Baghlayani Bible

गिणती 25

इस्राएलिया रा वेश्यागमन ओर तेसरी सजा

इस्राएली शित्तीमो रे रणे लगी रे थे ओर सेयो लोक मोआबी बेटिया साथे गल़त काम करने लगे।1 जेबे तिने जवाणसे तिना लोका खे आपणे देवतेया रे यज्ञ रे बुलाया, तेबे तिने लोके तिना साथे खाई की तिना रे देवतेया री पूजा कित्ती।2 ईंयाँ इस्राएली बालपोर देवते खे पूजणे लगे। तेबे यहोवे रा गुस्सा इस्राएलो पाँदे पड़केया;3

ओर यहोवे मूसे खे बोलेया, “इना लोका रे सबी परदाना खे पकड़ी की मां यहोवे रे सामणे दिनो री तूपा रे लटकाओ, ताकि जो मां यहोवे रा गुस्सा पड़की रा से इस्राएलो पाँदा ते दूर ऊई जाओ।”

तेबे मूसे इस्राएली न्यायिया खे बोलेया, “तुसा रे लोका बीचा ते जो-जो आदमी बालपोर देवते साथे मिली गे रे तिना खे एड़ी सजा देओ कि सेयो मरी जाओ।”

जेबे इस्राएलिया री सारी मण्डल़ी मिलणे वाल़े तम्बूए रे दरवाजे पाँदे रोणे लगी री थी, तो एक इस्राएली मर्द मूसा ओर सबी लोका री आखी रे सामणे एक मिद्यानी जवाणसा खे आपू साथे लईगा। ये देखी की एलीआजारो रा पाऊ पीनहास, जो हारूण पुरोईतो रा पोता था, तिने मण्डल़िया बीचा ते उठी की आथो रे एक बड़छी लई, ओर तेस इस्राएली मर्दो रा डेरे रे जाणे ते बाद से बी पीतरे गया ओर तेस मर्दो ओर तेसा जवाणसा रे पेटो रे बड़छी बाई ती। ईंयाँ इस्राएलिया बीचे जो महामारी फैली री थी से रूकी गी। तदुओ तक महामारिया रिया बजअ ते 24 ह्जार माणूं मरीगे थे।4 तेबे यहोवे मूसे खे बोलेया, “हारूण पुरोईतो रा पोता एलीआजारो रा पाऊ पीनहास, जेसखे इस्राएलिया बीचे मेरी जेड़ी जल़न ऊई, तिने मेरी जल़न तिना पाँदा ते एथो तक दूर करी ती कि आँऊ जल़नी रे मारे बी तिना खे मारी नि सकेया। इजी खे पीनहासो खे बोलो कि आँऊ तेस साथे शान्तिया रा वादा करूँआ; ओर ये तेसखे ओर तेसते बाद तेसरे वंशो खे सदा री पुरोईतो रे पदो री वाचा ऊणी, कऊँकि तिने आपणे परमेशरो रा मान राखणे खे उत्साह दखाया ओर तिने इस्राएलिया रिया तँईं प्राश्चित कित्तेया।” जो इस्राएली मर्द मिद्यानी जवाणसा साथे काया, तेसरा नाओं जिम्री था, से सालू रा पाऊ ओर शिमोनो रे कुलो बीचा ते आपणे पितरा रे कराने रा परदान था। ओर जो मिद्यानी जवाणस कायी तेसा रा नाओं कोजबी था, से सूरो री बेटी थी, जो मिधानी पितरा रे कराने रे लोका रा परदान था।

तेबे यहोवे मूसे खे बोलेया, “मिद्यानिया खे दुश्मणा जेड़े दुःख दे ओर तिना खे मार; कऊँकि पोरो रे बारे दे ओर कोजबी रे बारे दे सेयो तुसा खे तोखा देई की दुःख देओए।” कोजबी तो एक मिद्यानी परदानो री बेटी ओर मिधानिया री जाति बईण थी ओर पोरो री पूजा री बजअ ते फैली री महामारिया रे दिना रे से काईती।

Source notes (4)

Footnote 1 कुरिन्थ 10:8
Footnote प्रकाशित 2:14
Footnote प्रकाशित 2:20
Footnote 1 कुरिन्थ 10:8

Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.