Baghlayani Bible
गिणती 26
मोआब देशो रे इस्राएलिया री दूजी बार गिणती
एसा महामारिया ते बाद यहोवे मूसा ओर एलीआजार नाओं रे हारूण पुरोईतो रे पाऊए खे बोलेया, “इस्राएलिया री सारी मण्डल़िया रे जितणे बीई साला रे या तिजी ते ज्यादा उम्रा रे ऊणे ते इस्राएलिया बीचे युद्ध करने जोगे ए, तिना रे पितरा रे कराने रे मुताबिक तिना सबी री गिणती करो।”
तेबे मूसा ओर एलीआजार पुरोईते यरीहो रे नेड़े यरदन नदिया रे कनारे पाँदे मोआबो रे मैदानो रे तिना खे बोलेया कि 20 साल ओर तिजी ते ज्यादा उम्रा रे लोका री गिणती करो, जेड़ी कि यहोवे मूसा ओर इस्राएलिया खे मिस्र देशो ते निकल़ी जाणे रे बखते आज्ञा दित्ती थी।
रूबेन जो इस्राएलो रा जेठा पाऊ था; तेसरे यो पाऊ थे; हनोक जेसते हनोकिया रा कुल चलेया ओर पल्लू, जेसते पल्लूईया रा कुल चलेया; हेस्रोन, जेसते हेस्रोनिया रा कुल चलेया ओर कर्मी जेसते कर्मिया रा कुल चलेया। रूबेन गोत्रो वाल़े कुल येई थे ओर इना बीचा ते जो गिणे गए सेयो 43 ह्जार 730 मर्द थे। ओर पल्लूए रा पाऊ एलीआब था।
एलीआबो रे पाऊ नमूएल, दातान ओर अबीराम थे। ये इस्राएलिया रे जरीये चूणे रे मर्द थे ओर जेस बखते कोरह री मण्डल़िए यहोवे ते चगड़ा कित्तेया था, तेस बखते तेसा मण्डल़िया ते मिली की सेयो बी मूसा ओर हारूणो ते चगड़े थे; ओर जेबे तिना 250 माणूंआ रा आगी रे फूकी की स्वा ऊई जाणे ते से मण्डल़ी राची गी, तेसी बखते तरतिए आपणा मूँ खोली की मतलब तरती फटी की कोरह समेत सेयो बी निगल़ी ते ओर सेयो एक उदारण ठईरे। पर कोरह रे पाऊ नि मरे थे।
ये आपणे-आपणे कुलो रे मुताबिक शिमोनो रे पाऊ थे; नमूएल, जेसते नमूएलियो रा कुल चलेया ओर यामीन, जेसते यामनिया रा कुल चलेया ओर याकीन जेसते याकनिया रा कुल चलेया; ओर जेरह, जेसते जेरहियो रा कुल चलेया ओर शाऊल, जेसते शाऊलो रा कुल चलेया। शिमोनो रे कुलो ते येई थे; इना बीचा ते 22 ह्जार 200 मर्द गिणे गए।
ये आपणे-आपणे कुलो रे मुताबिक गादो रे पाऊ थे; सपोन, जेसते सपोनिया रा कुल चलेया ओर हाग्गी, जेसते हाग्गिया रा कुल चलेया ओर शूनी, जेसते शूनिया रा कुल चलेया ओर ओजनी, जेसते ओजनिया रा कुल चलेया; ओर एरी, जेसते एरिया रा कुल चलेया ओर अरोद, जेसते अरोदियो रा कुल चलेया; ओर अरेली, जेसते अरेलियो रा कुल चलेया। गाद गोत्रो रे कुल येई थे; इना बीचा ते 40 ह्जार 500 मर्द गिणे गए।
यहूदा रे एर ओर ओनान नाओं रे पाऊ तो ऊए, पर सेयो कनान देशो रे मरीगे। ओर यहूदा रे जिना पाऊआ ते तिना रे जो कुल निकल़े सेयो ये थे; मतलब शेला, जेसते शेलिया रा कुल चलेया ओर पेरेस, जेसते पेरेसियो रा कुल चलेया ओर जेरह, जेसते जेरहियो रा कुल चलेया। पेरेसो रे पाऊ ये थे; मतलब हेस्रोन, जेसते हेस्रोनिया रा कुल चलेया ओर हामूल, जेसते हामूलिया रा कुल चलेया। ये यहूदा रे गोत्र थे; जिना रे 76 ह्जार 500 मर्द थे।
