Pengo Bible
ଜାତ୍ରା 25
ପୁଇପୁୟା ବାହା କାଜିଂ ଇନାମ୍
ଇଦାଂପାଚେ ନିତ୍ରେମାପ୍ରୁ ମସାଂ ଇଚାନ୍, “ଏନ୍ ଇସ୍ରାଏଲ୍ ମାଜ଼ିରିଂ ମା କାଜିଂ ଇନାମ୍ ରୁଣ୍ଡାୟ୍ କିଦେଂ ଇନା; ଇନେର୍ତି ମାନ୍ ଇନେରିଙ୍ଗ୍ ଇଚା କିୟ୍କିନାତ୍, ତାତାଂ ଏପେଙ୍ଗ୍ ମାଦାଂ ହେ ଇନାମ୍ ଇଟ୍ନାଦେର୍ । ଇଚିସ୍, ହନା, ରୁପା ଆରି ପିତାଡ଼୍; ଆରେ, ନିଲ୍ୟା ବାନି, କଦା ବାନି, ହେନ୍ଦର୍ ବାନି, ଡ଼ିଞ୍ଜ୍ନାକା କୱାଣ୍ହେନ୍ଦ୍ରା, ଅଡା ତେମୁଲ୍, ନେତେର୍କିତି ମେଣ୍ଡାନି ତଲ୍ ଆରି କୱାଣ୍ ତଲ୍, ୱାଡ଼ି ୱେଜ଼୍ଗୁ, ଅଜଡ଼୍ କାଜିଂ ଚିକାଣ୍ ଆରେ, ନେନ୍ଦି ଚିକାଣ୍ ଆରି ବାସ୍ନା ଦୁପ୍ନି କାଜିଂ ଗାନ୍ଦା ଜିନିସ୍, ଆରେ, ଏପଦ୍1 ଆରି ନେଞ୍ଜାଡାକି ହେନ୍ଦ୍ରା କାଜିଂ ଗରୁଚୁନା ମଣି ବାରବିନି ଡାଚ୍ଚି କାଲ୍; ଇ ୱିଜ଼ୁ ଇନାମ୍ ହେୱାର୍ତାଂ ଇଟ୍ନାଦେର୍ । ହେୱାର୍ ମା କାଜିଂ ର ପୁଇପୁୟା ବାହା ରଚେର୍: ପାଚେ ଆପ୍ ହେୱାର୍ ବିତ୍ରେ ବାହା କିନାପ୍ । ତୁମ୍ନି ଲେକାତାକା ଆରି ହେବେନି ୱିଜ଼ୁ ବାହାନି ଲେକାନି ଇମ୍ଣି ୱାରିନିକା ଆପ୍ ମିଂ ଚଚ୍ଚାନାପ୍, ହେ ଇସାବ୍ରେ ଏପେଙ୍ଗ୍ ୱିଜ଼ୁ କିନାଦେର୍ ।”
ନିୟମ୍ ପେଡ଼ି
ଆରେ, ହେୱାର୍ ରି ଆତ୍ ଆଦା ଲାମା, ର ଆତ୍ ଆଦା ଅହାର୍ ଆରି ର ଆତ୍ ଆଦା ଉଚା ୱାଡ଼ି ୱେଜ଼୍ଗୁନି ର ପେଡ଼ି ରଚ୍ନାର୍ । ହେବେ ଏପ୍ ନିର୍ମଲ୍ ହନାତ ହେଦାଂ ଚାପାୟ୍କିନାଦେର୍; ଆରେ, ହେବେନି ବିତ୍ରେ ଆରି ବାର୍ତ ପା ଚାପାୟ୍କିନାଦେର୍, ଆରେ, ତା ଜପିନି ଚାର୍ବେଣ୍ତିଂ ହନାନି ଗାର୍ କିନାଦେର୍ । ଆରେ, ହେଦାଂ କାଜିଂ ହନାନି ଚାରି ବାଡ଼ା ଚାଚ୍ତ ୱାକ୍ଚି ତା