Pengo Bible
ଆଦି 14
ଅବ୍ରାମ୍ ଲତଙ୍ଗ୍ ଉଦାର୍
ଇଦାଂପାଚେ ସିନିୟର୍ନି ଅମ୍ରାପଲ୍ ରାଜା ଆରି ଇଲ୍ଲାସର୍ନି ଅରିୟକ ରାଜା ଆରି ଏଲମନି କଦର୍ଲାୟମନି ରାଜା ଆରି ଗୟିମନି ତିଦିୟଲ୍ ରାଜାତି ଆଦିକାର୍ ୱେଡ଼ାଲିଂ, ଇୱାର୍ ସଦମନି ରାଜା ବିରା ଆରି ହମରାନି ରାଜା ବିର୍ସା ଆରି ଅଦ୍ମାନି ରାଜା ସିନାବ୍ ଆରି ସବୟିମ୍ନି ରାଜା ସିମେବର ଆରି ବିଲାର, ଇଚିସ୍, ସୟରନି ରାଜା ଲାହାଂ ଜୁଜ୍ କିତାର୍ । ଇ ୱିଜ଼ାର୍ ସିଦିମ ବାର୍ତ, ଇଚିସ୍, ହର୍ ହାମ୍ଦୁର୍ ଲାଗେ ରବେ ଆଜ଼ି ମାଚାର୍ । ଇନେସ୍କି ହେୱାର୍ ବାର ବାର୍ହୁ ପାତେକ୍ ଆଡ଼୍ୟାର୍ କଦର୍ଲାୟମନି ରାଜାତି ତଲ୍ୟାତ ମାନ୍ଜି ତେର ବାର୍ହୁତ ହେୱାନ୍ତି ଗଣ୍ଡ୍ଗଲ୍ୟା ଆଜ଼ି ମାଚାନ୍, ଇଦାଂ ଚଉଦ ବାର୍ହୁ କଦର୍ଲାୟମନି ରାଜା ଆରି ହେୱାନ୍ତି ଉପ୍କାର୍ ରାଜାର୍ ୱାଜ଼ି ଅସ୍ତରତ୍ କର୍ଣ୍ଣୟିମତ ରପାୟିୟ ଲକୁରିଂ ଆରି ହମ୍ତ ସୁସିୟ ଲକୁରିଂ ଆରି ସାବିକିରିୟାତୟିମତ ଏମିୟ ଲକୁରିଂ, ଆରେ ବାଟାନି ଲାଗାୟ୍ ଏଲ-ପାରଣ୍ ପାତେକ୍ ସେୟିର ମାଡ଼ିତ ବାହାକିନାକାର୍ ହରିୟ ଲକୁରିଂ ଜିତା ଆତାର୍ । ଆରେ, ହେୱାର୍ ହେ ବାହାତାଂ ମାସ୍ଦି ଐଣ୍ମିସ୍ପଟ୍, ଇଚିସ୍, କାଦେସ୍ତ ହାଲ୍ଜି ଅମାଲେକିୟ ଲକୁର୍ତି ୱିଜ଼ୁ ଦେସ୍ ଆରି ହତସସନ୍ ତାମର୍ ନିକାନ୍ ଇମରିୟ ଲକୁରିଂ ଆରାୟ୍ କିତାନ୍ ।
ଇଦାଂକାଜିଂ ସଦମନି ରାଜା ଆରି ହମରାନି ରାଜା ଆରି ଅଦ୍ମାନି ରାଜା ଆରି ସବୟିମ୍ନି ରାଜା ଆରି ବିଲାର, ଇଚିସ୍, ସୟରନି ରାଜା, ଇ ପାଞ୍ଚ୍ ରାଜା ମେହାଜ଼ି, ଏଲମନି କଦର୍ଲାୟମନି ରାଜା ଆରି ଗୟିମନି ତିଦିୟଲ୍ ରାଜା ଆରି ସିନିୟର୍ନି ଅମ୍ରାପଲ୍ ରାଜା ଆରି ଇଲ୍ଲାସର୍ନି