Pengo Bible
ଜାତ୍ରା 26
ମାପ୍ରୁତି ତୁମ୍
(ଜାତ୍ରା ୩୬:୮-୩୮)
ଆରେ ଏପ୍ ଦାସ୍ ପାର୍ଦା ହୁଦାଂ ଇଲ୍ ଜାଲ୍ଦି କିନାଦେର୍; ହେ ସବୁ ପାର୍ଦା ଡ଼ିଞ୍ଜ୍ନି ବାନି, ନିଲ୍ୟା, କଦା, ଆରି ହେନ୍ଦର୍ ବାନି ନୁଲ୍ ରଚ୍ୟା ଆନାତ୍, ହେବେ ରଚ୍ଚି କିରୁବର୍ତି ଲାକେ ମାନ୍ଗାନାତ୍ । ହେ ୱିସୁ ପାର୍ଦା କଡ଼େ ଆଟ୍ ଆତ୍ ଲାମା ଆରି ଚାର୍ ଆତ୍ ଅହାର୍, ସବୁ ପାର୍ଦାନି ର ସମାନ୍ ଆନାତ୍ । ଆରେ, ରବେ ପାଞ୍ଚ୍ ପାର୍ଦା ହାରି ମେହାଜ଼ି ମାନ୍ଗାନାତ୍, ଆରେ ବାକି ପାଞ୍ଚ୍ ପାର୍ଦାନି ହାରି ମେହାଜ଼ି ମାନ୍ଗାନାତ୍ । ଆରେ ଜଡ଼ାତି ବାହାତ ପର୍ତୁମ୍ ହାରିହାରା ପାର୍ଦାନି ତେଙ୍ଗୁଲ୍ତ ନିଲ୍ୟା ନୁଲ୍ତାଂ ଡ଼ୁକା କିନାଦେର୍ ଆରେ ଜଡ଼ାତି ବାହାତ ରିଣ୍ଡିନି ହାରିହାରା ପାର୍ଦାନି ତେଙ୍ଗୁଲ୍ତ ହେଲାକେ କିନାଦେର୍ । ଇଚିସ୍, ପର୍ତୁମ୍ ପାର୍ଦାନି ତେଙ୍ଗୁଲ୍ତ ପଚାସ୍ ଡ଼ୁକା କିନାଦେର୍ ଆରି ଜଡ଼ାତି ବାହାନି ରି ପାର୍ଦାନି ତେଙ୍ଗୁଲ୍ତ ପଚାସ୍ ଡ଼ୁକା କିନାଦେର୍; ହେ ରି ଡ଼ୁକା ସମାନ୍ ହାରି ମୁମ୍ଦ ମାନିକ୍ । ଆରେ, ପଚାସ୍ ହନା ଆକଡ଼ିଂ କିଜ଼ି ଆକଡ଼ିତ ପାର୍ଦା ସବୁ ହାରି ଜଡ଼ାନାତ୍; ହେବେ ର ଇଲ୍ ତୁମ୍ ଆନାତ୍ ।
ଆରେ ହେ ଇଲ୍ ଜପି ପ୍ଡାକ୍ୟାନି ତୁମ୍ ଇଲ୍ କାଜିଂ ଅଡା ତଲ୍ନି ଏଗାର୍ ପାର୍ଦା ଜାଲ୍ଦି କିନାଦେର୍ । ହେ ୱିଜ଼ୁ ପାର୍ଦାନି ଲାମା ତିରିସ୍ ଆତ୍ ଆରି ଅହାର୍ ଚାର୍ ଆତ୍; ଏଲେଂ ଏଗାର୍ ପାର୍ଦାନି ର ହମାନ୍ ଆନାତ୍ । ଇଦାଂପାଚେ ପାଞ୍ଚ୍ ପାର୍ଦା ହାରି ଜଡ଼ା ବିନେ ଇଟ୍ନାଦେର୍ ଆରି ବିନ୍ ଚଅ ପାର୍ଦା ବିନେ ଇଟ୍ନାଦେର୍, ଆରେ, ଇୱାର୍ତି ବିତ୍ରେ ଚଅ ପାର୍ଦା ମଡ଼ି କିଜ଼ି ତୁମ୍ ମୁମ୍ଦ ଇଟ୍ନାଦେର୍ । ଆରେ ମେହାତି ବାହାତ ପର୍ତୁମ୍ ହାରିହାରା ପାର୍ଦାନି ଦାଡ଼ିତ ପଚାସ୍ ଡ଼ୁକା କିନାଦେର୍ ଆରି ରିଣ୍ଡି ପାର୍ଦାନି ମେହାତି ବାହାତ ପଚାସ୍ ଡ଼ୁକା କିନାଦେର୍ । ଆରେ ପିତାଡ଼୍ନି ପଚାସ୍ ଆକଡ଼ା କିଜ଼ି ହେ ଡ଼ୁକାତ ହଟ୍ପିସ୍ ତୁମ୍ ମେହାୟ୍ କିନାଦେର୍; ହେବେ ହେଦାଂ ର ତୁମ୍ ଆନାତ୍ । ହେ ତୁମ୍ ପାର୍ଦାନି ଅଦା ବାଗ୍, ଇଚିସ୍, ଇମ୍ଣି ପାର୍ଦା ଆଦା ବେସି ମାନାତ୍, ହେଦାଂ ଇଲ୍ନି ପାଚେନି କଚଣ୍ତ ଡ଼ୟାସି ମାନ୍ଗାନାତ୍ । ଆରେ ତୁମ୍ ପାର୍ଦାନି ବାକି ଇମ୍ଣି ଡେଙ୍ଗା ବାଗାଂ ର କଚଣ୍ତ ର ଆତ୍ ଆରି ହେ କଚଣ୍ତ ର ଆତ୍ ବେସି ମାନ୍ଗାନାତ୍, ହେଦାଂ ଇଲ୍ନି ର କଚଣ୍ ହେ କଚଣ୍ତ ପ୍ଡାକ୍ୟାଜ଼ି ଜଲାନାତ୍ ।
ଇଦାଂପାଚେ ଏପ୍ ନେତେର୍ ବାନି ମେଣ୍ଡାନି ତଲ୍ଦ ତୁମ୍ନି ର ଚାଉଣି କିନାଦେର୍, ଆରେ ତା ଜପି କୱାଣ୍ ତଲ୍ଦ ର ଚାଉଣି କିନାଦେର୍ ।
ଇଦାଂପାଚେ ଏପ୍ ଇଲ୍ କାଜିଂ ସିଟିମ୍ ମାର୍ତାଂ ନିଲ୍ନି ପାଟା ଟିଆ ପାଟା ଜାଲ୍ଦି କିନାଦେର୍ । ର ର ପାଟା ଦାସ୍ ଆତ୍ ଲାମା ଆରି ର ଆତ୍ ଆଦା ଅହାର୍ ଆନାତ୍ । ହେବେନି ହାରି ସମାନ୍ ରି ପାନା କିନାଦେର୍; ଇଲାକେ ଇଲ୍ନି ୱିଜ଼ୁ ପାଟା କାଜିଂ ଜାଲ୍ଦି କିନାଦେର୍ । ଆରେ ଇଲ୍ କାଜିଂ ଇମ୍ଣି ସବୁ ପାଟା କିନାଦେର୍, ହେ ସବୁ ବିତ୍ରେତାଂ ଦିଗ୍ନିପ ଦିଗି କଚଣ୍ କାଜିଂ କଡ଼େଗଟା ପାଟାଂ କିନାଦେର୍ । ଆରେ, ହେ କଡ଼େ ପାଟା ତାରେନ୍ ଚାଲିସ୍ ରୁପାନି ବାହା ଦୁୱେର୍କୁଟ୍ଲା କିନାଦେର୍; ର ପାଟା ତାରେନ୍ ହେବେନି ରି ପାନା କାଜିଂ ରି ବାହା ଦୁୱେର୍କୁଟ୍ଲା ଆରି ବିନ୍ବିନ୍ ପାଟା ତାରେନ୍ ପା ହେୱାଙ୍ଗ୍ନି ରି ରି କାଣା କିତି