Baghlayani Bible
न्यायियो 13
न्यायी शिमशोन
इस्राएली लोक फेर यहोवे री नजरा रे बुरे काम करने लगे; इजी री खातर यहोवे सेयो चाल़िया साला तक पलिश्ती लोका रे गुलाम ऊणे खे देईते।
दानिया रे कुलो रा सोरावासी मानोह नाओं रा एक मर्द था, जेसरी लाड़ी बाँज थी ओर तेसारे कोई बच्चा नि था। एसा जवाणसा खे यहोवे रे दूते दर्शण देई की बोलेया, “सुण, बाँज ऊणे रिया बजअ ते तेरे कोई बच्चा नि ए; पर एबे तूँ गर्भवती ऊणी ओर तेरे पाऊ ऊणा। इजी री खातर एबे सम्बल़ी की रओ, कि ना तो तैं अंगूरा रा रस या शराब पीणी ओर ना ई कोई अशुद्ध चीज खाणी, कऊँकि तूँ गर्भवती ऊणी ओर तेरे एक पाऊ जमणा पर तैं ये त्यान राखणा कि तेसरे सिरो पाँदे उस्तरा नि चलाणा, कऊँकि से जन्मो ते ई परमेशरो रा नाज़ीर1 रणा ओर इस्राएली लोका खे पलिश्ती लोका रे आथो ते छुड़ाणे खे तेस ई काम करना।” तेसे जवाणसे आपणे लाड़े गे जायी की बोलेया, “परमेशरो रा एक दूत मांगे आया था जेसरी शक्ल परमेशरो रे दूतो जेड़ी नौखी थी ओर मैं तेसते नि पूछेया कि तूँ केथा ते आई रा ओर ना ई तिने मांगे आपणा नाओं बताया; पर तिने माखे बोलेया कि सुण, तूँ गर्भवती ऊणी ओर तेरे एक पाऊ ऊणा; इजी री खातर एबे ना तो तैं अंगूरा रा रस या कोई शराब पीणी ओर ना ई कोई अशुद्ध चीज खाणी, कऊँकि से पाऊ जन्मो ते लयी की मरने तक परमेशरो रा नाज़ीर रणा।” तेबे मानोहे यहोवे ते ये बिनती कित्ती, “ओ प्रभु, बिनती सुण, परमेशरो रा से दूत जो तैं पेजेया था फेर आसा गे आओ ओर आसा खे सिखाओ कि जो बाल़क पैदा ऊणे वाल़ा ए आसे तेसखे किंयाँ पाल़िए।” मानोह री ये बिनती परमेशरे सुणी ली, इजी री खातर जेबे से जवाणस मैदानो दे बैठी री थी, तेबे परमेशरो रा से ई दूत तेसा गे आया। पर तेसा रा लाड़ा मानोह तेसा साथे तेती नि था। तेबे तेसे जवाणसे फटाफट दौड़ी की आपणे लाड़े खे ये दशेया, “जो मर्द तेस दिने मांगे आया था तिने ई माखे फेर दर्शण देई राखेया।” ये सुणी की मानोह उठी की आपणी लाड़िया पीछे चली पड़ेया ओर तेस दूतो गे आयी की पूछेया, “क्या तूँ से ई मर्द ए जिने मेरी लाड़िया ते गल्ला कित्तिया थिया?” तिने बोलेया, “आऊँ सेईए।” मानोहे बोलेया, “जेबे तेरी ये गल्ल पूरी ऊई जाओगी तो, तेस बाल़को री जिन्दगी केड़ी ऊणी ओर तेस क्या काम करना?” यहोवे रे दूते मानोह खे बोलेया, “जितणी चीजा रे बारे दे मैं तेरी लाड़िया खे बताई राखिया, से तिना सबी ते दूर रओ। ये कोई चीज जो अंगूरा री बेला ते पैदा ओई नि खाओ ओर ना अंगूरा रा रस या कोई शराब पियो, ना कोई अशुद्ध चीज खाओ ओर जो आज्ञा मैं एसा खे देई राखी थी, सेई ये मानो।”
मानोहे यहोवे रे दूतो खे बोलेया, “थोड़ी देर एथी आसा गे रूकी जा कऊँकि आसे तेरिया तँईं बाकरिया रा एक बच्चा पकाई की ताखे देणा चाऊँए।” यहोवे रे दूते मानोह खे बोलेया, “चाए तूँ माखे रोकी की राख, पर मां तेरा कुछ नि खाणा ओर जे तूँ बलि करना चाए तो यहोवे खे ई कर।” मानोह नि जाणो था कि से माणूं प्रभुए रा दूत ए। मानोहे यहोवे रे दूतो खे बोलेया, “आपणा नाओं बता, इजी खे ताकि जेबे तेरिया गल्ला पुरिया ओ, तेबे आसे तेरा आदर करी सकूँ।” यहोवे रे दूते तेसखे बोलेया तूँ मेरा नाओं कऊँ पूछेया, “मेरा नाओं तो नौखा ए जो तेरिया समजा ते बारे ए।” तेबे मानोहे नज्जो री बलिया समेत बाकरिया रा एक बच्चा लयी की चट्टानी पाँदे यहोवे खे चढ़ाया, तेबे तिने दूते मानोह ओर तेसरी लाड़िया रे देखदे-देखदे एक अचम्बे रा काम कित्तेया। जेबे आगी री लूपी तेसा बेदिया ते सर्गो रिया तरफा खे उठणे लगी री थी, तेबे यहोवे रा दूत तेसा बेदिया री लूपिया दे ऊई की मानोह ओर तेसरी लाड़िया रे देखदे-देखदे ऊबे स्वर्गो खे चढ़ीगा; तेबे सेयो जमीना दे मुंओ रे पारे पड़ी गे। यहोवे रे दूते मानोह ओर तेसरी लाड़िया खे फेर कदी दर्शण नि दित्तेया। तेबे मानोहे जाणी ला की से यहोवे रा दूत था। तेबे मानोहे आपणी लाड़िया खे बोलेया, “आसे जरूर मरी जाणे, कऊँकि आसे आपणिया आखी ते परमेशर देखी राखेया।” पर तेसरी लाड़िए तेसखे बोलेया, “जे यहोवा आसा खे काणा चांदा, तो आसा रे आथो ते होमबलि ओर नज्जो री बलि ग्रहण नि करदा ओर ना से आसा खे एड़िया सब गल्ला एस बखते दखांदा ओर सुणांदा।” ओर तेसा जवाणसा रे एक पाऊ जम्मेया ओर तिने तेसरा नाओं शिमशोन राखेया ओर से बढ़दा गया ओर यहोवा तेसखे आशीष देंदा रया। जेबे शिमशोन सोरा ओर एशताओल शईरा बीचे महनेदान जगा दे रणे लगेया तेबे तेती यहोवे रा आत्मा तेसखे चलाणे लगेया।
Source notes (1)
- Footnote नाज़ीर परमेशरो रिया तँईं लग कित्तेया रा, गिण. 6:1-21
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.