Pengo Bible
ଆଦି 5
ଆଦମ୍ତି ଲାତ୍ରା
ଆଦମ୍ତି ଲାତ୍ରାନି କାତା ଏଲେଙ୍ଗ୍ । ଇମ୍ଣି ଦିନ୍ ଇସ୍ୱର୍ ମାନାୟ୍ତିଂ ଉପ୍ଜାଣ୍ କିତାନ୍, ହେ ଦିନ୍ ଇସ୍ୱର୍ତି ଲାକେ ହେୱାନ୍ ତାଙ୍ଗେଙ୍ଗ୍ ରଚ୍ଚାନ୍; ଡକ୍ରା ଆରି ଡକ୍ରି କିଜ଼ି ହେୱାନ୍ ହେୱାରିଙ୍ଗ୍ ଉପ୍ଜାଣ୍ କିତାନ୍: ଆରେ ହେୱାର୍ ଉପ୍ଜାଣ୍ ଆନି ଦିନା ହେୱାରିଙ୍ଗ୍ ଆର୍ସିବାଦ୍ କିଜ଼ି ଆଦମ୍ (ମାନାୟ୍) ତର୍ ହିତାନ୍ । ଆଦମ୍ ସହେ ତିରିସ୍ ବାର୍ହୁ ବୟଁସ୍ତ ତା ଲାକେ ଆରି ତା ଜେକାତ ର କାଡ଼୍ଦେ ଜଲମ୍ କିଜ଼ି ତା ତର୍ ସେତ ହିତାନ୍ । ସେତତି ଜଲମ୍ ପାଚେ ଆଦମ୍ ଆଟ୍ସହ ବାର୍ହୁ ଜିଜ଼ି ଆରେ ହିମ୍ଣାୱାକ୍ଡ଼ା ଜଲମ୍ କିତାନ୍ । ଆଦମ୍ତି ବୟଁସ୍ ସବୁତିଂ ନଅସ ତିରିସ୍ ବାର୍ହୁ ମାଚାତ୍; ତାପାଚେ ହେୱାନ୍ ହାତାନ୍ ।
ସେତ ସହେ ପାଞ୍ଚ୍ ବାର୍ହୁ ବୟଁସ୍ତ ଇନସତିଂ ଜଲମ୍ କିତାନ୍; ଇନସତି ଜଲମ୍ ପାଚେ ସେତ ଆଟ୍ସ ସାତ୍ ବାର୍ହୁ ଜିଜ଼ି ଆରେ ହିମ୍ଣାୱାକ୍ଡ଼ାକାଂ ଜଲମ୍ କିତାନ୍ । ସେତତି ବୟଁସ୍ ସବୁତିଂ ନଅସ ବାର ବାର୍ହୁ ମାଚାତ୍; ପାଚେ ହେୱାନ୍ ହାତାନ୍ ।
ଇନସ ନବେ ବାର୍ହୁ ବୟଁସ୍ତ କୟିନତି ଜଲମ୍ କିତାନ୍: ଆରେ, କୟିନାନତି ଜଲମ୍ ପାଚେ ଇନସ ଆଟ୍ସ ପନ୍ଦ୍ର ବାର୍ହୁ ଜିଜ଼ି ଆରେ ହିମ୍ଣାୱାକ୍ଡ଼ାକାଂ ଗାଟା ଆତାନ୍; ଇନସତି ବୟଁସ୍ ସବୁତାଂ ନଅସ ପାଞ୍ଚ୍ ବାର୍ହୁ ମାଚାତ୍; ପାଚେ ହେୱାନ୍ ହାତାନ୍ ।
କୟିନାନ ସତୁରି ବାର୍ହୁ ବୟଁସ୍ତ ମହଲଲେଲତିଂ ଜଲମ୍ କିତାନ୍; ମହଲଲେଲ ଜଲମ୍ ପାଚେ କୟିନ ଆଟ୍ସ ଚାଲିସ୍ ବାର୍ହୁ ଜିଜ଼ି ଆରେ ହିମ୍ଣାୱାକ୍ଡ଼ା ଗାଟା ଆତାନ୍; ଆରେ କୟିନାନତି ବୟଁସ୍ ସବୁତାଂ ନଅସ ଦସ୍ ବାର୍ହୁ ମାଚାତ୍; ପାଚେ ହେୱାନ୍ ହାତାନ୍ ।
ମହଲଲେଲ ସାଟେ ପାଞ୍ଚ୍ ବାର୍ହୁ ବୟଁସ୍ତ ଜେରଦତିଂ ଜଲମ୍ କିତାନ୍; ଜେରଦ ଜଲମ୍ ଆତି ପାଚେ ମହଲଲେଲ ଆଟ୍ସ ତିରିସ୍ ବାର୍ହୁ ଜିଜ଼ି ଆରେ ହିମ୍ଣାୱାକ୍ଡ଼ାକାଂ ଜଲମ୍ କିତାନ୍; ମହଲଲେଲତି ବୟଁସ୍ ସବୁତାଂ ଆଟ୍ସ ନବେ ପାଞ୍ଚ୍ ବାର୍ହୁ ମାଚାତ୍: ପାଚେ ହେୱାନ୍ ହାତାନ୍ ।
