Pengo Bible
ଆଦି 13
ଅବ୍ରାମ୍ତାଂ ଲତତି ବିନେ
ଇଦାଂପାଚେ ଅବ୍ରାହାମ୍ ଜାର୍ ଡକ୍ରି ଆରି ସବୁ ସମ୍ପତି ଅଜ଼ି ଲତ ଲାହାଂ ମିସର୍ ଦେସ୍ତାଂ ହସି ଦିଗିଦେସ୍ତ କିଣାନ୍ ଦେସ୍ତ ହାଚାର୍ । ଅବ୍ରାମ୍ ଅଡାଙ୍ଗ୍, ମେଣ୍ଡାଙ୍ଗ୍ ଗଦଂ ଆରି ହନା ରୁପାତ ବେସି ମାଜାନ୍ ମାଚାନ୍ । ଆରେ, ଅବ୍ରାହାମ୍ ଆଗେହାନି ଇସାବ୍ରେ ୱେଡ଼ାହାନିନିପତାଂ ବୈତେଲ୍ ଆରି ଅୟନି ମାଦ୍ଣି ଇମ୍ଣି ବାହାତ ଆଗେ ତା ତୁମ୍ ରଚ୍ଚାକା ମାଚାନ୍, ହେ ବାହାତ ଏକିସ୍ ଜାର୍ ଆଗେ ରଚ୍ଚି ପୁଜାଗାର୍ଣି ଲାଗେ ନିତ୍ରେମାପ୍ରୁତି ତର୍ଦ ଅବ୍ରାମ୍ ପାର୍ତନା କିତାନ୍ ।
ଆରେ, ଅବ୍ରାମ୍ତି ହାଂଦି ଲତତି ପା ବେସି ବେସି ଅଡାଙ୍ଗ୍ ମେଣ୍ଡାଙ୍ଗ୍, କଡିଂ ଆରି ତୁମ୍ ମାଚାତ୍ । ଇଦାଂକାଜିଂ ହେ ଦେସ୍ ହେୱାର୍ତି ରବେ ବାହା କିଦେଂ ହାରା ଆୱାତାତ୍, ଇନେକିଦେଂକି ହେୱାର୍ତି ବେସି କଡିରାହି ମାଚିଲେ ହେୱାର୍ ରବେ ବାହା କିଦେଂ ଆଡ୍ୱାତାର୍ । ଆରେ, ଅବ୍ରାମ୍ତି ପସୁ ଗଡ଼ିୟାର୍ ଆରି ଲତତି ଗଡ଼ିୟାର୍ତି ହାରି ବିରଦ୍ ଆତାର୍ । ହେ ୱେଡ଼ାଲିଂ ହେ ଦେସ୍ତ କିଣାନିୟ ଆରି ପରିଜିୟ ଲକୁ ବାହା କିଜ଼ି ମାଚାର୍ ।
ଲାଗିଂ ଅବ୍ରାମ୍ ଲତଙ୍ଗ୍ ଇଚାନ୍, “ଆନ୍ ଗୱାରି କିଦ୍ନାଙ୍ଗା, ଏନ୍ ନା ବିତ୍ରେ, ଆରେ, ନି ଗଡ଼ିୟାର୍ ଆରି ନା ଗଡ଼ିୟାର୍ତି ବିତ୍ରେ ଗଣ୍ଡ୍ଗଲ୍ ଆମେତ୍, ଇନେକିଦେଂକି ଆସେଙ୍ଗ୍ ବାଇ ଟଣ୍ଡାର୍ । ଏନ୍ ମୁମ୍ଦ କି ଇ ୱିଜ଼ୁ ଦେସ୍ ହିଲୁତ୍ ? ଇଦାଂକାଜିଂ ନିଂ ଗୱାରି କିଦ୍ନାଙ୍ଗା, ଏନ୍ ନା ତାଂ ବିନେ ଆ; ଆତିସ୍, ଏନ୍ ଡେବ୍ରି ନିପ ହାଲା, ଆନ୍ ତିନାକେଇ ନିପ ହାନାଙ୍ଗ୍; ନଲେ ଏନ୍ ତିନାକେଇ ନିପ ହାଲା, ଆନ୍ ଡେବ୍ରି ନିପ ହାନାଙ୍ଗ୍ ।”
