Baghlayani Bible
न्यायियो 11
न्यायी यिप्तह रा चुणेया जाणा
यिप्तह नाओं रा मर्द गिलाद प्रदेशो रा बड़ा शूरवीर माणूं था ओर तेसरे बाओ रा नाओं गिलाद था ओर तेसरी माये एक वेश्या थी। गिलादो री आपणी लाड़िया रे बी पाऊ थे ओर जेबे सेयो बड़े ऊए, तेबे यिप्तहो खे ये बोली की निकयाल़ी ता, “तूँ तो पराई जवाणसा रा पाऊ ए; इजी बजअ ते ताखे म्हारे कराने रे कोई इस्सा नि मिलणा।” तेबे यिप्तह आपणे पाईया गे ते नठी की तोब देशो दे रणे लगेया ओर यिप्तह गे बदमाश माणूं कट्ठे ऊईगे ओर तेस साथे कूमणे लगे। ओर कुछ दिना बाद अम्मोनी लोक इस्राएली लोका साथे लड़ने लगे। जेबे अम्मोनी लोक इस्राएली लोका साथे लड़ने लगी रे थे, तेबे गिलादो रे इस्राएली स्याणे लोक यिप्तह खे तोब प्रदेशो ते ल्याऊणे खे गये; ओर यिप्तहो खे बोलेया, “चली की म्हारा परदान ऊई जा, ताकि आसे अम्मोनिया साथे लड़ी सकिये।” यिप्तहे गिलादो रे स्याणेया लोका खे बोलेया, “क्या तुसे मां साथे बैर करी की आऊँ मेरे बाओ रे कअरो ते नि निकयाल़ी ता था? तेबे एबे मुसीबता रे पड़ी की मांगे कऊँ आई रे?” गिलादो रे स्याणे लोके यिप्तह खे बोलेया, “आसे इजी बजअ ते तेरी तरफा खे फिरी रे कि तूँ आसा साथे चली की अम्मोनिया साथे लड़े; तेबे तूँ गिलादो दे रणे वाल़ेया आसा सबी लोका रा परदान ठईरना।” यिप्तहे गिलादो रे स्याणे लोका खे बोलेया, “जे आऊँ अम्मोनिया साथे लड़ने खे तुसा साथे गिलाद प्रदेशो खे चलूँ ओर यहोवा तिना पाँदे माखे जीत दिलाओगा। तो आऊँ तुसा गिलाद प्रदेशो रा परदान बनाणा।”
गिलादो रे स्याणे लोके यिप्तहो खे ज्वाब दित्तेया, “आसा पक्का तेरी एसा गल्ला रे मुताबिक करना, आसा ओर तां बीचे इना गल्ला रा गवा यहोवा आपू ए।” तेबे यिप्तह गिलाद प्रदेशो रे स्याणेया लोका साथे चली पड़ेया ओर लोके से आपू पाँदे मुखिया ओर सेनापति बणाया; ओर यिप्तहे आपणी सब गल्ला मिस्पा दे यहोवे सामणे बोली की सुणाईयां। तेबे यिप्तहे अम्मोनिया रे राजे गे दूतो रे जरीये ये सन्देसा पेजेया, “ताखे मां साथे क्या काम ए कि तूँ मेरे देशो साथे लड़ने खे आयी रा?” अम्मोनिया रे राजे यिप्तह रे दूता गे बोलेया, “बजअ ये ए, कि जेबे इस्राएली मिस्रो ते आए, तेबे अर्नोन, यब्बोक ओर यरदन नदिया तक जो मेरी जमीन थी तिजी पाँदे तिने कब्जा करी ला ए; इजी री खातर एबे तिजी खे बिना चगड़े ते माखे वापस करी दे।” तेबे यिप्तहे फेर अम्मोनिया रे राजे गे ये बोलणे खे दूत पेजे, “यिप्तह ताखे ईंयाँ बोलोआ कि इस्राएले ना तो मोआबो री जमीन लई ओर ना ई अम्मोनिया री जमीन लई, बल्कि जेबे