Pengo Bible
ଆଦି 15
ଅବ୍ରାମ୍ତି ଲାହାଂ ଇସ୍ୱର୍ତି ଗଜା
ହେ ଗଟ୍ଣା ପାଚେ କେଞ୍ଜ୍ନି କାଜିଂ ନିତ୍ରେମାପ୍ରୁତି ବଚନ୍ ଅବ୍ରାମ୍ତି ଲାଗାୟ୍ ଏକାତାତ୍, “ଏ ଅବ୍ରାମ୍, ପାଣ୍ଡ୍ରା ଆମା, ଆପ୍ ମିଂ ବିପତ୍ତ ଆଡାନାକା, ଆରି ଗାଜା ଇନାମ୍ ଲାକେ ।”
ହେବେ ଅବ୍ରାମ୍ତି ଉତର୍ କିତାନ୍, ଏ ମାପ୍ରୁ ନିତ୍ରେମାପ୍ରୁ, “ଏନ୍ ନାଂ ଇନାକା ହିଦ୍ନାୟ୍ ? ଆନ୍ ତ ହିମ୍ଣାୱାକ୍ଡ଼ା ଆୱାଦାଂ ହାନାଙ୍ଗା, ଆରେ, ଦମେସକ୍ନିକାନ୍ ଇଲିୟେଜର୍ ନା ଇଲ୍ନି ଦନ୍ନି ଆଦିକାରି ।” ଆରେ, ଅବ୍ରାମ୍ ଇଚାନ୍, “ହୁଡ଼ା, ଏନ୍ ନାଂ ହିମ୍ଣାୱାକ୍ଡ଼ା ହିଦ୍ୱାତାୟ୍, ଲାଗିଂ ନା ଇଞ୍ଜଚନ୍ଞ୍ଚି ରୱାନ୍ ଆଡ଼ିଏନ୍ ଇମ୍ଣି ନା ଉତର୍ ଆଦିକାରି ଆନାନ୍ ।”
ହେଏଚେକାଡ଼୍ଦ ତା କାଜିଂ ନିତ୍ରେମାପ୍ରୁତି ଇ ବଚନ୍ ଏକାତାତ୍, “ହୁଡ଼ା, ହେ ମୁଣିକା ନି ଉତର୍ ଆଦିକାରି ଆଉନ୍; ମତର୍ ଇନେନ୍ ନି ନେତେର୍ତାଂ ଗାଟା ଆନାୟ୍, ହେୱାନ୍ ନେ ନି ଉତର୍ ଆଦିକାରି ଆନାନ୍ ।” ଇଦାଂପାଚେ ନିତ୍ରେମାପ୍ରୁ ହେୱାନିଙ୍ଗ୍ ବାର୍ତ ତାସି ଇଚାନ୍, “ଏନ୍ ଆକାସ୍ତିଂ ହୁଡ଼୍ଜି ହୁକାକାଂ ଗାଣାକିଦେଂ ଆଡ୍ନାୟ୍, ତେବେ ଗାଣା କିଜ଼ି ଇଞ୍ଜା ।” ହେୱାନ୍ ଆରେ ଇଚାନ୍, “ଇ ଲାକେ ନି ବଁସ୍ ଆନାର୍ ।”
ହେଏଚେକାଡ଼୍ଦ ଅବ୍ରାମ୍ ନିତ୍ରେମାପ୍ରୁ ତାକେ ପାର୍ତି କିତିଲେ, ନିତ୍ରେମାପ୍ରୁ ତା ପାକ୍ୟାତ ପାର୍ତିକିନାକାନ୍ ଇଞ୍ଜି ଗାଣାକିତାନ୍ ।
ଇଦାଂପାଚେ ନିତ୍ରେମାପ୍ରୁ ହେୱାନିଂ ଇଚାନ୍, “ଇନେର୍ ନି ଆଦିକାର୍ କାଜିଂ ଇ ଦେସ୍ ହିନି କାଜିଂ କଲଦିୟର୍ତି ଉର୍ତାଂ ତାହିୱାତ୍ତାନ୍, ହେ ନିତ୍ରେମାପ୍ରୁ ଆପ୍ ।”
ହେବେ ଅବ୍ରାମ୍ ଇଚାନ୍, “ଏ ମାପ୍ରୁ, ନିତ୍ରେମାପ୍ରୁ, ଆନ୍ ଜେ ଇ ଦେସ୍ନି ଆଦିକାର୍ ଆନାଂ, ହେଦାଂ ଆନ୍ ଇନେସ୍ ପୁନାଙ୍ଗ୍ ?”