ଅରିୟକ ରାଜା, ଇ ଚାରି ରାଜାତି ଲାହାଂ ସିଦିମ ବାଟାତ ଜୁଜ୍ କିଦେଂ ଲାଗାତାର୍ । ହେ ସିଦିମ ବାଟାତ ଚିଣ୍ଡା ଚିକ୍ଲାନିକା ବେସି ଡେଙ୍ଗା ମାଚାତ୍; ସଦମ ଆରି ହମରାନି ରାଜାର୍ ହନ୍ଚି ହାଲୁ ହାଲୁ ହେ ବିତ୍ରେ ଆର୍ତାର୍, ଆରେ, ଇନେର୍ ବାକି ମାଚାର୍, ହେୱାର୍ ମାଡ଼ିତ ହନ୍ତାର୍ । ଇଦାଂକାଜିଂ ହେୱାର୍ ସଦମ ଆରି ହମରାନି ୱିଜ଼ୁ ସମ୍ପତି ଆରି ତିନିଜିନିସ୍ ଜେଲ୍ଜି ଅତାର୍ । ଆରେ, ଅବ୍ରାମ୍ତି ଟଣ୍ଡେନ୍ ମାଜ଼ି ସଦମନିକାନ୍ ଲତଙ୍ଗ୍ ଆରି ହେୱାନ୍ତି ୱିଜ଼ୁ ଦନ୍ ଅଜ଼ି ହାଚାର୍ ।
ହେଏଚେକାଡ଼୍ଦ ରୱାନ୍ ହନ୍ପାନାକାନ୍ ଏବ୍ରିୟ ଅବ୍ରାମ୍ତିଂ କାବୁର୍ ହିତାନ୍; ହେ ୱେଡ଼ାଲିଙ୍ଗ୍ ଅବ୍ରାମ୍ ଇସ୍କଲନି ଆରି ଆନେର୍ନି ଟଣ୍ଡେନ୍ ଇମରିୟ ମମ୍ରିନି ଅଲନ୍ ମାର୍ ଦଲ୍ ତାରେନ୍ ବାହା କିଜ଼ି ମାଚାର୍, ଆରେ, ହେୱାର୍ ଅବ୍ରାମ୍ତି ହାଙ୍ଗ୍ଦାକାନ୍ ମାଚାର୍ । ହେଏଚେକାଡ଼୍ଦ ଅବ୍ରାମ୍ ଜାର୍ ଇଞ୍ଜିକୁଟୁମ୍ ଆସ୍ପା ଆଜ଼ି ହାନି କାବୁର୍ ୱେଚାର୍ ମାତର୍ ଜୁଜ୍ ବିଦ୍ୟାତ ସିକିତ୍ ଜାର୍ ଇଞ୍ଜାକାର୍ ତିନ୍ସ ଅଟର ଜାଣ୍ ଲକୁରିଂ ହାଙ୍ଗ୍ଦ ଅଜ଼ି ସାତ୍ରୁରିଂ ପାଚେ ପାଚେ ହନ୍ଚି ଦାନ୍ ଗାଡ଼୍ ପାତେକ୍ ହାଚାର୍ । ଇଦାଂପାଚେ ହେୱାନ୍ ଜାର୍ ଆଡ଼୍ୟାରିଂ ରି କୁଦା ନାଣାଲିଂ ସାତ୍ରୁରିରିଂ ଟ୍ରାକ୍ତାର୍ । ହେୱାର୍ ହେୱାରିଂ ଆରାୟ୍ କିଜ଼ି ଦମେସକନି ଉତର୍ ବାହାନି ହବା ପାତେକ୍ ହେୱାର୍ତି ପାଚେ ପାଚେ ପେସ୍ତାର୍ । ଆରେ, ସବୁ ସମ୍ପତି ଆରି ଜାର୍ ଇଞ୍ଜିକୁଟୁମ୍ ଲତ ଆରି ହେୱାନ୍ତି ସମ୍ପତି, ଆରେ, କଗ୍ଲେକ୍ ଆରି ଲକୁରିଂ ବାଉଡ଼ାୟ୍ କିଜ଼ି ତାଇୱାତାନ୍ ।
ମଲ୍କିସେଦକ ଅବ୍ରାମ୍ତିଂ ଆସିର୍ବାଦ୍