ଚାରି କନାତ ହିନାଦେର୍; ହେବେନି ର କଚଣ୍ତ ରି ବାଡ଼ା ଆରି ବିନ୍ କଚଣ୍ତ ରି ବାଡ଼ା ମାନ୍ଗାନାତ୍ । ଆରେ ଏପ୍ ସିଟିମ୍ ମାର୍ତ ରି କଣା କିଜ଼ି ହନାତ ଚାପାୟ୍କିନାଦେର୍ । ଆରେ, ପେଡ଼ି ପିଣ୍ଡ୍ନି କାଜିଂ ପେଡ଼ିନି ରି କଚଣ୍ନି ବାଡ଼ାତ ହେ କଣା ନେଚ୍ନାଦେର୍ । ହେ କଣା ପେଡ଼ିନି ବାଡ଼ାତ ମାନ୍ଗାନାତ୍, ହେବେତାଂ ଦାକୁଦେର୍ । ଆରେ, ଆପ୍ ମିଂ ଇମ୍ଣି ସାକିଆକି ହିଦ୍ନାପ୍, ହେଦାଂ ହେ ପେଡ଼ିତ ଇଟ୍ନାଦେର୍ ।
ଇଦାଂପଚେ ଏପ୍ ନିର୍ମଲ୍ ହନାତ ରି ଆତ୍ ଆଦା କେଇ ଲାମା ଡେଙ୍ଗା ଆରି ର ଆତ୍ ଆଦା ଅହାର୍ ର ପାପ୍ଡାବାୟ୍କିନାକା ରଚ୍ନାଦେର୍ । ଏପ୍ ହନାନି ରିଣ୍ଡି କିରୁବ2 ଜାଲ୍ଦି କିନାଦେର୍; ମୁଟ୍ଲା କାମାୟ୍ତ ହେଦାଂ ଜାଲ୍ଦି କିଜ଼ି ହେ ପାପ୍ଡାବାୟ୍କିତି ରି କାପ୍ଡ଼ାତ ହିନାଦେର୍ । ର କିରୁବ ର କାପ୍ଡ଼ାତ ଆରି ବିନ୍ କିରୁବ କାପ୍ଡ଼ାତ ରଚ୍ନାଦେର୍; ରି କିରୁବତିଂ ପାପ୍ଡାବାୟ୍କିନି ଲାହାଂ ମେହାନାକା ଆରି ହେବେନି କାନାତ ନିଲିକିଜ଼ି ରଚ୍ନାଦେର୍ । ଆରେ, କିରୁବିମ୍କୁ ହାରି ମୁମ୍ମାମ୍ ଆଜ଼ି ମାରା ଜପି ମେଲାକିଜ଼ି ପାପ୍ଡାବାୟ୍ ପ୍ଡାକ୍ନିକ୍: ପାପ୍ଡାବାୟ୍କିନି କାଜିଂ କିରୁବର୍ତି ମୁମ୍ ମାନ୍ଗାନାତ୍ । ଏପେଙ୍ଗ୍ ହେ ପାପ୍ଡାବାୟ୍କିନି ହେ ପେଡ଼ି ଜପି ଇଟ୍ନାଦେର୍, ଆରେ, ଆପ୍ ମିଂ ଇମ୍ଣି ସାକିଆକି ହିନାପ୍, ହେଦାଂ ହେ ପେଡ଼ି ବିତ୍ରେ ଇଟ୍ନାଦେର୍ । ଆରେ ଆପ୍ ହେ ବାହାତ ମି ଲାହାଂ ବେଟା ଆନାପ୍ ଆରି ପାପ୍ଡାବାୟ୍ନି ଜପ୍ଣି ବାଗ୍ତାଂ, ଇଚିସ୍, ସାକି ପେଡ଼ିନି ଜପ୍ଣି କିରୁବ ରିଣ୍ଡି ବିତ୍ରେତାଂ ମି ଲାହାଂ ବେଣ୍ କିଜ଼ି ଇସ୍ରାଏଲ୍ ହିମ୍ଣାଙ୍ଗ୍ ବିସ୍ରେ ମାଦାଂ ୱିଜ଼ୁ ବଲ୍ ମିଂ ୱେଚ୍ଚାନାପ୍ ।
