Baghlayani Bible
यहोशू 12
इस्राएली लोका रे जरिये आरे दे राजा
यरदन पार पूर्वा रिया तरफा खे, मतलब अर्नोन काट्टिया ते लई की हेर्मोन पाह्ड़ो रे इलाके तक ओर सारे पूर्वी अराबा दे जो राजे इस्राएलिये काई की तिना रा देश आपणे कब्जे दे करी ला था। तिना राजेया रे नाओं यो ए; मतलब हेशबोन शईरो दे रणे वाल़ा एमोरी जातिया रा राजा सिहोन था, जेसरा इलाका अर्नोन काट्टिया रे कनारे दे अरोएर शईरो ते लई की ओर तेसा ई काट्टिया रे बीचले शईरो खे छाडी की यब्बोक नदिया तक, जो अम्मोनिया रा ठकाणा ए, जेते दे आदा गिलाद बी आओआ, तेसरे राज्य रा बन्ना पच्छमा री उत्तरो दे गलील नदिया ते लई की दक्खणा दे मृत सागरो तक यरदन नदिया री काट्टिया तक थी। तेसरे इलाके दे मृत सागरो रे पूर्वा दे बेत्यशीमोत शईर ओर अराबा रे पिसगा पाह्ड़ो तक रा इलाका आओआ।
आगला ओग राजा जो रपाई जातिया बीचा ते था से बाशान शईरो पाँदे राज्य करो था, ओर से अशतारोत ओर एद्रेई शईरो रे रया करो था, से बी अराईता। ओर हेर्मोन पाह्ड़ सल्का ओर गशूरी ओर माकिया रे ठकाणे तक, सारे बाशानो दे ओर हेशबोनो रे राजा सिहोनो रे ठकाणे तक था, ओर से आदे गिलादो रे बी राज्य करो था। परमेशरो रे दास मूसे ओर इस्राएली सेने यो राजा अराईते ओर मूसे तिना रा प्रदेश रूबेनी, गादी ओर मनश्शे रे आदे गोत्रो खे देईता।
यरदन नदिया रे पच्छमा रिया तरफा खे, लबानोनो रे मैदानो रे बालगादो ते लई की सेईरो रिया चढ़ाईया रे हालाक पाह्ड़ो तको रे इलाके दे जो राजे यहोशू ओर इस्राएली सैनिके काये थे तिना रा देश इस्राएली जातिया रे गोत्रो रे मुताबिक बांडी ता था। सेयो जगा यो ए; हित्ती ओर एमोरी ओर कनानी, परिज्जी, हिब्बी, यबूसी जातिया, जो पाह्ड़ी प्रदेशो दे ओर थालले प्रदेशो रे ओर अराबा रे, टलान वाल़े प्रदेशो रे, उजाड़ जगा रे ओर दक्खणा रे प्रदेशो दे रओ थे।
यरीहो शईरो रा राजा, बेतेल रे आई शईरो रा राजा,
यरूशलेम शईरो रा राजा, हेब्रोन शईरो रा राजा,
यर्मूत शईरो रा राजा, लाकीश शईरो रा राजा,
एग्लोन शईरो रा राजा, गेजेर शईरो रा राजा,
दबीर शईरो रा राजा, गेदेर शईरो रा राजा,
होर्मा शईरो रा राजा, अराद शईरो रा राजा,
लिब्ना शईरो रा राजा, अदुल्लाम शईरो रा राजा,
मक्केदा शईरो रा राजा, बेतेल शईरो रा राजा,
तप्पूह शईरो रा राजा, हेपेर शईरो रा राजा,
अपेक शईरो रा राजा, लश्शारोन शईरो रा राजा,
मादोन शईरो रा राजा, हासोर शईरो रा राजा,
शिम्रोन्मरोन शईरो रा राजा, अक्षाप शईरो रा राजा,
तानाक शईरो रा राजा, मगिद्द शईरो रा राजा,
केदेश शईरो रा राजा, कर्मेलो रे योकनाम शईरो रा राजा,
दोर नाओं रे पाह्ड़ो रे दोर शईरो रा राजा, गिलगालो रे गोयीम शईरो रा राजा,
ओर तिर्सा शईरो रा राजा था, ईंयाँ इस्राएली लोके सब मिलाई की कत्ती राजे अराए।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.