Baghlayani Bible

अय्यूब 2

अय्यूबो री दूजी परीक्षा

तेबे एक ओरी दिने फेर यहोवे रे स्वर्गदूत तेसरे सामणे कट्ठे ऊए, शैतान बी तिथणे तेती पऊँची गा। यहोवे शैतानो ते पूछेया, “तूँ केथा ते आई रा?” शैताने प्रभुए खे ज्वाब दित्तेया, “आऊँ तरतिया पाँदे ओरे-पोरे कूमदे-फिरदे एती आई रा।” यहोवे शैतानो ते पूछेया, “क्या तैं मेरे दास अय्यूबो पाँदे त्यान देई राखेया? कऊँकि तेस जेड़ा सीदा सादा ओर निष्कपट ओर मेरा डर मानणे वाल़ा ओर बुराईया ते दूर रणे वाल़ा माणूं तरतिया पाँदे ओर कोई नि ए। तेबे बी तैं आऊँ तेसरा बिना बजा ते नाश करने खे उकसाया, तेबे बी से एबुए तक आपणी खराईया पाँदे बणेया राए।”1 शैताने यहोवे खे ज्वाब दित्तेया, “खाला रे बदले खाल, पर माणूं आपणा प्राण बचाणे रिया तँईं आपणा सब कुछ देई सकोआ। पर एबे मानी लो कि जे तूँ तेसरे शरीरो खे नुकशाण पऊँचाए आ, तो तेस ताखे पक्का खुली की स्राप देणा। इजी री खातर बस आपणा आथ बढ़ाई की तेसरे आड्ड ओर मास छुँईं दे, तेबे अय्यूबो तेरे मुंए पाँदे तेरी निन्दा करनी।” यहोवे शैतानो खे ज्वाब दित्तेया, “ठीक ए, तूँ तेस साथे जो करना चाए से करी सकेया, पर से काणा नि ए।”2

तेबे शैतान यहोवे रे सामणे ते निकल़ी गा ओर अय्यूब सिरो ते लई की पैरो री थालिया तक पीड़ देणे वाल़ेया कावा साथे दु:खी करिता। तेबे अय्यूब आपणे शरीरो री खाज खुरखणे रिया तँईं एक ठीकरा लई की स्वाई पाँदे बैठी गा। तेबे तेसरी लाड़िए तेसखे बोलेया, “तूँ एबे बी परमेशरो पाँदे परोसा कऊँ राखेया? तूँ तेसखे स्राप देई की कऊँ नि मरी जांदा?”

तेबे अय्यूबे ज्वाब दित्तेया, “तूँ एक मूर्ख जवाणसा री जी गल्ल करने लगी री, क्या आसे परमेशरो रे आथो ते जो सुख लऊँए, तो दु:ख नि लईये?” इतणा सब कुछ ऊणे ते बाद बी अय्यूबे आपणे मुंए ते कोई बी पापो री गल्ल नि कित्ती। जेबे तेमान शईरो रे रणे वाल़े एलीपज, शूही वंशो रे बिल्दद ओर नामात शईरो रे सोपर, अय्यूबो रे इना तिंऊँ दोस्ता खे इना सबी बिपदा री खबर मिली जो तेस पाँदे पड़िया थिया, तेबे सेयो आपू बीचे ये ठाणी की कि आसा अय्यूबो गे जाई की तेस साथे मिली की शोग करना ओर तेसखे शान्ति देणी, आपणे-आपणे कअरो ते तेसगे आए। जेबे तिने दूरा ते अय्यूब देखेया तेबे सेयो तेसखे पछयाणी नि सके, तेबे जोरे-जोरे की रोणे लगे ओर तिने दु:खो रिया बजा ते आपणा-आपणा चोगा फाड़ेया ओर सर्गो रिया तरफा खे तूड़ डवाई की आपणे-आपणे सिरो पाँदे पाई।3 तेबे सेयो अय्यूबो साथे सात दिन-रात जमीना दे बैठे रे रये, पर तेसरा दु:ख बऊत ई बड़ा जाणी की किने बी तेसखे एक बी गल्ल नि बोली।

Source notes (3)

Footnote अय्यू. 1:8
Footnote 2 कुरिन्थ 10:3
Footnote यहेजकेल. 27:30,31

Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.