Baghlayani Bible
होशे 1
यहोवे रा ये सन्देश बेरीए रे पाऊ होशे गे पऊँचेया। ये सन्देश तेबे आया जेबे उज्जियाह, योताम, आहाज ओर हिजकिय्याह यहूदा दे राजा थे। ये सन्देश तेबे बी आया जेबे यारोबाम इस्राएलो रा राजा था। से योआशो रा पाऊ था। यहोवे तेसते जो बोलेया, से एती देई राखेया ए,
होशे री लाड़ी ओर तिना रे बच्चे
जेबे यहोवे पईली बार होशे रे जरीये इस्राएलो रे लोका ते गल्ला कित्तिया, तेबे यहोवे होशे खे ये बोलेया, “जाई की एकी वेश्या साथे ब्या करी लो ओर फेर तेसा रे कुकर्मो रे बच्चेया खे आपणे बच्चे बणाई लो। ये एते गल्ला खे बताओआ कि इस्राएले यहोवे रे खलाफ जाई की दूजे देवतेया री सेवा करी की वेश्या जेड़े काम करी राखे।” तेबे तिने जाई की दिबलैमो री बेटी गोमेरो साथे ब्या करी ला। तेबे गोमेर गर्भवती ऊई ओर तेसा रे एक पाऊ ऊआ। यहोवे माखे बोलेया, “तेसरा नाओं यिज्रेल राख, जेतेरा मतलब ए ‘परमेशर ओरे-पोरे करोआ’ कऊँकि मां छोड़ ई राजा येहूए रे वंशो रे लोका खे ओरे-पोरे करी की सजा देणी, कऊँकि तिने यिज्रेल शईरो दे मेरे बऊत लोक काई राखे थे। केसी दिने मां इस्राएल देशो रा अंत करी देणा। तेस बखते मां यिज्रेलो री तराईया दे इस्राएलो री सेना री तागत पूरी तरआ ते नाश करी देणी।” इजी ते बाद गोमेर फेर गर्भवती ऊई ओर तेसा रे एक बेटी पैदा ऊई। तेबे यहोवे होशे खे बोलेया, “तेसा रा नाओं लोरूहामा राख, कऊँकि मां इस्राएलो रे कराने पाँदे फेर दया नि करनी ओर ना ई तिना रा पाप माफ करना। पर यहूदा रे कराने पाँदे मां दया करनी, मां सेयो तिना रे दुश्मणा ते छुड़ाणे, से तिना री सेना नि ऊणी जो धनुष ओर तलवारे की लड़ोए जो तिना खे बचाओ गी। ना तो अथियारा ते ओर ना सेना, कोड़ेया ओर रथा ते, बल्कि आपणी सामर्था ते बचाणे, कऊँकि आऊँ तिना रा परमेशर यहोवा ए।”
जेबे तेसे जवाणसे लोरूहामा रा दूद छुड़ाया, तेबे से फेर गर्भवती ऊई ओर तेसा रे एक पाऊ पैदा ऊआ। इजी ते बाद यहोवे बोलेया, “एसरा नाओं लोअम्मी राख। कऊँकि तुसे लोक मेरी प्रजा नि ए ओर ना आऊँ तुसा रा परमेशर रणा।”
इस्राएलो री दुबारा स्थापना
यहोवे आगे बोलेया, “बखत आऊणा कि इस्राएलिया री गिणती समुद्रो रे बालुओ जेड़ी ऊई जाणी, जिना खे नापणा ओर गिणना मुश्किल ए ओर जेते जगा रे तिना खे ये बोलेया जाओआ था, ‘तुसे मेरी प्रजा नि ए’” तेसा ई जगा रे तिना खे जिऊँदे परमेशरो रे पाऊ बोलेया जाणा। इजी ते बाद यहूदा ओर इस्राएलो रे लोक कट्ठे ऊई की एक राज्य बणी जाणे। तिना आपू पाँदे राज करने खे एक परदान चुणना। सेयो तेथा ते आपणे देशो दे रणे खे वापस आऊणे जेती सेयो कैद थे। तिना जाणी लणा कि यिज्रेलो रा दिन एक महान दिन ए। ये से दिन ए जेबे परमेशरो आपणे लोक फेर आपणे देशो दे बसाणे।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.