Pengo Bible
ଆଦି 35
ବୈତଲ୍ତ ଇସ୍ୱର୍ ଜାକ୍ବଙ୍ଗ୍ ଆସିର୍ବାଦ୍
ଇଦାଂପାଚେ ପର୍ମେସ୍ୱର୍ ଜାକୁବତିଂ ଇଚାନ୍, “ଏନ୍ ନିଙ୍ଗ୍ଜି ବୈତେଲ୍ତ ହାଲ୍ଜି ହେବେ ବାହା କିଆ; ଆରେ, ନି ଟଣ୍ଡେନ୍ ଏସାଉ ମୁମ୍ଦାଂ ହନ୍ନି ୱେଡ଼ାଲିଂ ଇମ୍ଣି ଇସ୍ୱର୍ ଚଞ୍ଜ୍ଆଜ଼ି ମାନ୍ଞ୍ଚାନ୍, ହେୱାନ୍ତି ଉଦେସ୍ତ ଗାର୍ଣିପିଣ୍ଡା ରଚା ।”
ତାପାଚେ ଜାକୁବ ତା ଲକୁରିଂ ଆରି ହାଂଦାକାରିଂ ଇଚାନ୍, “ମି ଲାଗାୟ୍ ଇମ୍ଣି ସବୁ ବିଦେସ୍ନି ପେନ୍କୁ ମାନିକ୍, ହେୱାକାଂ ଦେହା କିୟାଟ୍, ଜାର୍ତି ସକଟ୍ କିୟାଟ୍, ଆରେ, ଜାର୍ତି ହେନ୍ଦ୍ରାଂ ବାଦ୍ଲାୟ୍ କିୟାଟ୍ । ଆରେ, ୱାଡ, ଆସେଙ୍ଗ୍ ନିଂଜି ବୈତେଲ୍ତ ହାନାସ୍; ଇମ୍ଣି ଇସ୍ୱର୍ ନା ଦୁକ୍ନି ଦିନ୍ତ ନା ପାର୍ତନାନି ଉତର୍ ହିତ୍ତାନ୍, ଆରି ନା ହାନି ହାଜ଼ିତ ନା ସାଇଜ ଆଜ଼ି ମାଚାନ୍, ହେୱାନ୍ତି ଉଦେସ୍ତ ଆନ୍ ହେ ବାହାତ ର ଗାର୍ଣିବେଦି ରଚ୍ନାଂ ।” ହେବେ ହେୱାର୍ ଜାର୍ତି ଲାଗାଂ ବିଦେସ୍ନି ପେନ୍କୁ ଆରି କିତୁଲ୍ମୁଦ୍ରା ସବୁ ଅଜ଼ି ଜାକୁବତିଂ ହିତାନ୍, ଆରେ, ହେୱାନ୍ ହେଦାଂ ସବୁ ଅଜ଼ି ସିକିମ୍ ଲାଗାଂ ଆଲନ୍ ମାର୍ ତାରେନ୍ ମୁଚ୍ଚାର୍ ।
ତାପାଚେ ହେୱାର୍ ହାଚାର୍; ହେଏଚେକାଡ଼୍ଦ ଚାର୍ବେଣ୍ତି ଗାଡ଼୍ଦ ଇସ୍ୱର୍ତାଂ ପାଣ୍ଡ୍ରୁ ଇକିତିଲେ ହେୱାର୍ ଜାକୁବତି ମାଜ଼ିରିଂ ପେଜ଼୍ୱାତାର୍ । ଇଦାଂପାଚେ ଜାକୁବ ଆରି ହେୱାନ୍ତି ହାଂଦାକାର୍ କିଣାନ୍ ଦେସ୍ତ ଲୁସ୍ତ, ଇଚିସ୍, ବୈତେଲ୍ତ ଏକାତାର୍ । ହେବେ ହେୱାନ୍ ର ଗାର୍ଣିପିଣ୍ଡା ରଚ୍ଚି ହେ ବାହାନି ତର୍ ଏଲ-ବୈତେଲ୍ ଇଡ଼୍ତାନ୍; ଇନେକିଦେଂକି ଜାକ୍ବ ଟଣ୍ଡେନ୍ ପାଣ୍ଡ୍ରୁତିଂ ହନ୍ନି ୱେଡ଼ାଲିଂ ଇସ୍ୱର୍ ହେ ବାହାତ ତାଂ ଦର୍ସନ୍1 ହିଜ଼ି ମାଚାତ୍ । ଆରେ ହେ ବାହାତ ରିବିକାତି ଦବରା ତର୍ନି ଉଜ୍କିତାକାତି ହାକି ଆତିଲେ, ବୈତେଲ୍ନି ମାଦି ଆଲନ୍ ମାର୍ ତାରେନ୍ ତା କବର୍ ହିତାନ୍, ଆରେ, ହେ ବାହାନି ତର୍ ଅଲନ୍-ବାକୁତ୍ ଆତାତ୍ ।
