Baghlayani Bible
यहोशू 13
कनान देशो रा इस्राएली गोत्रा खे बांडेया जाणा
जेबे यहोशू बऊत स्याणा ऊई गा था तेबे यहोवे तेसखे बोलेया, “तूँ बऊत स्याणा ऊई गा रा ओर बऊत देश रयी गे रे, जो इस्राएलो रे कब्जे दे एबुए तक नि आए। यो प्रदेश रयी गे रे, मतलब पलिश्तिया रा सारा प्रदेश ओर गशूरी जातिया रा प्रदेश, मतलब मिस्र देशो ते आगे शीहोर नदिया ते लई की उत्तरो रिया तरफा खे एक्रोन शईरो रे बन्ने तक जो कनानी लोका रा इस्सा गिणेया जाओआ। तुसा रे पलिश्ती जातिया रे पाँजो सरदार, मतलब गाजा, अशदोद, अशकलोन, गत ओर एक्रोन शईरो तक, ओर दक्खणा रिया तरफा दे अव्वी लोका री जमीन जीतणे खे रईगी दी ए। तेबे अपेक शईर ओर एमोरी लोका रे बन्ने तक कनानी लोका रा सारा देश ओर सीदोनी लोका रा मारा नाओं रा शईर, फेर गबाली जातिया रा इलाका ओर पूर्बा रिया तरफा खे हेर्मोन पाह्ड़ो ते थाले बालगाद शईरो ते लई की हमात शईरो रिया काट्टिया तक सारा लबानोन इलाका। ओर लबानोनो ते लई की मिस्रपोतमैमो तक सीदोनिया रे पाह्ड़ी इलाके रे रणे वाल़े। यो मां आपू इस्राएली लोका रे सामणे ते तेस देशो ते निकयाल़ी देणे, इतणा ओ कि तूँ मेरी आज्ञा रे मुताबिक तिना रा देश इस्राएली लोका खे बांडी दे।” इजी री खातर एबे तूँ एस देशो खे नौ गोत्रा खे ओर मनश्शे रे आदे गोत्रो खे तिना रा इस्सा ऊणे खे बांडी दे।
यरदन नदिया रे पूर्बा रिया तरफा री जमीन बांडणा
रूबेनी ओर गादी गोत्रा खे ओर मनश्शे रे आदे गोत्रो खे तो तिना रा इस्सा मिली चुकेया था, जो परमेशरो रे दास मूसे तिना खे यरदन नदिया रे पूर्वो रिया तरफा खे दित्तेया था, मतलब अर्नोन नाओं रे नाल़े रे कनारे रे अरोएर शईरो ते लई की ओर तेसी नाल़े बीचले शईरो खे छाडी की दीबोन शईरो तक मेदबा गे पाह्ड़ी इलाके रे चौरस इस्से तक; ओर अम्मोनी जातिया रे बन्ने तक हेशबोन शईरो दे राज्य करने वाल़े एमोरिया रे राजा सिहोनो रे सारे शईर; ओर गिलाद प्रदेश, ओर गशूरी ओर माका जातिया रा बन्ना, सारा हेर्मोन पाह्ड़ ओर सल्का तक सारा बाशान प्रदेश। तेबे अशतारोत ओर एद्रेई शईरा दे रणे वाल़े तेस ओग राजे रा सारा राज्य जो रपाई जातिया बीचे आखरी राजा था; कऊँकि ये ई मूसे काई की तिना री प्रजा समेत तिना री जगा ते निकयाल़ी ता था। पर इस्राएली लोके गशूरी ओर माकी लोक तिना रे प्रदेशो ते नि निकयाल़े, इजी री खातर गशूरी ओर माकी लोक आजो तक इस्राएली लोका बीचे रओए। ओर लेविया रे गोत्रो खे मूसे कोई जमीना दे इस्सा नि दित्तेया; कऊँकि इस्राएलो रे परमेशर यहोवे रे वचनो रे मुताबिक तेसखे अर्पणो रिया चीजा पाँदे तिना रा ई अक्क ऊणा।
रूबेनी गोत्रो खे इस्सा दित्तेया
मूसे रूबेनो रे गोत्रो खे तिना रे कुलो रे मुताबिक जमीना रा इस्सा दित्तेया, मतलब अर्नोन नाओं रे नाल़े रे कनारे रे अरोएर शईरो ते लई की ओर तेसी नाल़े बीचले शईरो खे छाडी की दीबोनो तक मेदबा गे सारा सीदा इलाका; तेबे सीदे इलाके रा हेशबोन शईर ओर तेथो रे सारे गाँवो; तेबे दीबोन, बामोतबाल, बेतबाल्मोन, यहसा, कदेमोत, मेपात, किर्यातैम, सिबमा ओर तराईया रे पाह्ड़ो रे बसेया रा सेरेथश्शहर, बेतपोर, पिसगा पाह्ड़ ओर बेत्यशीमोत शईर, मतलब चौरस देशो रे बसे दे हेशबोनो दे रणे वाल़े एमोरिया रे तेस राजा सिहोनो रे राजो रे कुल शईर जो मूसे अराईता था, मूसे एवी, रेकेम, सूर, हूर ओर रेबा नाओं रे मिधानो रे परदान बी काईते थे जो सिहोन राजे रे ठराए रे हाकिम ओर तेस ई देशो रे रणे वाल़े थे। इस्राएली सैनिके जो लोक तलवारी साथे काये थे तिना साथे तिने बोरो रा पाऊ बिलाम बी तलवारी साथे काया जो जादू टोणे रे जरीये चूठा भविष्य बताओ था। रूबेनिया रा बन्ना पच्छमा दे यरदन नदिया रा कनारा ठईरेया। रूबेनिया रा इस्सा तिना रे कुलो रे मुताबिक शईर ओर गाँवो समेत ये ई ठईरेया।
गादो रे गोत्रो खे इस्सा दित्तेया
तेबे मूसे गादो रे गोत्रो खे बी कुलो रे मुताबिक जमीना दे तिना रा निज इस्सा करी की बांडी ता। से ये था, मतलब याजेर बगैरा गिलादो रे सारे शईर ओर रब्बाह शईरो रे सामणे अरोएरो तक अम्मोनिया रा आदा देश, ओर हेशबोनो ते रामत-मिस्पे ओर बतोनीम् तक, महनैमो ते दबीरो रे बन्ने तक सारे शईर, ओर तराईया रे बेतहारम, बेतनिम्रा, सुक्कोत, सापोन शईर, हेशबोनो रे राजा सिहोनो रे राज्य रा बचेया रा इस्सा ओर किन्नेरेत नाओं रे तालो रे सिरे तक, यरदन नदिया रे पूर्वो रिया तरफा खे से प्रदेश जेतेरा बन्ना यरदन नदी ए। गादिया रा इस्सा तिना रे कुलो रे मुताबिक शईर ओर गाँवो समेत ये ई था।
मनश्शे रे आदे गोत्रो खे इस्सा दित्तेया
फेर मूसे मनश्शे रे आदे गोत्रो खे बी जमीना दे तिना रा निज इस्सा करी की देईता; जो मनश्शेइया रे आदे गोत्रो रा निज इस्सा तिना रे कुलो रे मुताबिक ठईरेया, से ये ए, मतलब महनैम शईरो ते लई की बाशानो रे राजा ओगो रे राज्य रा सारा देश, बाशानो दे बसे रे याईरो रे साठो शईर, ओर गिलादो रा आदा इस्सा, अशतारोत ओर एद्रेई शईर, जो बाशानो रे राजा ओगो रे राज्य रे शईर थे, यो मनश्शे रे पाऊ माकीरो रे कुलो रा, मतलब माकीरो रे आदे कुलो रा निज इस्सा कुलो रे मुताबिक ठईरेया।
ओर जो इस्से मूसे मोआबो रे अराबा दे यरीहो गे यरदन नदिया रे पूर्वो रिया तरफा खे मैदानो दे बांडे सेयो यो ईए। पर लेविया रे गोत्रो खे मूसे कोई इस्सा नि दित्तेया; इस्राएलो रा परमेशर यहोवा आपणे वचनो रे मुताबिक तिना रा इस्सा आपू ठईरेया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.