Baghlayani Bible
गिणती 34
कनान देशो रा बन्ना
तेबे यहोवे मूसे खे बोलेया, “इस्राएलिया खे ये आज्ञा दे कि जेबे तुसे कनान देशो रे पऊँचो तेबे तुसा रे इस्से रा बन्ना जो तुसा आपणे अक्को रे पाणा, ये ऊणा। से चऊँ कनारला बन्ना कनान देशो रा ईंयाँ ठराई राखेया, तेबे तुसा रा दक्खणी देश सीन नाओं री सुनसाण जगा ते लई की एदोम देशो रे कनारे-कनारे रिये ऊँदा ऊआ चली जाओ ओर तुसा रा दक्खणी बन्ना खारे समुद्रो रे एकी कुणे ते शुरू ऊई की पच्छमा तक ओ; तेथा ते तुसा रा बन्ना अक्रब्बीम नाओं री चढ़ाईया री दक्खणा री तरफा खे पऊँची की मुड़ो ओर सीनो तक आओ ओर कादेशबर्ने री दक्खणा री तरफा खे निकल़ो ओर हसरधारो तक बढ़ी की अस्मोनो तक पऊँचो; फेर तिजी रा बन्ना अस्मोनो ते कूमी की मिस्रो री काट्टिया तक पऊँचो ओर तिजी रा आखरी बन्ना समुद्रो रे कनारे तक रणा।”
फेर तुसा रा पश्चिमी बन्ना महासागरो रा समुद्री कनारा ऊणा; येई तुसा रा पश्चिमी बन्ना ऊणा। तुसा रा उतरी बन्ना येई ओ; मतलब तुसे बड़े समुद्रो ते लई की होर पाह्ड़ो तक बन्ना बानणा; ओर होर पाह्ड़ो ते हमातो री काअटिया तक बन्ना बानणा ओर से सदादो तक निकल़ो; ओर से बन्ना जिप्रोनो ते लई की हसरेनानो तक पऊँचो; येई तुसा रा उत्तरी बन्ना ऊणा।
ओर तुसा रा पूर्वी बन्ना हसरेनानो से शपामो तक ऊणा; ओर से बन्ना शपामो ते ऐनो री पूर्वो री तरफा खे रिबला तक ए ओर तेथा ते थालो खे उतरदे-उतरदे किन्नेरेत1 नाओं रे तालो रे पूर्वो रे कनारे तक पऊँचो; ओर से बन्ना यरदन नदिया तक उतरी की खारे समुद्रो रे कनारे पाँदे निकल़ो। तुसा रे देशो रे चऊँ कनारले बन्ने येई ऊणे।
तेबे मूसे इस्राएलिया ते फेर बोलेया, “जेते देशो रे तुसे चिट्ठी पाई की अक्कदार ऊणे, ओर यहोवे तिजी खे साढ़े नौ गोत्रा रे लोका खे देणे री आज्ञा देई राखी, से येई ए; कऊँकि रूबेनो रे वंशो रे ओर गादो रे वंशो रे गोत्र तो आपणे-आपणे पितरा रे कुलो रे मुताबिक आपणे-आपणे इस्से री जमीन पाई चूकी रे ओर मनश्शे रे आदे गोत्रो रे लोक बी आपणा इस्सा पाई चूकी रे; मतलब तिना टाई गोत्रा रे लोक यरीहो रे नेड़े री यरदन नदिया रे पार पूर्व दिशा रे, जेथा ते त्याड़ा निकल़ोआ, आपणा-आपणा इस्सा पाई चूकी रे।”
देशो खे बाँडणे वाल़े
फेर यहोवे मूसे खे बोलेया, “एलीआजार पुरोईत ओर नूनो रा पाऊ यहोशू इना दुँईं जणेया तुसा लोका खे से जमीन बाँडणी। तैं जमीना खे बाँडणे रिया तँईं 12 गोत्रा बीचा ते एक-एक गोत्रो रा एक-एक परदान लणा। ओर इना इस्राएली मर्दा रे नाओं ये ए; मतलब यहूदा गोत्रो रा यपुन्ने रा पाऊ कालेब, शिमोन गोत्रो रे अम्मीहूदो रा पाऊ शेमूएल, बिन्यामीन गोत्रो रा परदान किसलोनो रा पाऊ एलीदाद, दानिया रे गोत्रो रा परदान योग्लिए रा पाऊ बुक्की, यूसुफो रा पाऊ मनश्शे रे गोत्रो रा परदान एपोदो रा पाऊ हन्नीएल, यूसुफो रा पाऊ एप्रैमो रे गोत्रो रा परदान शिप्तानो रा पाऊ कमूएल, जबूलूनो रे गोत्रो रा परदान पनार्को रा पाऊ एलीसापान, इस्साकारो रे गोत्रो रा परदान अज्जानो रा पाऊ पलतीएल, आशेरो रे गोत्रो रा परदान शलोमी रा पाऊ अहीहूद, ओर नप्तालिया रे गोत्रो रा परदान अम्मीहूदो रा पाऊ पदहेल।” यहोवे कनान देशो री जमीना खे इना मर्दा खे इस्राएलिया खे बाँडणे री आज्ञा दित्ती।
Source notes (1)
- Footnote किन्नेरेत किन्नेरेत मतलब गलीलो री झील
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.