କାଜିଂ ରି ବାହା ଦୁୱେର୍କୁଟ୍ଲା ଆନାତ୍ । ଆରେ, ଇଲ୍ନି ବିନ୍ କଚଣ୍ କାଜିଂ ଉତର୍ ଦିଗ୍ତ କଡ଼େ ପାଟା ଆନାତ୍ । ର ପାଟା ତାରେନ୍ ରି ବାହା ଦୁୱେର୍କୁଟ୍ଲା ଆରି ବିନ୍ନିକା ପାଟା ତାରେନ୍ ରି ରି ବାହା ଦୁୱେର୍କୁଟ୍ଲା; ଇଲାକେ ରୁପାନି ଚାଲିସ୍ ବାହା ଦୁୱେର୍କୁଟ୍ଲା ଆନାତ୍ । ଇଲ୍ନି ୱେଡ଼ାହାନି ଦିଗିନିପ ପାଚ୍ ପାଡ଼୍କା କାଜିଂ ଚଅ ଗଟା ପାଟାଂ ଆନିକ୍ । ଆରେ, ଇଲ୍ନି ହେ ପାଚେନି ବାଗ୍ନି ରି କନାତ ରିଣ୍ଡାଙ୍ଗ୍ ପାଟା ଆନିକ୍ । ଇ କନାତ ମାନି ପାଟାଙ୍ଗ୍ ମେହାସି ଜପିନି ମୁଣ୍ଡି ପାତେକ୍ ମେହାନାତ୍, ରି କନାତ ମାନି ରି ପାଟା ଏଲେଂ ରଚ୍ୟା ଆନାତ୍ । ହେବେ ହେବେନି ପାଟା ଆଟ୍ ଗଟା ଆନିକ୍ ଆରି ହେବେ ସଉଲ ରୁପା ଦୁୱେର୍କୁଟ୍ଲା ଆନିକ୍, ର ପାଟା ତାରେନ୍ ରି ଦୁୱେର୍କୁଟ୍ଲା ଆରି ବିନେନି ପାଟା ତାରେନ୍ ରି ଦୁୱେର୍କୁଟ୍ଲା ଆନିକ୍ । ଆରେ ଏପ୍ ସିଟିମ୍ ମାର୍ନି ଆର୍ଗାଡ଼ା ଜାଲ୍ଦି କିନାଦେର୍; ଇଲ୍ନି ର କଚଣ୍ତ ପାଟାତ ପାଞ୍ଚ୍ ଗଟା ଆର୍ଗାଡ଼ା ଆରି ବିନ୍ କଚଣ୍ନି ପାଟାତ ପାଞ୍ଚ୍ ଗଟା ଆର୍ଗାଡ଼ା । ଆରି ତୁମ୍ନି ବିନ୍ କଚଣ୍ ପାଡ଼୍କା ଇଲ୍ନି ୱେଡ଼ାହାନି ନିପ୍ଣି ପାଚ୍ ବାଗାଂନି ପାଟାତ ପାଞ୍ଚ୍ ଆର୍ଗାଡ଼ା ଆନାତ୍ । ଆରେ ମାଦ୍ଣି ଆର୍ଗାଡ଼ା ପାଟାନି ମାଦ୍ଣି ବାହାତ ଇ ମୁଣ୍ଡାତାଂ ହେ ମୁଣ୍ଡା ପାତେକ୍ ଆହ୍ନାତ୍ । ଆରେ ହେ ସବୁ ପାଟା ହନାତ ଚାପାୟ୍କିନାଦେର୍ ଆରି ଆର୍ଗାଡ଼ା ହୁର୍ନି କାଜିଂ ହନା ହିକ୍ଡ଼ିଂ କିନାଦେର୍, ଆରେ, ଆର୍ଗାଡ଼ା ସବୁ ହନାତ ଚାପାୟ୍କିନାଦେର୍ । ଇ ବାନି ଇଲ୍ନି ଇମ୍ଣି ଉପାୟ୍ ମାଡ଼ିତ ମିଂ ଚଚ୍ୟା ଆତାତ୍ନା; ହେ ଇସାବ୍ରେ ହେଦାଂ ଜାଲ୍ଦି