ଇଦାଂପାଚେ ଜାକୁବ ପଦନ୍ ଅରାମିୟତ ତାଂ ମାସ୍ଦି ୱାତିଲେ, ଇସ୍ୱର୍ ଆରେରଗ ଚଜ୍ୟାଜ଼ି ତାଂ ଆର୍ସିବାଦ୍ କିତାନ୍ । ଆରେ, ଇସ୍ୱର୍ ତାଂ ଇଚାନ୍, “ନି ତର୍ ଜାକ୍ବ; ମତର୍ ନି ତର୍ ଆରେ ଜାକୁବ ଆଉତ୍, ଆରେ ନି ତର୍ ଇସ୍ରାଏଲ୍ ଆନାତ୍; ଆରେ ହେୱାନ୍ ତା ତର୍ ଇସ୍ରାଏଲ୍ ଇଡ଼୍ତାତ୍ ।” ଇସ୍ୱର୍ ତାଙ୍ଗେଙ୍ଗ୍ ଆରେ ଇଚାନ୍, “ଆପ୍ ୱିଜ଼େତିଂ ସାକ୍ତିକାଟି ଇସ୍ୱର୍; ଏନ୍ ନାର୍ବାଡାଜ଼଼ି ଆରି ବେସିବଁସ୍ ଆଡୁ; ନି-ତାଂ ର କୁଟୁମ୍, ଆୱିତିସ୍ କୁଟୁମ୍ ମାନାୟାର୍ ଉବ୍ଜା ଆନାର୍, ଆରେ, ନି ଲାତ୍ରାତାଂ ରାଜାର୍ ଜଲମ୍ ଆନାର୍ । ଆରେ, ଆପ୍ ଅବ୍ରାହାମ୍ ଆରି ଇସ୍ହାକ୍ତିଂ ଇମ୍ଣି ଦେସ୍ ଦାନ୍ କିତାପ୍ନା, ହେ ଦେସ୍ ନିଙ୍ଗେଙ୍ଗ୍ ଆରି ନି ୱାନିଦିନ୍ତ ବଁସ୍ତିଂ ହିଦ୍ନାପ୍ ।” ହେ ବାହାତ ତା ଲାହାଂ ଏଲେଙ୍ଗ୍ କାତାବାର୍ତା କିଜ଼ି ପର୍ମେସ୍ୱର୍ ତା ଲାଗାୟ୍ତାଂ ହାଚାନ୍ । ହେବେ ଜାକୁବ ହେ କାତା ବାର୍ତାନି ବାହାତ ର ମୁଣ୍ଡା, ଇଚିସ୍, କାଲ୍ ମୁଣ୍ଡା ରଚ୍ଚି ତା ଜପି ଅଙ୍ଗୁର୍ରାସ୍ ଆକାତ୍ ପୁଜା କିତାନ୍ ଆରି ଚିକାଣ୍ ୱାକ୍ତାନ୍ । ଆରେ, ଜାକୁବ ଇସ୍ୱର୍ତି ଲାହାଂ କାତାବାର୍ତା ବାହାନି ତର୍ ବୈତେଲ୍ ଇଡ଼୍ତାନ୍ ।
ରାହେଲତି ହାକି
ଇଦାଂପାଚେ ହେୱାର୍ ବୈତେଲ୍ତାଂ ହାଚାର୍, ମତର୍ ଇପ୍ରାତାତ ଏକିନି କାଜିଂ ଅଲପ୍ ହାଜ଼ି ମାନୁ ମାନୁ ରାହେଲ୍ତି ଜଲମ୍କିନି ନନାକା ଆତାତ୍; ଆରେ, ତା ଜଲମ୍ କିନିତ ବେସି କସ୍ଟ ଆତାତ୍ । ଆରେ ଜଲମ୍କିନି ନନାକା ବେସି ଆତିଲେ, ପୁଣେଲ୍ବୁଡିୟା ତାଂ ଇଚାତ୍, “ପାଣ୍ଡ୍ରା ଆମା, ଏନ୍ ନଂଗୟ୍ ପା ମାଜ଼ି ଜଲମ୍ କିନାୟ୍ ।” ଆତିସ୍ପା ହେଦେଲ୍ ହାତାତ୍, ଆରେ, ପାରାଣ୍ ପିସ୍ତି ୱେଡ଼ାଲିଂ ମାଜ଼ିତି ତର୍ ବିନନି2 ଇଡ଼୍ତାତ୍; ମତର୍ ତା ଲାତ୍ରାହି ତା ତର୍ ବିନ୍ୟାମିନ୍3 ଇଡ଼୍ତାନ୍ । ଇ ବାନି ରାହେଲ୍ ହାତିଲେ, ଇପ୍ରାତା, ଇଚିସ୍, ବେତଲିହିମ୍ତ ହାନି ହାଜ଼ି