Baghlayani Bible
नसीअता 22:6
Verse 6 is marked below, with the whole chapter around it. Read from the start
बऊत अमीर ऊणे ते खरा नाओं जादा चाह्णे जोगा ए,
ओर सूईने चाँदिए ते जादा ओरी री इज्जत ए।
अमीर ओर गरीब दोनो एकी-दूजे जेड़े ए
यहोवा तिना दुँईं खे बनाणे वाल़ा ए।
चलाक माणूं मुसीबता खे आऊँदा ऊआ देखी की एते ते बचणे री कोशिश करोए;
पर शरीफ लोक आगे बढ़ी की मुसीबता दे पड़ी की सजा पुगतोए।
नरम सबाओ रा ऊणा ओर यहोवे रा आदर करने रा ईनाम पैसा,
महिमा ओर लाम्बी उम्र ओई।
बुरे माणूंए खे बाटा दे कांडे ओर फन्दे ई मिलोए;
पर जो आपणा प्राण बचाओआ, से तिना ते दूर रओआ।
बाल़का खे सखाओ कि तिना किंयाँ जिऊणा चाईयो,
ओर सेओ इजी खे आपणियां पुरिया जिन्दगिया दे याद राखणा।1
अमीर माणूं गरीबा पाँदे राज करोआ,
ओर त्वार लणे वाल़ा, त्वार देणे वाल़े रा दास ओआ।
जो माणूं दूजेया खे दु:ख देणे रा कारण बणोआ,
से आपू खे पापो रा कारण बणोआ,
दया करने वाल़े माणूंए पाँदे यहोवे री आशीष रओई,
कऊँकि से आपणियां रोटिया बीचा ते गरीबा खे देओआ।2
दूजेया रा मजाक करने वाल़े खे निकयाल़ी दे, तेबे चगड़ा खत्म ऊई जाणा,
ओर बईस ओर बेज्जती दोनो खत्म ऊई जाणे।
जो माणूं आपणे मनो खे शुद्ध राखोआ,
ओर जेसरिया गल्ला मनो खे अच्छिया लगणे वाल़िया ओईया, राजा बी तेसखे आपणा दोस्त बणाओआ।
यहोवे री नजर हमेशा तिना पाँदे लगी री रओई जो समजदारी दखाओए,
पर से विश्वासघातिये रिया योजना खे बेकार करी देओआ।
आल़सी माणूं कामो ते टल़ोआ ओर बोलोआ, बारे तो शेर ऊणा!
आऊँ तेस चौको बीचे काई देणा।
गल़त काम करने वाल़िया जवाणसा रा मूँ डूग्गे खाते जेड़ा ए;
जेसते यहोवा गुस्सा ओआ, सेई तिदे पड़ोआ।
बच्चेया रा सबाओ ई मूर्खा जेड़ा ओआ,
पर जे तुसे तिना खे सजा देओए तो तिना मूर्खता रा काम करना बंद करी देणा।
जे तुसे अमीर लोका खे पेंट देओए या अमीर ऊणे रिया बजा ते गरीबा पाँदे अन्देर करोए,
तो तुसे आपू ई गरीब ऊई जाणे।
अक्लमंदो रिया गल्ला
त्यानो साथे अक्लमंदो रिया गल्ला सुण,
ओर मेरे ज्ञानो रिया गल्ला रिया तरफा खे मन लगा;
जे तूँ तिजी खे आपणे मनो रे राखे,
ओर इना खे याद करी की बोलेया बी करो, तो ये मनो खे अच्छी लगणे वाल़ी गल्ल ऊणी।
आऊँ आज इना गल्ला खे तांगे इजी खे बताणे लगी रा,
ताकि तेरा परोसा यहोवे पाँदे ओ।
मैं तेरिया तँईं ती वचन लिखी राखे,
तिदे ज्ञानो रिया गल्ला ओर खरिया सलाई रिया गल्ला ए।
ओर तेबे तुसा ये जाणी लणा कि सई दे सच्च क्या ए,
तेबे तुसे तिना खे ठीक ज्वाब देई सकोए जिने तुसे पेजी राखे।
केसी माणूंए खे गरीब देखी कि तेस पाँदे अन्देर नि करना,
जेसरी मताद करने वाल़ा कोई नि ए से अदाल़ती दे नि पीसणा।
कऊँकि यहोवे तिना रा मुकद्दमा आपू लड़ना,
ओर तेस तिना रे प्राण बी तेस छुड़ाई लणे जो तिना रा पैसा लूटी लओए।
तैं गुस्सा करने वाल़े माणूंए साथे दोस्ती नि करनी,
ओर ना चट गुस्सा करने वाल़े साथे जाणा,
केथी एड़ा नि ओ कि तूँ बी तेस जेड़ा ई बणी जाए,
ओर तेरे प्राण फन्दे दे फसी जाओ।
तिना लोका साथे नि मिली जाणा जो पैसे वापस करने रा वादा करोए,
कऊँकि सेओ पैसे वापस करने जोगे नि ए।
जे तांगे पैसे वापस देणे खे कुछ नि ओ,
तो जिने ताखे कर्जा देई राखेया तिना तां निठा ते माँजा बी खींजी की लई जाणा।
जो पुराणी सिऊँ तेरे बुजुर्गे ठराई राखी
तेसा खे टाई की आपणे पड़ोसिये री जमीना दे कब्जा नि करना।
जे तूँ एड़ा माणूं देखे जो काम करने रे माईर ए,
तो से राजे गे बी काम करी सकोए; छोटे लोका सामणे नि।
Source notes (2)
- Footnote इफिसि 6:4
- Footnote 2 कुरिन्थ 9:10
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.