Pengo Bible
ଆଦି 34
ଦିଣାଙ୍ଗ୍ ଆତ୍ଆନାକା
ଇଦାଂପାଚେ ଲେୟାତାଂ ଜଲମ୍ଆତି ଦିଣା ତର୍ନି ଜାକୁବତି ଗାଡ଼୍ହି ହେ ଦେସ୍ନି ଗାଚ୍କୁ ଲାହାଂ ହୁଡ଼୍ଦେଂ ହାଚାତ୍ । ତାପାଚେ ହିବିୟ ହମର୍ ତର୍ନି ଦେସ୍ନି ରାଜାତି ମାଜ଼ି ସିକିମ ତାଂ ହୁଡ଼୍ତାନ୍; ଆରେ, ତାଙ୍ଗେଙ୍ଗ୍ ଅଜ଼ି ତା ଲାହାଂ ହୁନ୍ଞ୍ଜି ତାଂ ନାହାୟ୍ କିତାନ୍ । ଆରେ ଜାକୁବତି ହେ ଗାଡ଼୍ ଦିଣାତାକେ ତା ମାନ୍ ସୁସ୍ତା ଆତିଲେ ହେୱାନ୍ ହେ ଜିପଲିଂ ଜିଉନଜ଼ି ତାଂ ୱାରିନି କାତା ଇଚାନ୍ । ଇଦାଂପାଚେ ସିକିମ ତା ଲାତ୍ରାହି ହମରତିଂ ଇଚାନ୍, “ଏନ୍ ଇ ଜିପଲି ଲାହାଂ ନାଂ ବିବା କିଜ଼ି ହିଦା ।”
ଇଦାଂପାଚେ ଜାକୁବ ତା ଗାଡ଼୍ହି ଦିଣାତିଂ ସିକିମ ବାନ୍ୟା କିଜ଼ିମାନି କାତା ୱେଚାନ୍; ହେ ସମୁତ ତା ମେହିର୍ ବାଟାତ ପସୁମାନ୍ଦା ଲାହାଂ ମାଚିଲେ ଜାକ୍ବ ହେୱାର୍ତି ୱାନି ପାତେକ୍ ଚିମ୍ରାଜ଼ି ମାଚାନ୍ । ଇ ବିତ୍ରେ ସିକିମତି ଲାତ୍ରାହି ହମର ଜାକୁବ ଲାହାଂ କାତାବାର୍ତା କିଦେଂ ହାଚାନ୍ । ଆରେ ଜାକୁବତି ହିମ୍ଣାଙ୍ଗ୍ ହେ କାବୁର୍ ପାୟାଜ଼ି ଜମିତାଂ ୱାଜ଼ି ମାଚାର୍; ଆରେ, ସିକିମ ଜାକୁବତି ଗାଡ଼୍ହି ଲାହାଂ ହୁନ୍ଞ୍ଜି ଇସ୍ରାଏଲ୍ ବିରୁଦ୍ତ ଇମ୍ଣି କାମାୟ୍କିୱି ବାନ୍ୟା କାମାୟ୍ କିଜ଼ି ମାଚାନ୍, ତା କାଜିଂ ମାନ୍ତଇଡ଼୍ଜି ଆରି ବେସି ରିସାଜ଼ି ମାଚାର୍ । ହେଏଚେୱେଡ଼ାଲିଂ ହମର ହେୱାର୍ ହୁକେ କାତାବାର୍ତା କିଜ଼ି ଇଚାନ୍, “ମି ଇ ଗାଡ଼୍ଚେତାଂ ନା ମାଜ଼ି ସିକିମନି ମାନ୍ ଆତାତ୍ନ୍ନା; ଆନ୍ ଗୱାରି କିଦ୍ନାଙ୍ଗା, ନା ମାଜ଼ି ହୁକେ ବିବା କିଜ଼ି ହିଆଟ୍ । ଆରେ, ମା ହୁକେ ହାମ୍ନ୍ଦିବନ୍ଦୁ କିନାସ୍, ମି ଗାଚ୍କୁକାଂ ମାଂ ହିଦାଟ୍, ମା ଗାଚ୍କୁକାଂ ଏପେଙ୍ଗ୍ ଅୱାଟ୍ । ତା ଆତିସ୍, ଏପେଙ୍ଗ୍ ମା ଲାହାଂ ବାହା କିନାଦେର୍; ୱିଜ଼େ ଦେସ୍ ମି ଆଗେ ମାନାତ୍, ହେବେ ବାହା କିୟାଟ୍ ଆରି ବେପାର୍ କିୟାଟ୍ ଆରି ଆଦିକାର୍ କିୟାଟ୍ ।”
