Pengo Bible
ଆଦି 6
ମାନାୟ୍ତି ବାନ୍ୟା କାମାୟ୍
ଇଲାକେ ଏଚେକାଡ଼୍ଦ ପୁର୍ତିତ ମାନାୟ୍ତି ଲମର୍ ବାଡାଦେଂ ଲାଗାତାତ୍ ଆରି ହେୱାର୍ତି ହେନି ଗାଡ଼୍ଚେକ୍ ଜଲମ୍ ଆତିକ୍; ହେଏଚେକାଡ଼୍ଦ ଇସ୍ୱର୍ତି ମାଜ଼ିର୍ ମାନାୟ୍ ଗାଡ଼୍ଚେକାଂ ହଲ୍ନାକାଦିଂ ହୁଡ଼୍ଜି, ହେୱାର୍ ଇନ୍ଦେଲିଙ୍ଗ୍ ମାନ୍ କିତାର୍, ହେୱାର୍ ୱିଜ଼େକ୍ ବିତ୍ରେତାଂ ବିବା କିଦେଂ ଲାଗାତାର୍ । ହେବେ ନିତ୍ରେମାପ୍ରୁ ଇଚାନ୍, “ମା ୱାସ୍କି ମାନାୟ୍ ଜପି ସବୁୱେଡ଼ାଙ୍ଗ୍ ମାନ୍ଗୁତ୍, ଇନେକିଦେଂକି ହେୱାର୍ତି ବିପତ୍ ହାସ୍ଦ ହେୱାର୍ ଜେଇ ମତର୍; ଇଦାଂକାଜିଂ ହେୱାର୍ତି ବୟଁସ୍ ସହେ କଡ଼େ ବାର୍ହୁ ଆନାତ୍ ।” ହେ ସମୁତ ପୁର୍ତିତ ବେସି ବିରର୍ ମାଚାର୍; ଆରେ, ତାପାଚେ ଇସ୍ୱର୍ତି ମାଜ଼ିର୍ ମାନାୟ୍ତି ଗାଡ଼୍ଚେକାଂ ମେହାତାର୍, ହେୱାର୍ତାଂ ହିମ୍ଣାୱାକ୍ଡ଼ା ଆତାର୍; ହେୱାର୍ ପା ଆଗେନି ବେସି ବିରର୍ ମାଚାର୍ ।
ଇଦାଂପାଚେ ନିତ୍ରେମାପ୍ରୁ ହୁଡ଼୍ତାନ୍ ଜେ, ପୁର୍ତିତ ମାନାୟ୍ତି ଚାପ୍କାର୍ ଏଚେକ୍ ଗାଜା, ଆରେ ତାତି ମାନ୍ନି ବାବ୍ନାନି ୱିଜ଼ୁ ହାନ୍ଦାଇ ଏଚେକ୍ ବାନ୍ୟା ମତର୍ । ଇଦାଂପାଚେ ନିତ୍ରେମାପ୍ରୁ ପୁର୍ତିତ ମାନାୟ୍ତିଂ ରଚ୍ଚି କାଜିଂ ଏତୁ କିଜ଼ି ମାନ୍ତ ଦୁକ୍ କିତାନ୍ । ହେବେ ନିତ୍ରେମାପ୍ରୁ ଇଚାନ୍, “ଆପ୍ ବୁମିତାଂ ଜାର୍ ଉବ୍ଜାୟ୍ କିତି ମାନାୟ୍ତିଂ, ଆରେ ମାନାୟ୍ ଲାହାଙ୍ଗ୍ ପସୁ ଆରି ପଟତାଂନି ଜାତ୍ ଆରି ହାରୁ ପଟିକାଂ ବୁଡାୟ୍ କିନାସ୍; ଇନେକିଦେଂକି ଆପ୍ ହେୱାରିଂ ରଚ୍ଚିଲେ ମାଦାଂ ମାନ୍ତ ଏତ୍ ୱାନାତା ।” ମତର୍ ନହ ନିତ୍ରେମାପ୍ରୁତି କାଣ୍ଗାତ ଉପ୍କାର୍ ପାୟାତାନ୍ ।
ନହତି କାତା
ନହତି ଲାତ୍ରାର୍ ଏଲେଙ୍ଗ୍ । ନହ ଜାର୍ ଇ ସମୁତ ମାନାୟାର୍ ବିତ୍ରେ ଦାର୍ମି ହୁଦାର୍ ଲଗୁ ମାଚାନ୍; ନହ ଇସ୍ୱର୍ତି ଲାହାଙ୍ଗ୍ ବୁଲାଚାଲା କିତାନ୍ । ନହ, ସେମ ଆରି ହାମ ଆରି ଜେପତ୍, ଇ ତିନି ମାଜ଼ିରିଂ ଜଲମ୍ କିତାନ୍ । ହେ ସମୁତ ପୁର୍ତିନି ଇସ୍ୱର୍ତି ମୁମ୍ଦ ବୁଡାନାକା ମାଚାତ୍ ଆରି ପୁର୍ତିନି ବାନ୍ୟା କାମାୟ୍ତ ବାର୍ତି ମାଚାତ୍ । ଆରେ, ଇସ୍ୱର୍ ପୁର୍ତିତ ଇଟ୍କାଡ଼୍ କିଜ଼ି ହୁଡ଼୍ତାନ୍ ଜେ, ହେଦାଂ ବୁଡା ଆତାତ୍ନା; ଇନେକିଦେଂକି ପୁର୍ତିତ ସବୁ ପାରାଣିଂ ବାନ୍ୟାତିକ୍ନା ।