ପର୍ମେସ୍ୱର୍ତି ହିଜ଼ିମାନି ରୁଟି କାଜିଂ ପାଟା
ତାପାଚେ ଏପ୍ ସିଟିମ୍ ମାର୍ତ ରି ଆତ୍ ଡେଙ୍ଗା ଆରି ର ଆତ୍ ଅହାର୍ ଆରି ରି ଆତ୍ ଉଚ୍ ର ପାଟା ରଚ୍ଚି ନିର୍ମଲ୍ ହନାତ ହେଦାଂ ଚାପାୟ୍କିନାଦେର୍, ଆରେ, ହେବେନି ଚାର୍ବେଣ୍ତାଂ ହନାନି ଅଟି କିନାଦେର୍ । ଆରେ, ହେବେନି ଚାର୍ବେଣ୍ତାଂ ଚାର୍ଅଙ୍ଗ୍ଲ୍ ଅହାର୍ନି ରଞ୍ଜି ହୁର୍ନାଦେର୍ ଆରି ହେ ହୁର୍ତି ଚାର୍ବେଣ୍ତାଂ ହନା ଅଟି କିନାଦେର୍ । ଆରେ ହନା ରଚ୍ଚି ଚାର୍ ବାଡ଼ା କିଜ଼ି ହେବେନି ଚାର୍ କାଲକୁ ଚାର୍ କନାତ ଇଟ୍ନାଦେର୍ । ପାଟା ପିଣ୍ଡ୍ନି କାଜିଂ କଣା ହୁର୍ନି କାଜିଂ ହେ ବାଡ଼ା ହୁର୍ତି କଚଣ୍ତ ମାନ୍ଗାନାତ୍ । ଆରେ, ହେ ପାଟା ପିଣ୍ଦେଂ ସିଟିମ୍ ମାର୍ କଣା ରଚ୍ଚି ହନାତ ଚାପାୟ୍କିନାଦେର୍ । ଆରେ, ତାଡ଼଼ିୟା, ହାରୁ ହାଟ୍ୱା ମଗ୍ ଆରି ୱାକ୍ନି କାଜିଂ କପା ରଚ୍ନାଦେର୍, ଇ ସବୁ ନିର୍ମଲ୍ ହନାତ ରଚ୍ନାଦେର୍ । ଏପ୍ ହେ ପାଟା ଜପି ମା ମୁମ୍ଦ ନିତ୍ରେ ଚଚ୍ନି ରୁଟି ଇଟ୍ନାଦେର୍ ।
ହନା ବୈଟାଇଟ୍ନି ମୁଣ୍ଡା
ଆରେ, ଏପ୍ ନିର୍ମଲ୍ ହନାନି ର ମୁଟ୍ଲା ବୈଟାମୁଣ୍ଡା ରଚ୍ନାଦେର୍; ହାରି କାମାୟ୍ତ ବୈଟା ଇଟ୍ନି ମୁଣ୍ଡା, ହେବେନି ଗାଣ୍ଡି ଆରି କେନ୍ଦାଙ୍ଗ୍ ରଚ୍ନାକା ଆନାତ୍; ଆରେ ଆକାର୍, ମଡ୍ଲା ଆରି ପୁଇ ହେବେ ମେହାନାତ୍ । ଇଚିସ୍, ହେବେ ର ପାଡ଼୍କାତାଂ ତିନ୍ ବୈଟାକେନ୍ଦାଙ୍ଗ୍ ଆରି ବିନ୍ ପାଡ଼୍କାତାମ ତିନ୍ ବୈଟାକେନ୍ଦାଙ୍ଗ୍, ଇଲାକେ ରି ପାଡ଼୍କାତାଂ ଚଅ କେନ୍ଦାଙ୍ଗ୍ ହନିକ୍ । ହେବେନି ର କେନ୍ଦାତ ରଙ୍ଗ୍ୱା