Baghlayani Bible
लेवी बिधान 1
होमबलिया री बिधि
यहोवे मिलणे वाल़े तम्बूए बीचा ते मूसे खे बुलाई की एड़ा बोलेया, “इस्राएलिया खे बोल कि तुसा बीचा ते जे कोई माणूं यहोवे खे डांगरा रा चढ़ावा चढ़ाणा चाओआ, तो तेसरा बलिया रा डांगर गाय-बल़द या पेडा-बाकरिया बीचा ते एकी रा ओ।”
जे से गाय-बल़दा बीचा ते होमबलि करो, तो बिना नुक्शो रे नर मिलणे वाल़े तम्बूए रे द्धारो पाँदे चढ़ाओ, ताकि यहोवा तिजी खे ग्रहण करो। तुसे आपणा आथ होमबलिए रे डांगरो रे सिरो पाँदे राखणा ओर से तुसा री बजअ ते तिना खे प्राश्चित करने खे मानेया जाणा।
तेबे से तेस बाच्छूए खे यहोवे री मौजुदगिया रे बलि करो; ओर हारूणो रे पाऊ जो पुरोईत ए सेयो खूनो खे नेड़े लई जाई की तिजी खे बेदिया रे चऊँ कनारे छिड़को जो मिलणे वाल़े तम्बूए रे द्धारो पाँदे ए। तेबे तुसे होमबलिया रे डांगरो री खाल निकयाल़ी की तेस डांगरो रे टुकड़े-टुकड़े करी देणे; इजी ते बाद हारूण पुरोईतो रे पाऊ बेदिया पाँदे आग राखो ओर आगी पाँदे लकड़ू ठीक टंगो रे राखो; फेर हारूणो रे पाऊ जो पुरोईत ए सेयो सिर ओर चर्बिया समेत डांगरो रे टुकड़ेया खे तिना लकड़ूआ पाँदे जो बेदिया री आगी पाँदे ए ठीक टंगो रे राखो; ओर तुसे तेसरी आंजा ओर पैर पाणिए साथे तोणे। तेबे पुरोईत सबी खे बेदिया पाँदे फूको, ताकि से आगी रे चढ़ाई री बलि यहोवे खे सुख देणे वाल़ी खुशबू ठईरो।
जे तुसे मिन्टूआ या बाकरेया रे चूण्डो बीचा ते होमबलि चढ़ाओ, तो बिना नुक्शो रे नरो खे चढ़ाओ। ओर तुसे तिजी खे यहोवे रे आगे बेदिया रे उत्तरो रिया तरफा खे बलि करो; ओर हारूणो रे पाऊ जो पुरोईत ए सेयो तेसरे खूनो खे बेदिया रे चऊँ कनारे छिड़को। ओर तुसे तेसरे सिर ओर चर्बिया समेत टुकड़े-टुकड़े करने ओर पुरोईत इना सबी खे तिना लकड़ूआ पाँदे ठीक टंगो रे राखो, जो बेदिया री आगी पाँदे ऊणी; तुसे तेसरी आंजा ओर पैर पाणिए साथे तोणे; फेर पुरोईत इना सबी खे बेदिया पाँदे फूको, ताकि से आगी रे चढ़ाई री बलि यहोवे खे सुख देणे वाल़ी खुशबू ठईरो।
जे तुसे यहोवे खे पंछिया रा होमबलि चढ़ाओ, तो कूगिया या कबूतरा रा चढ़ावा चढ़ाणा।
पुरोईत तिजी खे बेदिया रे नेड़े लई जाई की तेसरा गल़ा मरोड़ी देओ ओर तेसरा सारा खून बेदिया रे कनारे पाँदे सेटेया जाओ; फेर तिजी खे बेदिया पाँदे फूको; ओर से तेसरी पोटीया खे गन्दो साथे निकयाल़ी की बेदिया री पूर्वो रिया तरफा खे स्वा सेटणे रिया जगा रे सेटी देओ; ओर से तेसखे पंखो बीचा ते फाड़ो, पर लग-लग नि करो। तेबे पुरोईत तिजी खे बेदिया पाँदे तिना लकड़ूआ पाँदे राखी की फूको ताकि से आगी रे चढ़ाई री बलि यहोवे खे सुख देणे वाल़ी खुशबू ठईरो।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.