Baghlayani Bible
यशायाह 61
उद्धारो रा शुभ सन्देश
भविष्यबक्ता यशायाह बोलोआ, “परमेशर यहोवे रा आत्मा मां पाँदे ए, कऊँकि यहोवे शुभ सन्देश सुनाणे खे मेरा अभिषेक कित्तेया ओर आऊँ इजी खे पेजी राखेया ताकि दु:खी मनो रे लोका खे शान्ति देऊँ ओर गुलामा खे आजादिया रा ओर कैदिया खे छुटकारे रा प्रचार करुँ।1 ताकि यहोवे रे खुश रणे रे सालो रा ओर म्हारे परमेशरो रे बदला लणे रे दिनो रा प्रचार करुँ; ताकि सब दु:ख करने वाल़ेया खे शान्ति देऊँ।2 ओर सिय्योनो रे दु:ख करने वाल़े लोका रे सिरो पाँदली दु:खो री स्वा दूर करी की सुन्दर पगड़ी बानूँ, ताकि तिना रा दु:ख दूर करी की खुशिया रा तेल लगाऊँ ओर तिना री उदासी दूर करी की यशो रा टखण टखाऊँ; जेते कि तिना खे तर्मो रे बाँजो रे डाल़ ओर यहोवे रे लगाए रे बोलेया जाओ ओर जेते कि तिना रा आदर प्रगट ओ।”3 तेस बखते यहूदा रे लोका सौ साल पईले बेबीलोनो रे लोका रे जरीये बर्बाद कित्ते दे शईर फेर बनाणे, पुराणे बखतो ते पड़े रे खण्डहरो रे फेर कअर बनाणे; उजड़े रे शईर जो पीढ़िया-पीढ़िया ते उजड़े रे सेओ फेर नये सिरे ते बसाणे। परदेशी आई की खड़े ऊणे ओर तुसा रिया पेडा-बाकरिया चराणिया ओर विदेशी लोका तुसा रे डोरूआ रे अल़ चलाणे ओर अंगूरा रे बगीचेया रे माली ऊणे; पर तुसा खे यहोवे रे पुरोईत बोलेया जाणा; तिना तुसा खे म्हारे परमेशरो रे सेवक बोलेया करना ओर तुसा जातिया-जातिया री तअन-सम्पत्ति खाया करनी, तिना री वैभवो रिया चीजा पाई की तुसा बडयाईया करेया करनिया।4 तुसा री बेज्जतिया रे बदले दो गुणा आशिर्वाद मिलणा, अनादरो रे बदले तुसा आपणे इस्से रिया बजा ते जयजयकार करनी; तुसे आपणे देशो रे दो गुणे इस्से रे अधिकारी ऊणे ओर सदा खुश रणे। यहोवा बोलोआ, “कऊँकि आऊँ यहोवा न्याय साथे प्यार राखूँआ, आऊँ अन्याय ओर चोरिया ते नफरत करूँआ; इजी री खातर मां आपणी सच्चाईया ते आपणे लोका खे वादा कित्तेया रा ईनाम देणा। तिना रा वंश जातिया-जातिया बीचे ओर तिना री ल्वाद देशो-देशो रे लोका बीचे मशूर ऊणी; हर कोई आदमी जितणेया सेयो देखणे, पछयाणी लणे कि ये से कराना ए जिना खे यहोवे आशीष देई राखी। आऊँ यहोवे रिया बजा ते बऊत खुश ऊणा, मेरे प्राण परमेशरो रिया बजा ते खुश रणे; कऊँकि यहोवे माखे उद्धारो रे टाल्ले पन्याए ओर तर्मो री चाद्दर एड़ी टखाई ती जेड़ा लाड़ा फूला री माल़ा साथे आपू खे सजाओआ ओर लाड़ी आपणे गईणेया साथे आपणा श्रृंगार करोई।5 कऊँकि जिंयाँ जमीन आपणी फसल जमाओई ओर बगीचे रे जो कुछ बाया जाओआ, से तिजी खे जमाओई, तिंयाँ ई परमेशर यहोवा सबी जातिया सामणे धार्मिकता ओर तन्यवाद बढ़ाणा।”
Source notes (5)
- Footnote मत्ती 11:5, प्रेरि. 10:38, मत्ती 5:3, प्रेरि. 26:18, लूक. 4:18
- Footnote लूक. 4:18,19, मत्ती 5:4
- Footnote पज. 45:7; 30:11; लूक. 6:21
- Footnote 1 पत. 2:5,9; प्रका. 1:6; प्रका. 5:10
- Footnote इब्रा. 3:18, रोम. 5:11, प्रका. 19:7-8
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.