ପୁଇବାନି ତିନ୍, ମଡ୍ଲା, ଆରି ପୁଇ ମାନ୍ଗାନାତ୍; ଆରେ ବିନ୍ ବୈଟାମାର୍ତାଂ (ବାଦାମ) ପୁଇ ତିନି ଆକାର୍, ମଣ୍ଡ୍ଲା ଆରି ମାନ୍ଗାନାତ୍; ହେ ବୈଟାମାର୍ତାଂ ହନି ଚଅ କେନ୍ଦାତ ଇଲାକେ ଆନାତ୍ । ମତର୍ ବୈଟାମାର୍ତ ବୁଇଚେଣାଂ ପୁଇବାନି ଚାର୍ ଆକାର୍, ମଡ୍ଲା, ଆରି ପୁଇ ମାନ୍ଗାନାତ୍; ଆରେ, ହେ ବୈଟାମାର୍ତାଂ ଇମ୍ଣି ଚଅ କେନ୍ଦାଙ୍ଗ୍ ହନିକ୍, ହେୱାଙ୍ଗ୍ତି ର କେନ୍ଦା ରିଣ୍ଡିନି ତାରେନ୍ ର ମଡ୍ଲା ଆରି ରିଣ୍ଡିନି ତାରେନ୍ ର ମଡ୍ଲା ଆରି ରିଣ୍ଡି କେନ୍ଦା ରିଣ୍ଡିନି ତାରେନ୍ ର ମଡ୍ଲା ଆରି ତିନ୍ କେନ୍ଦା ରିଣ୍ଡିନି ତାରେନ୍ ର ମଡ୍ଲା ମାନ୍ଗାନାତ୍ । ଆରେ, ମଡ୍ଲା, କେନ୍ଦା ହେବେନି ବାଗ୍ ଆନାତ୍ ଆରି ୱିଜ଼ୁ ନିର୍ମଲ୍ ହନାତ ରଚ୍ଚି ର କଲ୍ନାକା ମୁଟ୍ଲା କାମାୟ୍ ଆନାତ୍ । ଆରେ, ଏପେଙ୍ଗ୍ ତା କାଜିଂ ସାତ୍ ବୈଟାଂ ରଚ୍ନାଦେର୍; ହେବେ ମାନାୟାର୍ ହେ ବୈଟା ଆହିକିତିସ୍, ହେବେନି ମୁମ୍ଦ ଅଜଡ଼୍ ଆନାତ୍ ଆରି ନିର୍ମଲ୍ ହନାତ ହେବେନି ଚିମ୍ଟା ଆରି ରିକାଂ ଆହ୍ନାକା ରଚ୍ନାଦେର୍ । ଇ ବୈଟାମାର୍ ଆରି ହେବେନି ଜିନିସିଂ ସବୁଆଜ଼ି ର ତାଳନ୍ତ3 ନିର୍ମଲ୍ ହନାତ ରଚ୍ଚେଂ ଆନାତ୍ । ଜାଗ୍ରତ୍, ମାଡ଼ିତ ମିଂ ହେବେନି ଇମ୍ଣି ଇମ୍ଣି ହାର୍ଦାକା ଚଚ୍ୟାତାତ୍ନା, ହେଲାକେ ୱିଜ଼ୁ କିୟାଟ୍ ।
Source notes (3)
- Footnote ନେଞ୍ଜା ଡାକିତିଂ ଆର୍ପିସ୍ ମ୍ଡେଙ୍ଗାଂ ଗାଚ୍ୟାନି ତଲ୍ ବାର୍ତିନି କନା
- Footnote କିରୁବ ମାରାମାନି ଦୁତ୍
- Footnote ତାଳନ୍ତ ୩୫ କିଲଗ୍ରାମ୍
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.