ଆରେ, ସିକିମ ଦିଣା ଲାତ୍ରାହିଂ ଆରି ଟଣ୍ଡାରିଙ୍ଗ୍ ଇଚାନ୍, ନା କାଜିଂ ମି ଉପ୍କାର୍ କାଣ୍କୁ ଆୟେକ୍, ହେବେ ଇନାକା ଇଞ୍ଜ୍ନାଦେର୍, ହେଦାଂ ଆନ୍ ହିଦ୍ନାଙ୍ଗ୍ । ଜଡ଼ା ଆରି ଦାନ୍ ଏଚେକ୍ ଆଦିକ୍ ଏନ୍ତାନାଦେର୍, ମି କାତା ଇସାବ୍ରେ ହେଦାଂ ହିଦ୍ନାଙ୍ଗ୍; ମତର୍ ଇନେସ୍ପା ନା ହୁକେ ଇ ଗାଡ଼୍ଚେଂ ବିବା କିଜ଼ି ହିଦାଟ୍ । ତେବେ ସିକିମ ଜାକୁବତି ମାଜ଼ିର୍ତି ତଣ୍ଦେହି ଦିଣାତିଂ ବାନ୍ୟା କିଜ଼ିମାଚିଲେ ହେୱାର୍ ସିକିମ ଆରି ତା ଲାତ୍ରାହି ହମର ହୁକେ ଚାଲାକି ବାବ୍ରେ କାତାବାର୍ତା କିଜ଼ି ଇଚାର୍, “ଆପେଙ୍ଗ୍ ସୁନତ୍ଆୱି ଲଗାଂ ମା ତଣ୍ଦେଲିଂ ହିନି କାମାୟ୍ କିଦେଂ ଆଡୁପ୍, ହେଦାଂ କିତିସ୍, ମାଦାଂ ହିଜତ୍ ଆନାତ୍ । ଜଦି କେବଲ୍ ରଞ୍ଜାଙ୍ଗ୍ କାମାୟ୍ କିତିସ୍, ମା ଲାକେ ଏପେଙ୍ଗ୍ ଜାଣ୍କେ ଆଣ୍ଡ୍ରାଙ୍ଗ୍ ସୁନତ୍ ଆନାଦେର୍, ତେବେ ଆପେଙ୍ଗ୍ ମି କାତାତ ରାଜି ଆନାପ୍ । ଆପେଙ୍ଗ୍ ମିଂ ଗାଡ଼୍ ହିଦ୍ନାପ୍ ଆରି ମି ଗାଚ୍କୁକାଂ ଆପ୍ ଅନାପ୍, ଆରେ, ମି ହୁକେ ବାହା କିଜ଼ି ର-ମାନାୟ୍ ଆନାପ୍ । ମତର୍ ଏପେଙ୍ଗ୍ ଜଦି ସୁନତ୍ ବିସ୍ରେ ମା କାତା ୱେନ୍ୱିତିସ୍, ତେବେ ଆପେଙ୍ଗ୍ ହେ ଗାଡ଼ିଙ୍ଗ୍ ଅସି ହାନାପ୍ ।”
ହେଏଚେୱେଡ଼ାଲିଂ ହେୱାର୍ ଇ କାତାତ ହମର ଆରି ତା ମେହି ସିକିମ ସାରି ଆତାର୍ । ଆରେ, ହେ ଦାଂଣେନ୍ ବେଗି ହେ କାମାୟ୍ କିତାନ୍, ଇନେକିଦେଂକି ହେୱାନ୍ ଜାକୁବ ଗାଡ଼୍ହିତାକେ ବେସି ମାନ୍କିଜ଼ି ମାଚାନ୍ । ହେ ସିକିମ ତା ଲାତ୍ରାହି କୁଟୁମ୍ ୱିଜ଼ାର୍ତାଂ ଆଦିକ୍ ମାନିନିକାନ୍ ମାଚାନ୍ ।
ଇଦାଂପାଚେ ହମର ଆରି ତା ମାଜ଼ି ସିକିମ ତା ଗାଡ଼୍ଦୁୱାର୍ତ ୱାଜ଼ି ଗାଡ଼୍ନିକାରିଙ୍ଗ୍ ଲାହାଂ କାତାବାର୍ତା କିଜ଼ି ଇଚାର୍; ଇ ଲକୁ ମା ଲାହାଂ ବନ୍ଦୁଆନାର୍; ଇଦାଂକାଜିଂ ଇୱାରିଙ୍ଗ୍ ଇ ଦେସ୍ତ ବାହା ଆରି ବେପାର୍ କିଦେଂ ହିୟାଏତ୍; ଇନେକିଦେଂକି ହୁଡ଼ାଟ୍, ଇ ଦେସ୍ ହେୱାର୍ କାଜିଂ ଜବର୍ ମାନାତ୍; ଆରେ, ଆସେଙ୍ଗ୍ ହେୱାର୍ତି ଗାଚ୍କୁ ଅନାସ୍ ଆରି ମା ଗାଚ୍କୁ ହେୱାରିଙ୍ଗ୍ ହିନାସ୍ । ମତର୍ “ହେୱାର୍ତି ଇଦାଂ ରଞ୍ଜାଙ୍ଗ୍ କାତା ମାନାତ୍, କି ମା ବିତ୍ରେ ଜାଣ୍କେ ଆଣ୍ଡ୍ରାଙ୍ଗ୍ ଜଦି ହେୱାର୍ ଲାକେ ସୁନତ୍ ଆନାଦେର୍, ତେବେ ହେୱାର୍ ମା ହୁକେ ବାହା କିଜ଼ି ର-ମାନାୟ୍ ଆଦେଂ ରାଜି ଆନାର୍ । ହେୱାର୍ତି ଦନ୍, ସମ୍ପ୍ତି ଆରି ପସୁଙ୍ଗ୍ କି ମାଦାଂ ଆଉତ୍ ? କେବଲ୍ ଆସେଙ୍ଗ୍ ହେୱାର୍ତି କାତା ରଗାଗାଡ଼୍ କିନାସ୍, ହେଦାଂ କିତିସ୍, ହେୱାର୍ ମା ହୁକେ ବାହା କିନାର୍ ।”
ହେଏଚେକାଡ଼୍ଦ ହମର ଆରି ତା ମେହି ସିକିମତି ଇ କାତାତ ତାଦି ଗାଡ଼୍ଦୁଆର୍ ହିଜ଼ି ହସିହାନାକାର୍ ୱିଜ଼ାର୍ ଲକୁ ରାଜି ଆତାର୍: ହେବେ ତା ଗାଡ଼୍ଦୁଆର୍ ହିଜ଼ି ହସିହାନାକାର୍ ଜାଣ୍କେ ଆଣ୍ଡ୍ରାହିମ୍ଣାଂ ସୁନତ୍ ଆତାର୍ । ଆରେ ତିନ୍ ଦିନ୍ତ ହେୱାର୍ ବେମାର୍ ଆତିଲେ, ଦିଣାତି ଟଣ୍ଡେନ୍ ସିମିୟନ୍ ଆରି ଲେବି, ଜାକୁବତି ଇ ରି ମାଜ଼ିର୍ ଜାର୍ କାଣ୍ଡା ଅଜ଼ି ପାଣ୍ଡ୍ରାୱାଦାଂ ଗାଡ଼୍ଦିଂ ମାଡିବହାଜ଼ି ସବୁ ଆଣ୍ଡ୍ରାହିମ୍ଣାକାଂ ଅସ୍ତାର୍ । ଆରେ, ହମରତିଂ ଆରି ତା ମେହି ସିକିମତିଂ କାଣ୍ଡାହୁଦାଂ ଟୁଣ୍ଚି ସିକିମତି ଇଞ୍ଜାଙ୍ଗ୍ ଦିଣାତିଂ ଅସିହାଚାର୍ । ଜାକୁବତି ମେହିର୍ ହାତି ମାନାୟାର୍ତି ଲାଗାଂ ୱାଜ଼ି ଗାଡ଼୍ ଚରି କିତାର୍, ଇନେକିଦେଂକି ହେୱାର୍ତି ତଣ୍ଦେଲିଂ ହେ ଲକୁ ବାନ୍ୟା କିଜ଼ି ମାଚାର୍ । ଆରେ, ହେୱାର୍ତି ମେଣ୍ଡା ଆରି କଡିଂ ଆରି ଗଦଂ ସବୁ, ଆରି ଗାଡ଼୍ନି ସବୁ ଜିନିସ୍ ଚରି କିତାର୍ । ଆରେ ହେୱାର୍ତି ହାରୁହିମ୍ଣା ଆରି ଡକ୍ରିକାଂ ବନ୍ଦି କିଜ଼ି ସବୁ ଦନ୍ ଆରି ଇଲ୍ନିକା ୱିଜ଼ୁ ମ୍ଡାତାର୍ ।
ହେବେ ଜାକୁବ ସିମିୟନ୍ ଆରି ଲେବିତିଂ ଇଚାନ୍, “ଏପେଙ୍ଗ୍ ଇ ଦେସ୍ତ, ଇଚିସ୍, କିଣାନିୟ ଆରି ପରିଜିୟ ମାନାୟାର୍ ଲାଗାଂ ନାଂ ବେକାର୍ ଲାକେ କିଜ଼ି ବିପ୍ତି କିତ୍ତାୟ୍: ନା ଲକୁ ଅଲପ୍, ଇଦାଂକାଜିଂ ହେୱାର୍ ନା ବିରୁଦ୍ତ ରବେରୁଣ୍ଡାଜ଼ି ନାଂ ଅସ୍ତାନାର୍; ହେବେ ୱିଜ଼଼ାର୍ କୁଟୁମ୍ତିଂ ନାସ୍ କିଦ୍ନାର୍ ।” ହେୱାର୍ ଉତର୍ କିତାର୍, “ଦାରିୟାଣି ଲାକେ ମା ତଣ୍ଦେଲ୍ ହୁକେ ବେବାର୍ କିନାକା କି ତା କାମାୟ୍ ?”
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.