इस्साकारो रे पाऊ जिना ते तिना रे कुल निकल़े सेयो ये थे; मतलब तोला, जेसते तोलियो रे कुल चले ओर पुव्वा, जेसते पुव्विया रे कुल चले; ओर याशूब, जेसते याशूबिया रा कुल चलेया ओर शिम्रोन, जेसते शिम्रोनिया रा कुल चलेया। इस्साकार गोत्रो रे कुल येई थे; जिना रे 64 ह्जार 300 मर्द गिणे गए।
जबूलूनो रे पाऊ जेसते तिना रे कुल निकल़े सेयो ये थे; मतलब सेरेद जेसते सेरेदिया रा कुल चलेया ओर एलोन, जेसते एलोनिया रा कुल चलेया ओर यहलेल, जेसते यहलेलिया रा कुल चलेया। जबूलून गोत्रो रे कुल येई थे; इना बीचा ते 60 साठ ह्जार 500 मर्द गिणे गए।
यूसुफो रे पाऊ जेसते तिना रे कुल निकल़े सेयो मनश्शे रे ओर एप्रैम थे। मनश्शे रे पाऊ ये थे; मतलब माकीर, जेसते माकीरिया रा कुल चलेया ओर माकीरो ते गिलाद जम्मेया ओर गिलादो ते गिलादिया रा कुल चलेया। गिलादो रे तो पाऊ ये थे; मतलब ईएजेर, जेसते ईएजेरियो रा कुल चलेया; हेलेक, जेसते हेलेकिया रा कुल चलेया; अस्रीएल, जेसते अस्रीएलिया रा कुल चलेया ओर शेकेम, जेसते शकेमिया रा कुल चलेया; शमीदा, जेसते शमीदिया रा कुल चलेया; हेपेर, जेसते हेपेरियो रा कुल चलेया; ओर हेपेरो रे पाऊ सलोफादो रे पाऊ नि, पर बेटिया ई ऊईया। इना बेटिया रे नाओं महला, नोवा, होग्ला, मिल्का ओर तिर्सा ए। मनश्शे गोत्रो रे कुल येई थे ओर इना बीचा ते जो गिणे गए सेयो 52 ह्जार 700 मर्द थे।
एप्रैमो रे पाऊ जिना ते तिना रे कुल निकल़े सेयो ये थे; मतलब शूतेलह, जेसते शूतेलहिया रा कुल चलेया ओर बेकेर, जेसते बेकेरियो रा कुल चलेया ओर तहन जेसते तहनिया रा कुल चलेया। ओर शूतेलह रे ये पाऊ ऊआ; मतलब एरान, जेसते एरानिया रा कुल चलेया। एप्रैमिया रे कुल येई थे; इना बीचा ते 32 ह्जार 500 मर्द गिणे गए। आपणे-आपणे गोत्रो रे मुताबिक यूसुफो रे पाऊ येई थे।
ओर बिन्यामीनो रे पाऊ जिना ते तिना रे कुल निकल़े सेयो ये थे; मतलब बेला जेसते बेलियो रा कुल चलेया ओर अशबेल, जेसते अशबेलिया रा कुल चलेया ओर अहीराम, जेसते अहीरामिया रा कुल चलेया; शपूपाम, जेसते शपूपामियो रा कुल चलेया ओर हूपम, जेसते हूपमिया रा कुल चलेया। ओर बेला रे पाऊ अर्द ओर नामान थे ओर अर्दो ते तो अर्दिया रा कुल ओर नामानो ते नामानियो रा कुल चलेया। आपणे-आपणे गोत्रो रे मुताबिक बिन्यामीनी येई थे ओर इना बीचा ते जो गिणे गए सेयो 45 ह्जार 600 मर्द थे।
दानो रा पाऊ जेसते तिना रा कुल निकल़ेया ये था; मतलब शुहाम, जेसते शुहामिया रा कुल चलेया ओर दानो रा कुल येई था ओर शुहामिया रे कुलो बीचा ते जो गिणे गए तिना रे कुलो रे 64 ह्जार 400 मर्द थे। ओर आशेरो रे पाऊ जेसते तिना रे कुल निकल़े सेयो ये थे; मतलब यिम्ना, जेसते यिम्निया रा कुल चलेया; यिश्वी, जेसते यिश्वया रा कुल चलेया ओर बरीआ, जेसते बरीइयों रा कुल चलेया। फेर बरीआ रे ये पाऊ ऊए; मतलब हेबेर, जेसते हेबेरियो रा कुल चलेया ओर मल्कीएल, जेसते मल्कीएलिया रा कुल चलेया। आशेरो री एक बेटी बी थी जेसा रा नाओं सेरह था। आशेरिया रे येई कुल थे; इना बीचा ते 53 ह्जार 400 मर्द गिणे गए।