इस्राएली लोक मिस्र देशो ते निकल़े ओर उजाड़ जगा रिये ऊँदे ऊए लाल समुद्रो तक आए ओर तेथा ते कादेश शईरो खे आए, तेबे इस्राएली लोके एदोमो रे राजे गे दूत पेजी की ये सन्देसा दित्तेया कि माखे आपणे देशो रिये ऊई की जाणे दे ओर एदोमो रे राजे तिना री नि मानी। ईंयाँ ई तिने मोआबो रे राजे खे बी सन्देसा पेजेया ओर तिने पनि मानेया, इजी री खातर इस्राएल कादेश शईरो देई रई गा।” तेबे इस्राएलिये उजाड़ जगा रिये चलदे-चलदे एदोम ओर मोआब दुँईं देशा रे बारे ई बारे कूमी की मोआब देशो रे पूर्वो ते आयी की अर्नोन नदिया ते पार आपणे डेरे लगाए ओर मोआबो रे बन्ने रे पीतरे नि गये, कऊँकि मोआबो रा बन्ना अर्नोन नदी थी। तेबे इस्राएलिये एमोरी लोका रे ओर हेशबोन शईरो रे राजा सिहोनो गे दूतो रे जरीये सन्देसा पेजेया, “आसा खे आपणे देशो रिये ऊई की म्हारी जगा खे जाणे दे।” पर सिहोने इस्राएलो रा इतणा परोसा नि कित्तेया कि तिना खे आपणे देशो रिये ऊई की जाणे देंदा; बल्कि आपणी सारी सेना खे कट्ठी करी की आपणे डेरे यहस शईरो दे खड़े करी की इस्राएलो पाँदे अमला कित्तेया। ओर इस्राएलो रे यहोवा परमेशरे सिहोन राजा तेसरी सारी सेना समेत इस्राएलो रे आथो रे करी ता ओर तिने सेयो काई ते; ईंयाँ इस्राएल तेते देशो रे रणे वाल़े एमोरिया रे सारे देशो रा अधिकारी ऊई गा। मतलब दक्खणा रिया दिशा दे अर्नोन नदिया ते उत्तर दिशा दे यब्बोक नदिया तक ओर पूर्व दिशा दे उजाड़ जगा ते लयी की पच्छमा दे यरदन नदिया तक एमोरिया रे सारे देशो रा अधिकारी ऊई गा।
इजी री खातर एबे इस्राएलो रे यहोवा परमेशरे आपणी इस्राएली प्रजा रे सामणे ते एमोरी तिना रे देशो ते निकयाल़ी ते रे; तेबे क्या तूँ दुबारा तेथो रा अधिकारी ऊई सकेया? तूँ तो तेते देशो रा अधिकारी ऊणा, जेतेखे तेरा कमोश देवता ताखे अधिकारी ऊणे खे देयो। पर जिना लोका खे म्हारा यहोवा परमेशर आसा सामणे ते निकयाल़ोआ, तिना रे देशो रे अधिकारी आसे ऊणे। तूँ मोआबो रे राजा सिप्पोरो रे पाऊ बालाको ते ठीक नि ए? तिने कदी बी ना तो इस्राएली लोका साथे चगड़ा कित्तेया ओर ना ई तिना साथे कदी लड़ेया। जबकि इस्राएल हेशबोन, अरोएरो रे शईरा समेत तिना रे गांव ओर अर्नोन नदिया रे नेड़े रे शईर ओर तिना रे गाँवां दे 300 साला ते बसी रा, तो इतणे दिना दे तुसे लोके से कऊँ नि छुड़ाई ला? मैं तेरा कुछ बी बुरा नि करी राखेया; तूँ ई मां साथे युद्ध छेड़ी की बुरा बर्ताओ करेया; इजी री खातर यहोवा जो न्याय करने वाल़ा ए, सेई इस्राएली लोका ओर अम्मोनी लोका बीचे जो चगड़ा चली रा तेतेरा आज न्याय करो। तेबे बी अम्मोनिया रे राजे यिप्तह रिया यो गल्ला नि मानियां, जो तिने सन्देसे दे बोली की पेजिया थिया।