ନିତ୍ରେମାପ୍ରୁ ଇଚାନ୍, “ଏନ୍ ତିନ୍ ବାର୍ହୁନି ର କଡି ଆରି ତିନ୍ ବାର୍ହୁନି ର ଅଡା ଆରି ତିନି ବାର୍ହୁନି ର ମେଣ୍ଡା ଆରି ର ପାର୍ୱା ଆରି ରଞ୍ଜାଙ୍ଗ୍ ପାଣ୍ଡ୍କା ହିମ୍ଣା ମା ଲାଗାୟ୍ ତାହିୱା ।” ହେବେ ଅବ୍ରାମ୍ ହେ ସବୁ ତା ଲାଗାୟ୍ ତାସି ରି ଗାଣ୍ଡ୍ରା କିଜ଼ି ଗାଣ୍ଡ୍ରା ଜପି ବିନ୍ ଗାଣ୍ଡ୍ରା ଇଡ଼୍ତାନ୍; ମତର୍ ପଟିକାଂ ରି ଗାଣ୍ଡ୍ରା କିୱାତାନ୍ । ଇଦାଂପାଚେ ରାମାଣ୍ ପଟିକାକାଂ ହେ ହାତି ମାଡ଼୍କୁ ଜପି ଆର୍ତିଲେ, ଅବ୍ରାମ୍ ହେୱାକାଂ ପେସ୍ତାନ୍ ।
ଆରେ, ୱେଡ଼ାହାନି ୱେଡ଼ାଲିଂ ଅବ୍ରାମ୍ ବେସି ହୁଚ୍କାଣ୍କୁତାଂ ମାଜ୍ଗାତ ପାଣ୍ଡ୍ରା ଆତାନ୍ । ହେଏଚେକାଡ଼୍ଦ ନିତ୍ରେମାପ୍ରୁ ଅବ୍ରାମ୍ତିଂ ଇଚାନ୍, “ନି ହିମ୍ଣାୱାକ୍ଡ଼ା ଚାର୍ସ ବାର୍ହୁ ବିନ୍ଦେସ୍ତ ବାହାକିଜ଼ି ଆଡ଼୍ୟାର୍ କାମାୟ୍ କିଜ଼ି ଦୁକ୍ ବଗି କିନାର୍; ଇଦାଂ ହାତ୍ପା ପୁନାୟ୍; ମତର୍ ହେୱାର୍ ଇମ୍ଣି ଦେସ୍ନି ମାନାୟାର୍ତି ଆଡ଼ିଏନ୍ କାମାୟ୍ କିନାର୍, ଆପ୍ ହେୱାର୍ତି ବିଚାର୍ କିନାପ୍; ତାପାଚେ ହେୱାର୍ ବେସି ଦାନ୍ ଅଜ଼ି ହେ ଦେସ୍ତାଂ ହତ୍ନାର୍ । ମତର୍ ଏନ୍ ୱାରିତାଂ ଜାର୍ ଆଗେନିଲାତ୍ରାର୍ତି ଲାଗାଂ ହାନାୟ୍ ଆରି ହାର୍ଦି ବୁଡ଼୍ହି ୱେଡ଼ାଲିଂ ଦୁଗେର୍ ପାୟାନାୟ୍ । ଆରେ, ନି କୁଟୁମ୍ନି ଚାର୍ ଆକର୍ ଇ ଦେସ୍ତ ମାସ୍ଦି ୱାନାର୍; ଇନେକିଦେଂକି ଇମରିୟ ଲକୁର୍ତି ପାପ୍ ଇ ପାତେକ୍ ପୁରା ଆଉତେ ।”
ଆରେ ଏଚେକାଡ଼୍ଦ ୱେଡ଼ା ହାଚାତ୍ ଆରି ମାଜ୍ଗା ଆତାତ୍, ହୁଡ଼ା, ର କଦାନି ହଲି ଆରି କାଚାସି ଗୁଦ୍ଗିନି ହେ ପସୁ ରି ବାଗ୍ ବିତ୍ରେ ହିଜ଼ି ହାଚାନ୍ । ଆରେ, ହେନାଞ୍ଜିଂ ନିତ୍ରେମାପ୍ରୁ ଅବ୍ରାମ୍ ଲାହାଂ ନିୟମ୍ ତିର୍ କିଜ଼ି ଇଚାନ୍, “ଆପ୍ ଇ ମିସର୍ ନାଗୁଡ଼୍ତାଂ ପରାତ୍ ତର୍ନି ଗାଜାନାଗୁଡ଼୍ ପାତେକ୍ ଇ ଦେସ୍ ମି କୁଟୁମ୍ତିଂ ହିତାପ୍ । ଇମ୍ଣି ଦେସ୍ତ ନଙ୍ଗ୍, କେନିୟ, କନଜିୟ, କଦ୍ମନିୟ, ହିତିୟ, ପରିଜିୟ, ରପାୟିୟ, ଇମରିୟ, କିଣାନିୟ, ଗିର୍ଗାସିୟ ଆରି ଜିବୁସିୟର୍ତି ଦେସ୍ ପା ନିଂ ହିତାପ୍ ।”
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.