ଇଲାକେ ଅବ୍ରାମ୍ କଦର୍ଲାୟମରତିଂ ଆରି ତା ହାଂଦାକାନ୍ ରାଜାରିଂ ଜିଣାଇ କିଜ଼ି ବାଉଡ଼ାତି ପାଚେ, ସଦମନି ରାଜା ତା ଲାହାଂ ବେଟ୍ କିଦେଂ ସାବି ଇଚିସ୍, ବାଟାତ, ରାଜାର୍ ହାଚାର୍ । ଆରେ, ସାଲମନି ରାଜା ମଲ୍କିସେଦକ ରୁଟି ଆରି ଅଙ୍ଗୁର୍ ରାସ୍ ଅଜ଼ି ୱାତାନ୍; ହେୱାନ୍ ୱିଜ଼ୁତାକେ ଜପି ମାନି ଇସ୍ୱର୍ତି ମାପ୍ରୁହେବାକିନାକାନ୍; ହେୱାନ୍ ଅବ୍ରାମ୍ତିଂ ଆସିର୍ବାଦ୍ କିଜ଼ି ଇଚାନ୍, “ଅବ୍ରାମ୍ ସାର୍ଗେ ଆରି ପୁର୍ତିନି ଆଦିକାରି ୱିଜ଼ୁତାକେ ମାନି ଇସ୍ୱର୍ତି ଆର୍ସିବାଦ୍ ପାୟା ଆୟେନ୍; ୱିଜ଼ୁତାକେ ଜପି ମାନି ଇସ୍ୱର୍ ଦନ୍ୟ ଆୟେନ୍, ହେୱାନ୍ ନି ସତ୍ରୁରିଂ ହେଲାୟ୍ କିତାନ୍ ।” ହେଏଚେକାଡ଼୍ଦ ଅବ୍ରାମ୍ ସବୁ ଦିନିସ୍ନି ଦସ୍ ବାଗ୍ତାଂ ର ବାଗ୍ ତାଙ୍ଗେଙ୍ଗ୍ ହିତାନ୍ ।
ଇଦାଂପାଚେ ସଦମନି ରାଜା ଅବ୍ରାମ୍ତିଂ ଇଚାନ୍, “ଏନ୍ ୱିଜ଼ୁ ସମ୍ପତି ଅୱା, ମତର୍ ମାନାୟାରିଙ୍ଗ୍ ନାଂ ହିଦା ।”
ତାପାଚେ ଅବ୍ରାମ୍ ସଦମନି ରାଜାଙ୍ଗ୍ ଉତର୍ ହିଜ଼ି ଇଚାନ୍, “ଆନ୍ ସାର୍ଗେ ଆରି ପୁର୍ତିନି ଆଦିକାରି ନିତ୍ରେମାପ୍ରୁ ଇସ୍ୱର୍ତି ମୁମ୍ଦ ପାର୍ମାଣ୍ କିନାଙ୍ଗା ଜେ, ଆନ୍ ମିଦାଂ ଇଚୁଟିଂ ଅଉଙ୍ଗ୍, ଅଲପ୍ ନୁଲ୍ କି ପାଣ୍ଡାୟ୍ନି ଡରି ପା ଅଉଙ୍ଗ୍; ପାଚେ ଏପ୍ ଇଞ୍ଜ୍ନାଦେର୍, ଆପ୍ ଅବ୍ରାମ୍ତିଂ ମାଜାନ୍ କିତାପ୍ନା । କେବଲ୍ ନା ବେଣ୍ଡ୍ୟା ମାନାୟାର୍ ଇନାକା ଚିଚାର୍ଣ୍ଣା, ହେଦାଂ ଅନାଂ, ଆରେ, ନାୱାର୍ ଇମ୍ଣି ହାଂୱାରିର୍ ରଚେ ହାଲ୍ଜି ମାଚାର୍, ହେୱାର୍, ଇଚିସ୍, ଆନେର୍ ଆରି ଇସ୍କଲ ଆରି ମମ୍ରି ଜାର୍ ଜାର୍ ପାୟାତି ବାଗ୍ ଇଟେର୍ ।”
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.