Baghlayani Bible
लेवी बिधान 3
मेलबलिया री बिधि
जे तुसे आपणे गाय-बल़दा बीचा ते नर या मादा केसी खे यहोवे रे सामणे मेलबलि करी की चढ़ाणा चाओ, तो से डांगर बिना नुक्शो रा ओ। ओर से माणूं आपणा आथ आपणे चढ़ावे रे डांगरो रे सिरो पाँदे राखणे ते बाद तिजी खे मिलणे वाल़े तम्बूए रे द्धारो पाँदे बलि करो; तेबे हारूणो रे पाऊ जो पुरोईत ए सेयो तेसरे खूनो खे बेदिया रे चऊँ कनारे छिड़को। से मेलबलिया बीचा ते यहोवे खे आगी रे बलि चढ़ाओ, मतलब जेते चर्बिया साथे आंजा टखी रिया रओईया ओर जो चर्बी तिना रे लिपटी री रओई, ओर दोनो गुर्दे ओर तिना पाँदली चर्बी जो लको गे ओई ओर गुर्देया समेत काल़जे पाँदली झिल्ली, इना सबी खे से लग करो। तेबे हारूणो रे पाऊ इना खे बेदिया पाँदे तेसा होमबलिया पाँदे फूको, जो तिना लकड़ूआ पाँदे ऊणी जो आगी पाँदे ए, ताकि ये यहोवे खे आगी रे चढ़ाई री सुख देणे वाल़ी खुशबू ठईरो।
जे यहोवे खे कोई आपणियां पेडा-बाकरिया बीचा ते मेलबलि चढ़ाणा चाओ तो चाए से नर ओ, चाए मादा, पर से बिना नुक्शो रा ई चढ़ाओ। जे तुसे मिन्टूआ खे चढ़ाओ, तो तेसखे यहोवे रे सामणे चढ़ाओ, ओर तुसे आपणे चढ़ावे रे डांगरो रे सिरो पाँदे आथ राखणा ओर तिजी खे मिलणे वाल़े तम्बूए रे सामणे बलि करो; फेर हारूणो रे पाऊ तेसरे खूनो खे बेदिया रे चऊँ कनारे छिड़को।
तेबे बिना नुक्शो रा मेलबलिया बीचा ते यहोवे खे आगी रे बलि चढ़ाओ ओर तेसरी चर्बिया साथे परी री मोटी पूँछा खे से रीढ़ा री आड्डिया ते लग करो ओर तिना आंजा खे जो चर्बिया रे लिपटी री रओई, ओर दोनो गुर्दे ओर जो चर्बी तिना पाँदे लको गे ओई ओर गुर्देया समेत कल़ेजे पाँदली झिल्ली, इना सबी खे से लग करो। ओर एक पुरोईत इना खे बेदिया पाँदे यहोवे खे आगी रे बलि करी की फूको।
जे से बाकरा या बाकरी चढ़ाओ, तो तिजी खे यहोवे रे सामणे ल्याओ। ओर से आपणे चढ़ावे रे डांगरो रे सिरो पाँदे आपणा आथ राखो ओर तिजी खे मिलणे वाल़े तम्बूए रे सामणे बलि करो ओर हारूणो रे पाऊ तेसरे खूनो खे बेदिया रे चऊँ कनारे छिड़को।
तेबे से तिजी बीचा ते आपणा चढ़ावा यहोवे खे आगी रे बलि करी की चढ़ाओ; जेते चर्बिया साथे आंजा टखी रिया रओईया। ओर दोनो गुर्दे ओर जो चर्बी तिना पाँदे लको गे ओई ओर गुर्देया समेत कल़ेजे पाँदली झिल्ली, इना सबी खे से लग करो। ओर पुरोईत इना खे बेदिया पाँदे आगी रे बलि करी की फूको जो यहोवे खे सुख देणे वाल़ी खुशबू ओई; कऊँकि सारी चर्बी यहोवे रिये। ये तुसा रे रणे रिया जगा रे तुसा री पीढ़िया-पीढ़िया खे सदा री रवाज ठईरनी कि तुसे चर्बी ओर खून कदी नि खाओ।1
Source notes (1)
- Footnote प्रेरित 15:20,29
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.