କିନାଦେର୍ । ଆରେ ଏପ୍ ନିଲ୍ୟା ବାନି, କଦା ବାନି, ହେନ୍ଦୁର୍ ବାନି ଆରି ନଟି ଡ଼ିଞ୍ଜ୍ନି କୱାଣ୍ ନୁଲ୍ତ ର ଏଡ଼ାତି ହେନ୍ଦ୍ରା ଜାଲ୍ଦି କିନାଦେର୍; ହେଦାଂ ରଚ୍ଚି କାମାୟ୍ତ କିରୁବର୍ତି ବାର୍ତିକିଂ କିୟାନାତ୍ । ଏପ୍ ହେଦାଂ ହନାତ ଚାପାୟ୍କିଜ଼ି ସିଟିମ୍ ମାର୍ନି ଚାର୍ ମୁଣ୍ଡା ଜପି ଟାଣାୟ୍ କିନାଦେର୍; ଆରେ, ରୁପାନି ଚାର୍ କାଣାକିତିକୁଟ୍ଲା ଜପି ହେୱାଙ୍ଗ୍ ହନାନି ଆକଡ଼ା ସବୁ କୁଚିକିନାଦେର୍ । ଆରେ, ଆକଡ଼ା ସବୁନି ତାରେନ୍ ଏଡ଼ାତି ହେନ୍ଦ୍ରା ଟାଣାୟ୍ କିଜ଼ି ହେ ଏଡ଼ାତି ହେନ୍ଦ୍ରା ବିତ୍ରେତାଂ ସାକି ଲାକେ ପେଡ଼ି ତେନାଦେର୍; ହେବେନି ହେ ଏଡ଼ାତି ହେନ୍ଦ୍ରା ପୁଇପୁୟା ବାହା ଆରି ମୁଡ଼୍ ପୁଇପୁୟା ବାହା ବିତ୍ରେ ଇଟ୍ନାକା ଆନାତ୍ । ଆରେ ଏପେଙ୍ଗ୍ ମୁଡ଼୍ ପୁଇପୁୟା ବାହାତ ସାକି ପେଡ଼ି ଜପି ପାପ୍ପ୍ଡାନାକା ଇଟ୍ନାଦେର୍ । ଏଡ଼ାତି ହେନ୍ଦ୍ରାନି ବାର୍ତ ପାଟା ଇଟ୍ନାଦେର୍ ଆରି ପାଟା ମୁମ୍ଦ ଇଲ୍ନି ଦିଗିନି ଦିଗିତ ବୈଟାଇଟ୍ନିମୁଣ୍ଡା ଇଟ୍ନାଦେର୍ ଆରି ଉତର୍ ଦିଗ୍ତ ପାଟା ଇଟ୍ନାଦେର୍ । ଆରେ, ଇଲ୍ନି ଦୁୱାର୍ କାଜିଂ ନିଲ୍ୟା, କଦା, ହେନ୍ଦର୍ ବାନି ଆରି ନଟି ଡ଼ିଞ୍ଜ୍ନି କୱାଣ୍ ନୁଲ୍ତାଂ ରଚ୍ଚି ଚିତ୍ରାକାବ୍ରା ର ଡାବାୟ୍କିନି ହେନ୍ଦ୍ରା ଜାଲ୍ଦି କିନାଦେର୍ । ହେ ଡାବାୟ୍କିନି ହେନ୍ଦ୍ରା କାଜିଂ ପାଞ୍ଚ୍ଗଟା ସିଟିମ୍ ମାର୍ନି ମୁଣ୍ଡା ରଚ୍ଚି କିଜ଼ି ହନା ଚାପାୟ୍କିନାଦେର୍, ଆରେ, ହନାତ ହେବେନି ଆକଡ଼ା କିନାଦେର୍ ଆରି ତା କାଜିଂ ପିତାଡ଼୍ନି ପାଞ୍ଚ୍ କାଣାକିତିକୁଟ୍ଲା ୱାକ୍ନାଦେର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.