Pengo Bible
ଆଦି 7
ଏସ୍ କ୍ଡୁକ୍ନାକା
ଇଦାଂପାଚେ ନିତ୍ରେମାପ୍ରୁ ନହଂ ଇଚାନ୍, “ଏପ୍ ସବୁକୁଟୁମ୍ ଜାଜ୍ତ ହଣାଟ୍; ଇନେକିଦେଂକି ଇ କାଡ଼୍ନି ଲକୁ ବିତ୍ରେ ଆପ୍ ଜାର୍ ମୁମ୍ଦ ନିଂ ଦାର୍ମି ହୁଡ଼୍ଦାତାପ୍ନା । ଆରେ ପୁର୍ତିତ ଲାତ୍ରା ରାକ୍ୟା କିଦେଂ କାଜିଂ ଜାଣ୍କେ ସକଟ୍ ପସୁଜାତିନି ସାତ୍ ସାତ୍ ଜୁଡ଼ି ଆରି ଜାଣ୍କେ ବିଟାଡ଼୍ ପସୁ ଜାତିନି ର ର ଜୁଡ଼ି; ସବୁ ବାନି ପଟିଙ୍ଗ୍ଜାତିନି ସାତ୍ ସାତ୍ ଜୁଡ଼ି ଜାର୍ ହାଙ୍ଗ୍ଦ ଅୱା ଇନେସ୍କି ଆରେରଗ ଇ ପୁର୍ତିତ ବାଡାନି କାଜିଂ ସବୁ ବାନି ପଟିଂ ଆରି ପାରାଣିଂ ଜିଜ଼ି ମାନେକ୍ । ଇନେକିଦେଂକି ସାତ୍ ଦିନ୍ ପାଚେ ଆପ୍ ଚାଲିସ୍ ୱେଡ଼ା ଚାଲିସ୍ ନାଣା ପୁର୍ତିତ ବାର୍ହା କିଇକିଜ଼ି ପୁର୍ତିନି ମା ରଚ୍ଚି ୱିଜ଼ୁ ପାରାଣିକାଂ ବୁଡାୟ୍ କିନାପ୍ ।” ନହ ନିତ୍ରେମାପ୍ରୁତି ବଲ୍ ଇସାବ୍ରେ ସବୁ କାମାୟ୍ କିତାନ୍ । ନହତି ଚସ ବାର୍ହୁ ବୟଁସ୍ତ ପୁର୍ତି ଜପି ଏସ୍କ୍ଡୁକ୍ନାକା ଆତାତ୍ । ହେବେ ଏସ୍ବଡ଼ାନାକାତାଂ ରାକ୍ୟା ପାୟାନି କାଜିଂ ନହ ଆରି ତା ଡକ୍ରି ଆରି ହିମ୍ଣାଙ୍ଗ୍ ଆରି କଡ଼୍ୟାଗାଚ୍କୁ ଜାଜ୍ତ ହଟାର୍ । ଆରେ ନହତି କାଜିଂ ଇସ୍ୱର୍ତି ବଲ୍ ଇସାବ୍ରେ ସକଟ୍ ଆରି ବିଟାଡ଼୍ ପସୁ ପଟିକାଂ ଆରି ବୁୟ୍ହାରାନି ପଟତାଂନି ଜାତ୍କୁକାଂ ଜଡ଼ା ଜଡ଼ା ଆଜ଼ି, ହେୱାଙ୍ଗ୍ ଜୁଡ଼ି ଜୁଡ଼ି ଆଜ଼଼ି ଆଣ୍ଡ୍ରା ଆରି କଗ୍ଲେ ପର୍ମେସ୍ୱର୍ତି ଇସାବ୍ରେ ନହ ଲାଗେ ହାଲ୍ଜି ଜାଜ୍ତ ହଟିକ୍ । ଆରେ ହେ ସାତ୍ ଦିନ୍ ପାଚେ ପୁର୍ତିତ ରାଜିବୁଡାଦେଂ ଆରମ୍ ଆତାତ୍ ।
ଏଚେକାଡ଼୍ଦ ନହତି ବୟଁସ୍ନି ଚସ ବାର୍ହୁ ଆଜ଼ି ମାଚାତ୍, ରି ମାସ୍ନି ସତ୍ର ଦିନ୍ତ ଗାଜା ହାମ୍ଦୁର୍ନି ୱିଜ଼ୁ କନାଂ ଡ୍ରିଙ୍ଗ୍ତିକ୍, ଆରେ, ଆକାସ୍ବାହାନି ଦୁୱେର୍ ସବୁ ମେଲା ଆତାତ୍ । ତାପାଚେ ଚାଲିସ୍ ୱେଡ଼ା ଚାଲିସ୍ ନାଣା ପୁର୍ତିତ ବାର୍ହା ଆତାତ୍ । ହେ ଦିନ୍ତ ନହ, ଆରେ, ସେମ ଆରି ହାମ ଆରି ଜେପତ୍ ତର୍ନି ନହତି ମାଜ଼ିର୍, ଆରେ ହେୱାର୍ ଲାହାଂ ନହତି ଡକ୍ରି ଆରି ତିନ୍ ମାଜ଼ିକଡ଼ିୟା ଜାଜ୍ତ ହଟାର୍ । ଆରେ, ସବୁ ଜାତିନି ନାଟିକିଂ ଆରି ରାନ୍ତି ପସୁ ଆରି ସବୁ ଜାତିନି ପଟତାଂନି ଆରି ସବୁ ଜାତିନି ବୁୟଁତାଙ୍ଗ୍ନିକିଂ ଆରି ହାରୁ ପଟି ତା ଲାହାଂ ହଟିକ୍; ଇଚିସ୍, ପାରାଣ୍ମାନି ସବୁବାନି ଜିନିଜାତ୍ ଜୁଡ଼ି ଜୁଡ଼ି ଆଜ଼ି ନହ ଲାଗାୟ୍ ହାଲ୍ଜି ଜାଜ୍ତ ହଟିକ୍ । ଇସ୍ୱର୍ତି ବଲ୍ ଇସାପ୍ରେ ସବୁବାନି ପାରାଣିଂ ର ର ଜୁଡ଼ିସାପେ ହଟାର୍; ହେବେ ନିତ୍ରେମାପ୍ରୁ ହେବେନି ଦୁୱେର୍ ଗେସ୍ତାର୍ ।
ଇଦାଂପାଚେ ଚାଲିସ୍ ଦିନ୍ ପାତେକ୍ ପୁର୍ତିତ ଏସ୍ବଡ଼ା ଆତାତ୍; ଆରେ, ଏଜ଼ୁଙ୍ଗ୍ ବାଡା ଆଉ ଆଉ ଜାଜ୍ ମେଦ୍ନି ପିସ୍ତି ବଡ଼ାଜ଼ି ନିଂତାତ୍ । ଆରେ ପୁର୍ତିତ ଏଜ଼ୁଙ୍ଗ୍ ବେସି ଆଜ଼ି ଜବର୍ ବାଡାତିଲେ ଜାଜ୍ ଏସ୍ ଜପି କେଡ଼ାତାତ୍ । ପୁର୍ତି ଜପି ଏସ୍ ଜବର୍ ବାଡାସି ଆକାସ୍ ତାରେନ୍ନି ସବୁ ପାନ୍ତି ମାଡ଼ିଙ୍ଗ୍ ମୁଞ୍ଜି ହାଚିକ୍ । ତା ଜପି ପନ୍ଦ୍ର ଆତ୍ ପାତେକ୍ ଏଜ଼ୁଙ୍ଗ୍ ନିଂତିକ୍; ହେବେ ମାଡ଼ିଙ୍ଗ୍ ମୁଞ୍ଜି ହାଚିକ୍ । ଲାଗିଂ ୱିଜ଼ୁ ବୁୟଁତାଙ୍ଗ୍ନି ପାରାଣିଙ୍ଗ୍, ଇଚିସ୍, ପଟିଂ, ନାଟିକିଂ ଆରି ରାନ୍ତି ପସୁ ଆରି ପୁର୍ତିନି ତାଂନି ପଟତାଂନି ଜାତ୍ ଆରି ଜାଣ୍କେ ମାନାୟ୍ ହାତିକ୍, ଆରେ ୱାଚ୍ଚି ବୁଇଁତ ଏଚେକ୍ ପାରାଣିଙ୍ଗ୍ନି ମୁଙ୍ଗେଲ୍ତ ପାରାଣ୍ ମାଚାତ୍, ୱିଜ଼ୁ ହାତିକ୍ । ଇଲାକେ ପୁର୍ତିନି ୱିଜ଼ୁ ପାରାଣିଙ୍ଗ୍ ବୁଡାତିକ୍, ଇଚିସ୍, ମାନାୟ୍, ପସୁ, ପଟତାଂନି ଜାତ୍, ହାରୁ ପଟିଂ, ୱିଜ଼ୁ ପୁର୍ତିତାଂ ବୁଡାତିକ୍; କେବଲ୍ ନହ ଆରି ଜାଜ୍ବାହାନି ତା ହାଙ୍ଗ୍ଦାକାର୍ ୱିଜ଼ାର୍ ଜିତାର୍ । ଇଲାକେ ପୁର୍ତି ସଏ ପଚାସ୍ ଦିନ୍ ପାତେକ୍ ଏଜ଼ୁକାଂ ମୁଞ୍ଜି ମାନ୍ଗାତାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.