यहोशू 14

यरदन नदिया रे पच्छमा रे हिस्से रा बाँडणा

1जो-जो इस्से इस्राएली लोका खे कनान देशो दे मिले, सेयो एलीआजार पुरोईत, नूनो रा पाऊ यहोशू ओर इस्राएली गोत्रो रे स्याणेया रे कराने रे खास-खास मर्दे तिना खे दित्ते, सेयो यो ए, 2जो आज्ञा यहोवे मूसे रे जरीये साढ़े नौ गोत्रा खे दित्ती थी, तिजी रे मुताबिक तिना रे इस्से चिट्ठी पाई की दित्ते। 3मूसे तो टाई गोत्रा खे इस्सा यरदन नदिया रे पूर्बो रिया तरफा खे दित्तेया था, पर लेविया खे तिने तिना बीचे कोई इस्सा नि दित्तेया था। 4यूसुफो रे कुलो रे तो दो गोत्र ऊईगे थे, मतलब मनश्शे ओर एप्रैम ओर तेते देशो रे लेवी गोत्रो रे लोका खे कोई इस्सा नि दित्तेया, बस रणे खे शईर ओर डांगर बगैरा सम्पत्तिया खे राखणे खे चराईया तिना खे मिलिया। 5जो आज्ञा परमेशरे मूसे खे दित्ती थी तिजी रे मुताबिक इस्राएलिये कित्तेया ओर तिने से देश बांडी ला।

हेब्रोन शईर कालेबो खे दित्तेया

6तेबे यहूदा गोत्रो रे लोक यहोशूए रे नेड़े गिलगाल शईरो रे आए ओर कणजी वंशो रे यपुन्ने रे पाऊ कालेबे तेसखे बोलेया, “तूँ जाणेया कि कादेशबर्ने दे यहोवे रे दास मूसे मेरे ओर तेरे बारे दे क्या बोलेया था। 7जेबे यहोवे रे दास मूसे आऊँ कनान देशो रा पेत लणे खे कादेशबर्ने ते पेजेया था, तेबे आऊँ चाल़िया साला रा था ओर आऊँ सच्चे मनो ते तेसगे सन्देसा ल्याया। 8ओर मेरे इस्राएली साथी जो मां साथे गये थे तिने तो इस्राएलो रे लोका रा मन कमजोर करिता था, पर मैं आपणे परमेशर यहोवे री पूरी रीतिया ते गल्ल मानी। 9तेबे तेस दिने मूसे कसम खाई की माखे बोलेया कि तैं पूरी रीतिया साथे मेरे परमेशर यहोवे री गल्ल मानी, इजी बजा ते बिना शक जेते जमीना दे तूँ आपणे पैर राखी की आई रा, से सदा खे तेरा ओर तेरे कुलो रा इस्सा ऊणा। 10पर एबे देख, जदुओ ते परमेशरे मूसे खे ये गल्ल बोली थी, तदुओ ते पैंताल़ी साल ऊई चूकी रे। जिना दे इस्राएली लोक उजाड़ जगा दे पटकदे रये, तिना बीचे परमेशरे आपणे वचनो रे मुताबिक आऊँ जिऊँदा राखी राखेया ओर एबे आऊँ पच्यासी साला राए। 11आऊँ एबु बी तिथणा ई तागतबर आ जितणा कि तेस बखते था जेबे मूसे आऊँ यरीहो रा पेत लणे खे तेती पेजेया था, युद्ध करने या बारे-पीतरे आऊणे खे जितणी मांदे तेस बखते सामर्था थी तिथणी एबे बी ए। 12इजी री खातर एबे तेसा पाह्ड़िया माखे देई दे जेतेरे बारे दे यहोवे तेस दिने बोलेया था, तैं तो तेस दिने सुणेया ऊगा कि तिदे बड़े ओर तागतबर अनाकवंशी लोक रओए ओर बड़े-बड़े गढ़वाल़े शईर बीए; पर जे एबु यहोवा मां साथे आ तो आऊँ तिना खे तिना रे देशो ते निकयाल़ी देऊँ।”

13तेबे यहोशूए कालेबो खे आशीर्वाद दित्तेया ओर हेब्रोन शईर यपुन्ने रे पाऊ कालेब ओर तेसरे बच्चेया रे इस्से खे देईता। 14इजी बजा ते हेब्रोन शईर कणजी वंशो रे यपुन्ने रे पाऊ कालेबो रा इस्सा आजो तक बणेया राए, कऊँकि से इस्राएलो रे परमेशर यहोवे रिया गल्ला रा पूरे मनो ते पालण करो था। 15पईले हेब्रोनो रा नाओं किर्यतर्बा था; से अर्बा नाओं रा अनाकिया बीचे सबी ते बड़ा मर्द था। तेबे तेस देशो खे लड़ाईया ते शान्ति मिली।