ହେଏଚେକାଡ଼୍ଦ ଲତ ମାସ୍ଦି ହୁଡ଼୍ତାନ୍, ସୟର୍ ପାତେକ୍ ଜର୍ଦନ୍ନି ୱିଜ଼ୁ ବାଟାଂ ନିତ୍ରେମାପ୍ରୁତି ବାଡ଼୍ ଲାକେ ସବୁ ହାର୍ ଏଜ଼ୁଙ୍ଗ୍ ଆରି ମିସର୍ ଦେସ୍ ଲାକେ ମାନାତ୍; ଇନେକିଦେଂକି ହେୱେଡ଼ାଲିଂ ସଦମ ଆରି ହମରା ନିତ୍ରେମାପ୍ରୁତି ହୁଦାଂ ନାସ୍ ଆୱାଦାଂ ମାଚାତ୍ । ଇଦାଂକାଜିଂ ଲତ ଜାର୍ କାଜିଂ ଜର୍ଦନ୍ନି ୱିଜ଼ୁ ବାଟାଙ୍ଗ୍ ବାଚି କିଜ଼ି ୱେଡ଼ାହନି ନିପ ହାଚାନ୍; ଇଲାକେ ହେୱାର୍ ରୱାନ୍ତାଂ ବିନେ ଆତାର୍ । ହେବେଣ୍ଡାଂ ଅବ୍ରାମ୍ କିଣାନ୍ ଦେସ୍ତ ବାହା କିତାନ୍, ଆରେ, ଲତ ହେ ବାଟାତ ମାନି ୱିଜ଼ୁ ଗାଡ଼୍ ବିତ୍ରେ ବାହା କିଜ଼ି ସଦମ ପାତେକ୍ ତୁମ୍ ରଚ୍ଚେଙ୍ଗ୍ ଲାଗାତାର୍ । ହେ ସଦମ୍ନି ଲକୁ ବେସି ବାନ୍ୟା ଆରି ନିତ୍ରେମାପ୍ରୁତି ଲାଗେ ଜବର୍ ପାପ୍ୟାର୍ ମାଚାର୍ ।
ଅବ୍ରାମ୍ତି ହିବ୍ରଣତ ହାନାକା
ଇଦାଂପାଚେ ଅବ୍ରାହାମ୍ତାଂ ଲତ ବିନେ ଆତି ପାଚେ ନିତ୍ରେମାପ୍ରୁ ଅବ୍ରାମ୍ତିଂ ଇଚାତ୍, ନଂ ଏନ୍ ଇମେତାକେ ମାନାୟ୍; ହେବେତାଂ ମାସ୍ଦି ଦିଗିନି, ୱେଡ଼ାହନିନିପ ଆରି ୱେଡ଼ାହାନି ଦିଗି ନିପ ହୁଡ଼ା; ଇନେକିଦେଂକି, ଇ ଇମ୍ଣି ୱିଜ଼ୁ ଦେସ୍ ଏନ୍ ହୁଡ଼୍ନାୟା, ହେଦାଂ ଆପ୍ ନିଂ ଆରି ଜୁଗ୍ ଜୁଗ୍ ନି କୁଟୁମ୍ତିଂ ହିଦ୍ନାଙ୍ଗ୍ । ଆରେ, ପୁର୍ତିନି ଦୁଡ଼ି ଲାକେ ଆପ୍ ମି ଲାତ୍ରାତିଂ ବାଡାୟ୍ କିଦ୍ନାପ୍; ଇନେର୍ ଜଦି ପୁର୍ତିନି ଦୁଡ଼ି ଗାଣା କିଦେଂ ଆଡ୍ନାର୍, ତେବେ ନି ଲାତ୍ରା ଆନାର୍ । ନିଙ୍ଗା, ଇ ଦେସ୍ନି ଲାମା ଓହାର୍ତ ବୁଲା ଆଡ; ଲାଗିଂ ଆନ୍ ମିଂ ହେଦାଂ ହିଦ୍ନାଙ୍ଗ୍ । ହେଏଚେକାଡ଼୍ଦ ଅବ୍ରାମ୍ ତୁମ୍ ରିକ୍ଚି ହିବ୍ରଣ ଲାଗାୟ୍ ମମ୍ରିନି ଅଲନ୍ ମାର୍ ଦଲ୍ ତାରେନ୍ ହାଲ୍ଜି ବାହା କିତାନ୍, ଆରେ, ହେବେ ନିତ୍ରେମାପ୍ରୁତି ଉଦେସ୍ତ ରଞ୍ଜାଙ୍ଗ୍ ପୁଜାଗାର୍ଣି ରଚ୍ଚାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.