ହେବେ ଇସ୍ୱର୍ ନହଙ୍ଗ୍ ଇଚାନ୍, “ମା ମୁମ୍ଦ ୱିଜ଼ୁ ପାରାଣିଙ୍ଗ୍ନି ୱିସ୍ନି କାଡ଼୍ ଏକାୱାତାତ୍; ଇନେକିଦେଂକି ହେୱାର୍ତି ହୁକେ ପୁର୍ତି ପାପ୍ତ ବାର୍ତି ଆତାତ୍ନା; ଆରେ, ହୁଡ଼ା, ଆପ୍ ପୁର୍ତି ଲାହାଙ୍ଗ୍ ହେୱାରିଂ ବୁଡାୟ୍ କିନାସ୍ । ଏପେଙ୍ଗ୍ ଜାର୍ କାଜିଂ ଦେବଦାରୁ ଜାତିନି ମାର୍ନି ୱେସ୍କୁତାଂ ର ଜାଜ୍ ରଚାଟ୍; ହେ ବିତ୍ରେ ବାର୍ବିନି ବାକ୍ରାଙ୍ଗ୍ ରଚ୍ଚି ହେ ବିତ୍ରେ ଆରି ବାର୍ତ ଲାକ୍ ହୁକେ ଡାଚାଟ୍ । ହେଦାଂ ଇ ବାନି ରଚ୍ନାୟ୍; ଲାମାତିଂ ତିନିସ ଆତ୍, ଅହାର୍ତିଂ ପଚାସ୍ ଆତ୍, ଉଚାତିଂ ତିରିସ୍ ଆତ୍ ଆନାତ୍ । ଜପିତାଂ ର ଆତ୍ ପିସ୍ତି ଜାଡ଼୍କା କିନାୟ୍, ଆରେ ହେଲାଗାଂ ଦୁୱାର୍ ଇଟ୍ନାୟ୍; ଆରେ ହେବେନି ପର୍ତୁମ୍, ଦୁଇ ଆରି ତିନ୍ନି ପାଉଜ୍ ରଚ୍ନାୟ୍ ।
ଆରେ, ଆକାସ୍ ତାରେନ୍ ଜିବୁନ୍ଦୁକା ବେସି ଏଚେକ୍ ଜାତ୍ଜାଗାଡ଼୍ ମାନିଙ୍ଗ୍, ହେସବୁ ବୁଡାୟ୍ କିନି କାଜିଂ, ଆପ୍, ହୁଡ଼ା, ଆପ୍ ପୁର୍ତି ଜପି ଏସ୍ କ୍ଡୁକ୍ନାସ୍, ହେବେ ପୁର୍ତିନି ୱିଜ଼ୁ ପାରାଣିଙ୍ଗ୍ ପାରାଣ୍ ପିହ୍ନିକ୍ । ମତର୍ ଆପ୍ ମି ଲାହାଙ୍ଗ୍ ଜାର୍ ନିୟମ୍ ତିର୍ କିନାସ୍; ହେବେ ଏପେଙ୍ଗ୍ ଜାର୍ ହିମ୍ଣାକାଂ ଆରି ଡକ୍ରିଙ୍ଗ୍ ଆରି କଡ଼ିୟାକାଂ ରଚେ ଅସି ହାଲ୍ଜି ଜାଜ୍ତ ହଣାଦେର୍ । ଆରେ, ପାରାଣ୍ ରାକ୍ୟା କିନି କାଜିଂ ସବୁବାନି ଜାତ୍କୁକାଂ ର ର ଜୁଡ଼ି ଜାର୍ ଲାହାଂ ଅଜ଼ି ଜାଜ୍ତ ହଣାଦେର୍ । ସବୁ ବାନି ପଟିଙ୍ଗ୍ ଆରି ସବୁ ବାନି ପସୁ ଆରି ସବୁ ବାନି ପଟତାଂତାଙ୍ଗ୍ନି ଜାତ୍ ଜାଣ୍କେ ଜାତି ଇସାପ୍ରେ ର ର ଜୁଡ଼ି ଜିବୁନ୍ ରାକ୍ୟା କାଜିଂ ମି ଲାଗାଂ ୱାନିକ୍ । ଆରେ ଏପେଙ୍ଗ୍ ଜାର୍ତି ଆରି ହେୱେକ୍ତି କାଦି କାଜିଂ ସବୁ ବାନି କାଦିସବୁ ତାସି ଜାର୍ ଲାଗାଂ ରୁଣ୍ଡାୟ୍ କିନାୟ୍ ।” ହେବେ ନହ ହେ ଲାକେ କିତାନ୍; ଇସ୍ୱର୍ତି ବଲ୍ ଇସାପ୍ରେ ହେୱାନ୍ ୱିଜ଼ୁ କାମାୟ୍ କିତାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.