ଜେରଦ ସହେ ସାଟେ ଦୁଇ ବାର୍ହୁ ବୟଁସ୍ତ ହନକତିଂ ଜଲମ୍ କିତାନ୍; ହନକତି ଜଲମ୍ ପାଚେ ଜେରଦ ଆଟ୍ସ ବାର୍ହୁ ଜିଜ଼ି ଆରେ ହିମ୍ଣାୱାକ୍ଡ଼ା ଜଲମ୍ କିତାନ୍; ଜେରଦତି ବୟଁସ୍ ସବୁତାଂ ନଅସ ସାଟେ ଦୁଇ ବାର୍ହୁ ମାଚାତ୍; ପାଚେ ହେୱାନ୍ ହାତାନ୍ ।
ହନକ ସାଟେ ପାଞ୍ଚ୍ ବାର୍ହୁ ବୟଁସ୍ତ ମତୁସେଲହତିଂ ଜଲମ୍ କିତାନ୍; ମତୁସେଲହତି ଜଲମ୍ ପାଚେ ହନକ ତିନିସ ବାର୍ହୁ ପାତେକ୍ ଇସ୍ୱର୍ ଲାହାଙ୍ଗ୍ ବୁଲାଚାଲା କିତାନ୍, ହେୱାନ୍ ଆରେ ହିମ୍ଣାୱାକ୍ଡ଼ା ଜଲମ୍ କିତାନ୍; ହନକତି ବୟଁସ୍ ସବୁତାଂ ତିନିସ ସାଟେ ପାଞ୍ଚ୍ ବାର୍ହୁ ଜିଜ଼ି ମାଚାନ୍ । ହନକ ଇସ୍ୱର୍ ଲାହାଙ୍ଗ୍ ବୁଲାଚାଲା କିତାନ୍; ଆରେ ହେୱାନ୍ ମାୟାତାନ୍; ଇନେକିଦେଂକି ଇସ୍ୱର୍ ହେୱାନିଂ ଇଡ଼୍ତାନ୍ ।
ମତୁସେଲହ ସହେ ଅସେ ସାତ୍ ବାର୍ହୁ ବୟଁସ୍ତ ଲେମକତିଂ ଗାଟାତାନ୍; ଲେମକତି ଜଲମ୍ ପାଚେ ମତୁସେଲହ ସାତ୍ସ ଅସେ ଦୁଇ ବାର୍ହୁ ଜିଜ଼ି ଆରେ ହିମ୍ଣାୱାକ୍ଡ଼ାକାଂ ଜଲମ୍ କିତାନ୍; ମତୁସେଲହତି ବୟଁସ୍ ସବୁତାଂ ନଅସ ସାଟେନ ବାର୍ହୁ ମାଚାତ୍; ପାଚେ ହେୱାନ୍ ହାତାନ୍ ।
ଲେମକ ସହେ ଅସେ ଦୁଇ ବାର୍ହୁ ବୟଁସ୍ତ ର ହିମ୍ଣା ଗାଟାତାନ୍, ଆରି ତା ତର୍ ନହ ହିତାନ୍ ଇନେକିଦେଂକି ହେୱାନ୍ ଇଚାନ୍, ନିତ୍ରେମାପ୍ରୁତି ହୁକେ ସାଇପ୍ ଆତି ବୁଇଁତ ମା କସ୍ଟ ଆରି କେଇନି ଦୁକ୍ ବିସ୍ରେ ଇୱାନ୍ ମାଦାଂ ଦୁକ୍ସାରାୟ୍ ଉବ୍ଜାୟ୍ କିନାନ୍ । ନହତି ଜଲମ୍ ପାଚେ ଲେମକ ପାଞ୍ଚ୍ସ ନବେପାଞ୍ଚ୍ ବାର୍ହୁ ଜିଜ଼ି ଆରେ ହିମ୍ଣାୱାକ୍ଡ଼ାକାଂ ଗାଟାତାନ୍; ହେୱାନ୍ତି ବୟଁସ୍ ସବୁତାଂ ସାତ୍ସ ସତୁରିସାତ୍ ବାର୍ହୁ ମାଚାତ୍; ପାଚେ ଲେମକ ହାତାନ୍ ।
ଆରେ ନହଁଙ୍ଗ୍ତିଂ ପାଞ୍ଚ୍ସ ବାର୍ହୁ ବୟଁସ୍ ଆତାତ୍; ଆରେ ନହ, ସେମ ଆରି ହାମ ଆରି ଜେପତ୍ତିଂ ଗାଟାତାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.