नप्ताली रे पाऊ जेसते तिना रे कुल निकल़े सेयो ये थे; मतलब यहसेल, जेसते यहसेलिया रा कुल चलेया ओर गूनी, जेसते गूनियो रा कुल चलेया; येसेर, जेसते येसेरिया रा कुल चलेया ओर शिल्लेम, जेसते शिल्लेमिया रा कुल चलेया। आपणे-आपणे गोत्रो रे मुताबिक नप्ताली रे कुल येई थे ओर इना बीचा ते जो गिणे गए सेयो 45 ह्जार 400 मर्द थे। सबी इस्राएलिया बीचे जो गिणे गए थे सेयो येई थे; मतलब 6 लाख एक ह्जार 730 मर्द थे।
चिट्ठी पाई की जमीना रा बटवारा
तेबे यहोवे मूसे खे बोलेया, “इना खे, इना रे नाओं री गिणतिया रे मुताबिक, से जमीन इना रा इस्सा ऊणे खे बांडी जाओ। मतलब जेस कुलो रे ज्यादा नाओं ओ तिना खे ज्यादा इस्सा ओर जिना रे कम नाओं ओ तिना खे थोड़ा इस्सा देणा; हर एक गोत्रो खे तेसरा इस्सा तेसरे गिणे रे लोका रे मुताबिक दित्तेया जाओ। पर देश चिट्ठी पाई की बाँडेया जाओ; इस्राएलिया रे पितरा रे एकी-एकी गोत्रा रे नाओं रे मुताबिक जमीना रे आपणा-आपणा इस्सा पाओ। तिना री जमीना रा इस्सा बड़े ओर छोटे कुलो बीचे चिट्ठी पाई की बाँडेया जाओ।”
लेवी कुल
फेर लेवी गोत्रो बीचा ते जो आपणे कुलो रे मुताबिक गिणे गए सेयो यो ए; मतलब गेर्शोन, जेसते गेर्शोनियो रा कुल निकल़ेया; कहात, जेसते कहातिया रा कुल निकल़ेया ओर मरारी, जेसते मरारिया रा कुल निकल़ेया। लेविया रे गोत्र यो ए; मतलब लिब्निया रा कुल, हेब्रोनियो कुल, महलियो कुल, मूशिया रा कुल ओर कोरहिया रा कुल। कहातो ते अम्राम पैदा ऊआ। ओर अम्रामो री लाड़िया रा नाओं योकेबेद ए, से लेविया रे वंशो री थी जो लेविया रे वंशो रे मिस्र देशो रे पैदा ऊई थी ओर तेसे अम्रामो ते हारूण ओर मूसा ओर तिना री बईण मरियम पैदा कित्ती। ओर हारूणो ते नादाब, अबीहू, एलीआजार ओर ईतामार पैदा ऊए। पर नादाब ओर अबीहू तो तेस बखते मरीगे थे, जेबे सेयो यहोवे रे सामणे आपू बाल़ी री पाँदली आग लईगे थे। सारे लेवी गोत्रो बीचा ते जो गिणे गए, जिना बीचा ते जितणे मर्द एक मीन्ने रे या तिजी ते ज्यादा उम्रा रे थे, सेयो 23 ह्जार थे; सेयो इस्राएलिया बीचे इजी खे नि गिणे गए, कऊँकि तिना खे देशो रा कोई इस्सा नि देई राखेया था।
कालेब ओर यहोशूए रा जिऊँदा रणा
मूसा ओर एलीआजार पुरोईत जिने मोआबो रे मैदानो रे यरीहो गे यरदन नदिया रे कनारे पाँदे इस्राएली गिणी ले, तिना रे गिणे रे लोक इतणे ई थे। पर जिना इस्राएलिया खे मूसे ओर हारूण पुरोईते सीनै पाह्ड़ो री सुनसाण जगा रे जेबे गिणेया था, तिना बीचा ते एक बी मर्द तेस बखतो रे गिणे रेया बीचे नि था। कऊँकि यहोवे तिना इस्राएलिया रे बारे दे बोलेया था, “सेयो पक्का सुनसाण जगा रे मरी जाणे।” तेबेई यपुन्ने रा पाऊ कालेब ओर नूनो रे पाऊ यहोशूए खे छाडी की, तिना बीचा ते एक बी मर्द नि बचेया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.