ଲାଗାୟ୍ ତା ଦୁଗେର୍ କିତାର୍ । ଇଦାଂପାଚେ ଜାକୁବ ହେ ଦୁଗେର୍ ଜପି ର କମ୍ମୁଣ୍ଡା ରଚ୍ଚାନ୍; ରାହେଲ୍ ଦୁଗେର୍ନି ହେ ମୁଣ୍ଡା ନେଞ୍ଜେଙ୍ଗ୍ ପାତେକ୍ ମାନାତ୍ । ଇଦାଂପାଚେ ଇସ୍ରାଏଲ୍ ହେବେତାଂ ହାଲ୍ଜି ଏଦର୍ ଗାଡ଼୍ ନାସି ତା ଲାଗାୟ୍ ତୁମ୍ ରଚ୍ଚାନ୍ ।
ଜାକୁବତି ମାଜ଼ିର୍
(୧ ବଂସାବଲି ୨:୧-୨)
ହେ ଦେସ୍ତ ଇସ୍ରାଏଲ୍ ବାହା କିନି ୱେଡ଼ାଲିଂ ରୁବେନ୍ ହାଲ୍ଜି ତା ଲାତ୍ରାହିତି ବିଲ୍ହା ତର୍ନି ହାରୁଡକ୍ରି ଲାହାଂ ହୁଞ୍ଚାନ୍, ଆରେ, ଇସ୍ରାଏଲ୍ ହେଦାଂ ୱେଚାର୍ । ଜାକୁବତି ବାର୍ ଜାଣ୍ ମାଜ଼ିର୍ ମାଚାର୍; ହେୱାର୍ ବିତ୍ରେ ରୁବେନ୍ ଜାକୁବତି ପାଣ୍ୱା ମାଜ଼ି, ହେୱାନ୍, ଆରେ ସିମିୟନ ଆରି ଲେବି ଆରି ଜିହୁଦା ଆରି ଇସାକର୍ ଆରି ସବୁଲୁନ୍, ଇୱାର୍ ଲେୟାତି ହିମ୍ଣାଙ୍ଗ୍; ଆରେ, ଜସେପ୍ ଆରି ବିନ୍ୟାମିନ୍ ରାହେଲ୍ତି ହିମ୍ଣାଙ୍ଗ୍; ଆରେ, ଦାନ୍ ଆରି ନପ୍ତାଲି ରାହେଲ୍ତି ଆଡ଼ିୟାଣି ବିଲ୍ହାତି ମେହିର୍; ଆରେ ଗାଦ୍ ଆରି ଆସେର୍ ଲେୟାତି ଆଡ଼ିୟାଣି ସିଲ୍ପାତି ମେହିର୍ । ଜାକୁବତି ଇ ୱିଜ଼ାର୍ ମାଜ଼ିର୍ ପଦନ୍ ଅରାମିୟତ ତାକେ ଜଲମ୍ ଆଜ଼ିମାଚାର୍ ।
ଇସ୍ହାକ୍ତି ହାକି
ଇଦାଂପାଚେ କିରିୟତ୍ର୍ବ, ଇଚିସ୍, ହିବ୍ରଣ ଗାଡ଼୍ନି ଲାଗାୟ୍ ମମ୍ରି ତର୍ନି ଇମ୍ଣି ବାହାତ ଅବ୍ରାହାମ୍ ଆରି ଇସ୍ହାକ୍ ବାହା କିଜ଼ି ମାଚାର୍, ହେ ବାହାତ ଜାକୁବ ତା ଲାତ୍ରାହି ଇସ୍ହାକ୍ ଲାଗାୟ୍ ଏକାତାନ୍ । ଇସ୍ହାକ୍ତି ଆୟଁସ୍ନି ହମାନ୍ ନକଡ଼ି ବାର୍ହୁ ମାଚାତ୍ । ଇଦାଂପାଚେ ଇସ୍ହାକ୍ ବୁଡ଼୍ହି ଆରି ପୁରା ଆୟଁସ୍ ଆଜ଼ି ପାରାଣ୍ ପିସ୍ତିଲେ, ତା ଲକୁ ଲାଗାୟ୍ ମେହା ଆତାର୍; ଆରେ, ତା ମାଜ଼ିର୍ ଏସାଉ ଆରି ଜାକୁବ ତାଂ ମୁଚ୍ଚାର୍ ।
Source notes (3)
- Footnote କେଚ୍କଣ୍
- Footnote କସ୍ଟନି ହିମ୍ଣା
- Footnote ତିନା ବାଗାଂନି ହିମ୍ଣା
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.