Baghlayani Bible
यशायाह 60
सिय्योनो दे परमेशरो री महिमा
ओ यरूशलेम शईरो रे लोको, उठो, सामर्था साथे परी जाओ; ओर यहोवे रा वैभव तुसा पाँदे उदय ऊई रा।1 देखो आज तरतिया पाँदे तो न्हेरा ओर राज्य-राज्य रे लोका पाँदे अन्दकूप न्हेरा छायी रा; पर तुसा पाँदे यहोवे रा प्रकाश ऊणा ओर तेसरे उपस्थित ऊणे री चमक तुसा पाँदे प्रगट ऊणी।2 तेस बखते सारे देशो रिया जातिया-जातिया रे लोक ओर राजा तुसा पाँदे ऊए रे नवें दिनो री शुरूआत देखणे आऊणे।3 आपणे चऊँ कनारे देख कि क्या ऊणे लगी रा; तेरे चऊँ कनारे सेयो सारे के सारे कट्ठे ऊई की तांगे आऊणे लगी रे; तेरे पाऊ दूरा ते आऊणे लगी रे ओर तेरी बेटिया आथो-आथ पऊँचाईया जाणे लगी रिया। तेबे तुसा ये देखणा ओर तुसा रा मूँ चमकणा, तुसा रा मन डरी जाणा ओर खुशिया साथे परी जाणा; कऊँकि समुद्रो रा सारा तअन ओर जातिया-जातिया री सारी सम्पत्ति तुसा खे मिलणी।4 तेरे देशो रे ऊँटा रे चूण्ड ओर मिद्यान ओर एपा देशो रिया साँड़णिया कट्ठिया ऊणिया; शेबा जगा रे सारे लोका आई की सूईना ओर लोबान पेंट ल्याऊणी ओर लोका यहोवे री महिमा खुशिया साथे सुनाणी।5 केदार जगा रिया सब पेडा-बाकरिया कट्ठिया ऊई की तेरिया ऊई जाणिया, नबायोत जगा रे खाडू तेरी सेवा करने रे कामे आऊणे; सेयो मेरी बेदिया पाँदे ग्रहण करे जाणे ओर मां आपणा सुन्दर मन्दर ओर बी प्रतापी करी देणा।6 इना लोका खे देखो! ये तेरे नेड़े एड़े छोड़ आऊणे लगी रे जो बादल़ो जेड़े ओर आपणे कोलेया री तरफा खे उडदे ऊए कबूतरो जेड़े आऊणे लगी रे? जरूर द्वीपा रे लोका मेरी ई बाट देखणी पईले तो तर्शीश शईरो रे जाह्ज दूर देशो ते सूईने-चाँदिए समेत तुसा रे माठे बेटिया ल्याऊणे परमेशर यहोवा मतलब इस्राएलो रे पवित्र परमेशरो रे नाओं रिया खातर दूरा ते पऊँचाओ, कऊँकि तिने तूँ इज्जतदार करी राखेया। यहोवा यरूशलेमो रे लोका खे बोलोआ, “परदेशी लोका तुसा री दवाल चकणी ओर तिना रे राजेया तुसा री सेवा टईल करनी; कऊँकि मैं गुस्से दे आई की तुसा खे दु:ख दित्तेया था, पर एबे तुसा ते खुश ऊई की तुसा पाँदे दया करी राखी। तुसा रे शईरो रे बड़े द्वार सदा खुले दे रणे; सेयो रात-दिन कदी बी बन्द नि करे जाणे जेते कि जातिया-जातिया री तअन-सम्पत्ति ओर तिना रे राजा बन्दी ऊई की तुसा गे पऊँचाए जाओ।7 कऊँकि जेसा जातिया रे ओर राज रे लोक तुसा री सेवा नि करोगे सेयो नाश ऊई जाणे, आ एड़िया जातिया पूरी तरअ ते नाश ऊई जाणिया। लबानोनो रे जंगल़ो रा वैभव मतलब सनौबर ओर देवदार ओर चीला रे डाल़ एक साथे तांगे आऊणे ताकि मेरे मन्दरो खे सजाओ ओर मां आपणे पैरा री जगा खे महिमा देणी।” सेओ ई लोक जो पईले तुसा खे दु:ख देया करो थे तां सामणे सिर चुकाई की आऊणे ओर जिने तुसा री बेज्जती कित्ती, सबी तुसा रे पैरा पाँदे पड़ी की माथा टेकणा; तिना तुसा रा नाओं यहोवे रा शईर, इस्राएलो रे पवित्र परमेशरो रा सिय्योन राखणा। तुसे जो बेज्जत कित्ते ओर घृणित ठईरे, एथो तक कि कोई बी तुसा रे शईरो रे ऊई की नि जाओ था, इजी रे बदले मां तुसे सदा रे कमण्ड ओर पीढ़िया-पीढ़िया री खुशिया री बजा ठराणे। देशा ओर राजेया तेरी देखपाल़ करनी, ता राजेया रिया छातिया चुशणीया ओर तुसा खे पता लगी जाणा कि आऊँ यहोवा तुसा रा उद्धार करने वाल़ा ओर तेरा छुड़ाणे वाल़ा, याकूबो रा सर्वशक्तिमान परमेशर ए। मां पीतल़ी रे बदले सूईना, लोए रे बदले चाँदी, लकड़िया रे बदले पीतल़ ओर पात्थरो रे बदले लोआ ल्याऊणा। मां तुसा रे परदान मेल-मिलाप ओर तेरे सरदार धार्मिकता ठराणे। तुसा रे देशो रे फेर कदी उपद्रव ओर तुसा रे बन्ने रे पीतरे उत्पाद या अन्देरो री चर्चा नि सुणनी; पर तुसा आपणी दवाला रा नाओं उद्धार ओर आपणे शईरो रे बड़े द्वारा रा नाओं यश राखणा। तेबे दिने तुसा खे सूरजो प्रयासा नि देणा ओर ना राती चाँदो चाँदणी देणी, पर यहोवे तुसा खे सदा रा प्रयासा ओर तुसा रा परमेशर तुसा री शोभा ठईरना।8 तुसा रा सूरज फेर कदी नि डूबणा ओर ना तुसा रे चाँदो री चाँदणी काल़ी ऊणी; कऊँकि यहोवा तुसा री सदा री जोति ऊणी ओर तुसा रे दु:खो रे दिन खत्म ऊई जाणे। तुसा रे सारे के सारे लोक तर्मी ऊणे; सेयो सदा देशो रे अधिकारी रणे। सेयो मेरे लगाए रे पौधे ओर मेरे आथो रा काम ठईरने, जेते कि मेरी महिमा प्रगट ओ।9 छोटे ते छोटा 1,000 ऊई जाणा ओर सबी ते कमजोर एक सामर्थी जाति बणी जाणा। आऊँ यहोवा ए; जेबे ठीक बखत आऊणा, तेबे ये फटाफट पूरा करना।
Source notes (9)
- Footnote इफि. 5:14
- Footnote यूह. 1:14, प्रका. 21:23
- Footnote प्रका. 21:24
- Footnote यिर्म. 33:9, योए. 2:26, यशा. 61:6
- Footnote पज. 72:10, मत्ती 2:11
- Footnote मत्ती 21:13
- Footnote प्रका. 21:24,26
- Footnote प्रका. 21:123, प्रका. 22:5
- Footnote प्रका. 21:27, इफि. 2:10, 2 पत. 3:13
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.