Baghlayani Bible
न्यायियो 12
यिप्तह ओर एप्रैम गोत्रो रे लोका रा चगड़ा
तेबे एप्रैम गोत्रो रे कुछ लोक कट्ठे ऊई की सापोन शईरो खे जायी की यिप्तह खे बोलणे लगे, “जेबे तूँ अम्मोनिया साथे लड़ने खे गया, तेबे तैं तिना ते लड़ने खे आपू साथे आसे कऊँ नि बुलाए? एबे आसा तूँ ओर तेरा कअर दोनो फूकी देणे।” यिप्तहे तिना खे बोलेया, “मेरा ओर मेरे लोका रा अम्मोनिया साथे बऊत चगड़ा ऊआ था; ओर जेबे मैं तुसा ते मताद मांगी, तेबे तुसे मेरी मताद करने खे नि आए। पर जेबे मैं ये जाणी ला कि तुसे मेरी मताद करने खे नि आऊणे लगी रे तेबे आऊँ आपू ई अम्मोनिया रे खलाफ लड़ने खे चलेया ओर यहोवे तिना खे अराणे दे मेरी मताद कित्ती; फेर तुसे आज मां साथे लड़ने खे कऊँ आयी रे?” तेबे यिप्तह गिलादो रे सारे सिपाईया खे कट्ठे करी की एप्रैमो रे सिपाईया साथे लड़ेया, ओर सेयो काईते। कऊँकि एप्रैमो रे सिपाई जो ये बोलो थे, “ओ गिलादियो, तुसे तो एप्रैम ओर मनश्शे बीचे रणे वाल़े एप्रैमो रे नठे दे लोक ए।” ओर गिलादो रे लोके यरदन नदिया रा कनारा एप्रैमो रे सिपाईया रे पार जाणे ते पईले आपणे कब्जे दे करी ता ओर जेबे कोई एप्रैम गोत्रो रा नठेया दा सिपाई तेती जाई की बोलो था, “माखे नदिया ते पार जाणे देयो”, तेबे गिलादो रे सिपाई तेसते पूछो थे, “क्या तुँ एप्रैमो रा रणे वाल़ा ए?” जे से ज्वाब देयो था, कि नई, तो सेयो तेसखे बोलो थे, अच्छा, “शिब्बोलेत बोल” ओर से बोलो था, “सिब्बोलेत” कऊँकि तेसते से ठीक नि बोलेया जाओ था; तेबे सेयो तेसखे पकड़ी की यरदन नदिया रे कनारे पाँदे काई देयो थे। ईंयाँ तिने तेस बखते 42,000 एप्रैमी सिपाई काये। यिप्तह छे साला तक इस्राएलो रा न्याय करदा रया। तेबे यिप्तह गिलादी मरी गा, ओर से गिलादो रे तेस ई शईरो रे दबाईता जेती से जम्मेया था।
न्यायी इबसान
यिप्तह रे मरने ते बाद बेतलेहमो रा रणे वाल़ा इबसान इस्राएली लोका रा न्याय करने लगेया। ओर तेसरे तीई माठे ओर तीई बेटिया थिया। तिने आपणी बेटिया आपणे गोत्रो ते बारे ब्याईया ओर आपणे गोत्रो ते बारा ते आपणे माठेया रा ब्या करी की तीई बऊआ ली आया। ओर से इस्राएली लोका रा न्याय साता साला तक करदा रया। तेबे इबसान मरी गा ओर से बेतलेहमो रे दबाईता।
न्यायी एलोन
इसबानो रे मरने ते बाद जबूलून गोत्रो रा माणूं एलोन इस्राएली लोका रा न्याय दसा साला तक करदा रया। तेबे एलोन मरी गा ओर से जबूलून प्रदेशो रे अय्यालोन शईरो दे दबाईता।
न्यायी अब्दोन
तेसरे मरने ते बाद पिरातोनी हिल्लेलो रा पाऊ अब्दोन इस्राएली लोका रा न्याय करने लगेया। ओर तेसते चाल़ी माठे ओर तीई पोते ऊए, जिना गे सवारी करने खे आपणा-आपणा गह्दा था। से आठ साला तक इस्राएलो रे लोका रा न्याय करदा रया। तेबे पिरातोनी हिल्लेलो रा माठा अब्दोन मरी गा ओर से एप्रैम प्रदेशो रे पिरातोन शईरो दे दबाईता, जो अमालेकिया रे पाह्ड़ी प्रदेशो रे ए।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.