲୁର୍ । ହେୱାନ୍ ନାଗୁଡ଼୍ ଜପି ଜାର୍ କେଇ ଲାମାୟ୍ କିତାର୍ନା, ହେୱାନ୍ ରାଜିସବୁତିଂ ଲେପ୍ତାନ୍ନା; ନିତ୍ରେମାପ୍ରୁ କିଣାନ୍ ଡାଣ୍ଡ୍କାତି ନାସ୍ କିନି କାଜିଂ ସବୁନିପ ବଲ୍ କିତାନ୍ନା । ଆରେ, ହେୱାନ୍ ଇଚାନ୍, “ଆଗ ସିଦନ୍ନି ଗାର୍ଜାନ୍, ଜିପଲିଅୱିତି ଗାଡ଼ଚେ, ଏପ୍ ଆରି ୱାରି କିଉୟ୍, ନିଙ୍ଗା, ନାସି ହାଲ୍ଜି କିତିମତ ହାଲା; ହେବେ ପିସ୍ତି ଏପେଙ୍ଗ୍ ଇନାକାପା ଜମୁୟ୍ ।” କଲଦିୟର୍ତି ଦେସ୍ତିଂ ହୁଡ଼ାଟ୍; ଇ ଲକ୍ ଆରେ ହିଲୁର୍; ରାନ୍ତି ହୁଣ୍ଡାର୍ କାଜିଂ ଆସୁର୍ ହେଦାଂ ରଚ୍ନାତା; ହେୱାର୍ ମାଚା କିଜ଼ି ତା ଆଇନ୍ ଆରମ୍ କିତାର୍; ହେୱାନ୍ ତା କାତିତ ବାନା ରଚ୍ଚାନ୍ । ଏ ତର୍ସିସ୍ନି ଜାଜ୍ ସବୁ, ତରହର୍ କିୟାଟ୍, ଇନାକିଦେଂକି ମି ଦେହାନି ଡାଣ୍ଡ୍କାତି କୁଟ୍କୁଟା ଆତାତ୍ । ହେ ଦିନା ଇ ଲାକେ ଗିଟାତାତ୍ ଜେ, ର ରାଜାତି ଆଦିକାର୍ ସମୁ ଇସାପ୍ରେ ସର ସତୁରି ବାର୍ହୁ ପାତେକ୍ ମେଙ୍ଗ୍ନାତ୍; ସତୁରି ବାର୍ହୁ ୱିସ୍ତି ପାଚେ ଦାରିୟାର୍ତି କେର୍କଣ୍ ଇସାପ୍ରେ ସର କାଜିଂ ଗିଟାନାତ୍ । ଏ ବୁଲାତି ଦାରୁଲା, ଗମଣ୍ ଅଜ଼଼ି ଗାଡ଼୍ ବୁଲା; ଏପ୍ ଇନେସ୍କି ଏନ୍ ଇନେସ୍ ମାନ୍ତ ଇଟ୍ୟା ଆନାୟ୍, ବାଜା ଇହାଟ୍, ବେସି କେର୍କଣ୍ କେରାଟ୍ । ଆରେ, ସତୁରି ବାର୍ହୁ ୱିସ୍ତି ପାଚେ ନିତ୍ରେମାପ୍ରୁ ସରନି ଡ଼଼ୁକ୍ତାକା ଡେକ୍ନାର୍, ତାପାଚେ ହେୱାନ୍ ଜାର୍ ଆଗେ କାମାୟକିଜ଼଼ିମାଚାତ୍ ନଂ କିନାତ୍, ଆରେ, ମେଦ୍ନି ସବୁ ପୁର୍ତିନି ସବୁ ରାଜି ଲାହାଙ୍ଗ୍ ଦାରୁଲା କାମାୟ୍ କିନାତ୍ । ଆରେ, ତା ବେପାର୍ ଆରି ବାଡ଼ା ନିତ୍ରେମାପ୍ରୁତି ଇସାପ୍ରେ ପୁଇପୁୟା ଆନାତ୍; ହେଦାଂ ଟୁଣ୍ଡିତ ଇଟ୍ୟାଆଉତ୍ କି ରୁଣ୍ଡାୟ୍ କିୟା ଆଉତ୍; ଇନାକିଦେଂକି ଇମ୍ଣାକାର୍ ନିତ୍ରେମାପ୍ରୁତି ମୁମ୍ଦ ବାହା କିନାର୍, ହେୱାର୍ତି ତିନାକା ସାରି ଆନାତ୍ ଆରି ୱିଜ୍ୱି କାଡ଼୍ ହେନ୍ଦ୍ରାକାଜିଂ ତା ବେପାର୍ ଆନାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.