तेबे यहोवे रा आत्मा यिप्तह दे समायी गा ओर से गिलाद ओर मनश्शे रिये ऊई की गिलादो रे मिस्पे रे आया ओर तेथा ते ऊई की अम्मोनिया री तरफा खे चलेया। ओर यिप्तहे ये बोली की यहोवे री मान्नत मानी, “जे तूँ अम्मोनिया खे पक्का मेरे आथो रे करी दे, तो जेबे आऊँ अम्मोनिया ते जीती की सई-सलामत आपणे कअरो खे वापस आयी जाऊँ, तेबे जो कोई बी सबी ते पईले मेरे कअरो रे द्वारो ते बारे निकल़ो, से यहोवे रा ठईरना ओर मां से बलिदान करी की चढ़ाणा।” तेबे यिप्तह ओर तेसरे सिपाई अम्मोनिया साथे लड़ने खे तिना रिया तरफा खे गये ओर यहोवे तिना रे जरिये अम्मोनी अराईते। ओर से अरोएर शईरो ते लयी की मिन्नीत शईरो तक, जो बीइ शईर ए, बल्कि आबेलकरामीम शईरो तक तिना खे जीतदा ओर तिना खे कांदा गया। ओर अम्मोनी इस्राएली लोका ते आरी गे। जेबे यिप्तह लड़ाई जीती की मिस्पा ते आपणे कअरो खे आया, तेबे तेसरी बेटी डफली बजांदी ओर नाचदी ऊई तेस साथे मिलणे खे निकल़ी की आयी; से तेसरी एकलौती बेटी थी; तेसा खे छाडी की तेसरे ओर कोई ल्वाद नि थी। तेसा खे देखदे ई तिने दु:खी ऊई की आपणे टाल्ले फाड़े ओर बोलेया, “ओ, मेरी बेटिए! तैं माखे बऊत बड़ा दु:ख देईता ओर तूँ बी माखे कष्ट देणे वाल़ेया जेड़ी ऊई गी री; कऊँकि जो मैं यहोवे खे वचन देई राखेया तिजी खे आऊँ तोड़ी नि सकदा।” तेसे आपणे बाओ खे बोलेया, “ओ मेरे पिता, तैं जो यहोवे खे वचन देई राखेया, तो जो गल्ल तेरे मुंए ते निकल़ी री, तिजी रे मुताबिक ई मां साथे बर्ताव कर, कऊँकि यहोवे तेरे अम्मोनी दुश्मणा खे अराणे दे तेरी मताद कित्ती ए।” तेबे तेसे आपणे बाओ खे बोलेया, “मेरिया तँईं ये कर कि दो मीन्नेया खे माखे छाडी दे, ताकि आऊँ आपणी सेलिया साथे जायी की पाह्ड़ो रे फिरदी ऊई आपणे कुआँरेपनो पाँदे रोंदी रऊँ।” तिने तेसा खे बोलेया, “जा।” तेबे तिने तेसा खे दो मीन्ने तक बारे जाणे खे पेजी ती; इजी री खातर से आपणी सेलिया समेत चली गी ओर पाह्ड़ो पाँदे आपणे कुआँरेपनो पाँदे रोंदी रयी। दो मीन्ने बीतणे ते बाद से आपणे बाओ गे वापस आयी ओर तिने तेसा रे बारे दे आपणी मानी री मान्नत पूरी कित्ती। तेसे बेटिये केसी मर्दो साथे कोई बी रिश्ता नि बणाई राखेया था। इजी री खातर इस्राएली लोका दे ये रवाज चलेया, कि इस्राएली जवाणसा हर साल यिप्तह गिलादिये री बेटिया रा गुणगाण गाणे खे सालो दे चऊँ दिना तक जाया करो थिया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.