Baghlayani Bible
लेवी बिधान 2
नज्जो री बलिया री बिधि
जेबे कोई माणूं यहोवे खे नज्जो री बलिया रा चढ़ावा चढ़ाणा चाओगा, तो से मैदा चढ़ाओ ओर तिजी पाँदे तेल पाई की तिजी पाँदे लोबान राखो; ओर से तिजी खे हारूणो रे पाऊआ गे जो पुरोईत ए ल्याओ। तेबे पुरोईत नज्जो री बलिया रे तेल मिले रे मैदे बीचा ते ईंयाँ आपणी मुट्ठी परी की निकयाल़ो कि सारा लोबान तिदे आई जाओ ओर पुरोईत तिजी खे याद दलाणे वाल़े इस्से खे बेदिया पाँदे फूको, ताकि ये यहोवे खे आगी रे चढ़ाई री सुख देणे वाल़ी खुशबू ठईरो। ओर नज्जो री बलिया बीचा ते जो बचोगा से हारूण ओर तेसरे पाऊआ रा ऊणा; से यहोवे खे आगी रे चढ़ाई री बलिया बीचा ते परम पवित्र इस्सा ऊणा।
जेबे तूँ नज्जो री बलि करने खे तन्दूरो रे पकाया रा चढ़ावा चढ़ाए, तो से तेलो साथे मिले रे मैदे रे बिना सजेड़े रे फुलके या तेलो साथे चोपड़ी री बिना सजेड़े री रोटिया रा ओ। जे तेरा चढ़ावा तवे पाँदे पकाई री नज्जो री बलि ओ, तो से तेलो साथे मिले रे ताजा बिना सजेड़े रे मैदे रा ऊणा चाईयो; तिजी रे टुकड़े-टुकड़े करी की तिजी पाँदे तेल पाणा, तेबे से नज्जो री बलि ऊई जाणी।
ओर जे तेरा चढ़ावा कढ़ाईया रे तल़ेया रा नज्जो री बलि ओ, तो से मैदे साथे तेलो रे बनाणा।
जो नज्जो री बलि इना चीजा बीचा ते किजी री बणी री ओ से यहोवे रे नेड़े लई जाणी ओर जेबे तिजी खे पुरोईतो गे ल्यायो, तेबे पुरोईत तिजी खे बेदिया रे नेड़े लई जाओ। ओर पुरोईत नज्जो री बलिया बीचा ते याद दलाणे वाल़ा इस्सा निकयाल़ी की बेदिया पाँदे फूको, ताकि से यहोवे खे आगी रे चढ़ाई री सुख देणे वाल़ी खुशबू ठईरो; ओर नज्जो री बलिया बीचा ते जो बचोगा से हारूण ओर तेसरे पाऊआ रा ऊणा; से यहोवे खे आगी रे चढ़ाई री बलिया बीचा ते परम पवित्र इस्सा ऊणा।
जो कुछ नज्जो री बलि तुसे यहोवे खे चढ़ाओ, से सजेड़े साथे बणाई री नि ऊणी चाईयो; तुसे यहोवे खे आगी रे चढ़ाई री बलिया रे रूपो रे सजेड़ा या सईत नि बाल़ना।
तुसे इना चीजा खे पईली फसला रा चढ़ावा करी की यहोवे खे ल्याई सकोए, पर यो सुख देणे वाल़ी खुशबूआ खे बेदिया पाँदे नि चढ़ाणी। आपणी कोई नज्जो री बलि आपणे परमेशरो साथे बानी री वाचा रे लूणो ते बिना ऊणे नि देणी; आपणियां सारिया नज्जो री बलिया लूणकिया बनाणियां; इजी खे आपणे सारे चढ़ावे रे लूण मलाणा।
जे तूँ यहोवे खे पईलिया फसला री नज्जो री बलि चढ़ाए, तो आपणी पईली फसला री नज्जो री बलिया खे आगी रे पूजे रे अरे-अरे सिल्ले, मतलब अरे-अरे सिल्ले मल़ी की निकयाल़ी लणे, तेबे नज्ज चढ़ाणा। ओर तिदे तेल ओर तिजी पाँदे लोबान राखणा; तेबे से नज्जो री बलि ऊई जाणी। ओर पुरोईत मल़ी की निकयाल़े रे नज्जो खे ओर तेलो खे सारे लोबानो साथे याद दलाणे वाल़ा इस्सा होमबलि करी की फूकी देओ; से यहोवे खे आगी रे चढ़ाई री बलि ठईरो।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.