Baghlayani Bible
दानिय्येल 12
अन्तो रे दिनो री भविष्यबाणी
रेशमो रे टाल्ले पईने रे स्वर्गदूते माखे बोलेया, “तेस बखते महान स्वर्गदूत मीकाएल, जो तुसा लोका री रक्षा करोआ, प्रकट ऊणा। तेबे मुसीबता रा बखत ऊणा, देशा रे बणने ते बाद सबी ते बुरा बखत। जेबे से बखत आऊणा, तो तुसा रे देशा रे सारे लोक जिना रे नाओं परमेशरो री कताबा दे लिखी राखे ए, बची जाणे, जो लोक पईले ई मरीगे दे ए, तिना बीचा ते बऊत सारे लोक जागी की उठणे, कई लोक सदा री जिन्दगिया रा मजा लणे लगणे, ओर कई तो सदा तक बऊत जादा घिनौना ऊणे खे।1 जो लोक समजदार ए सेयो सर्गो री चमका जेड़े चमकणे। जो लोक दूजेया खे सई काम करने खे उकसाओए सेयो सदा-सदा खे तारेया जेड़े चमकणे।2 पर ओ दानिय्येल, तूँ एसा कताबा दे मुहर लगाई की इना वचना खे अन्तो रे पग्तो तक बन्द राख ओर बऊत जे लोका आपणा ज्ञान बढ़ाणे खे ओरे-पोरे जाणा।” जेबे स्वर्गदूत बोली चुकेया, तेबे मैं दानिय्येले क्या देखेया कि ओर दो मर्द खड़ी रे, एक नदिया रे वारले कनारे ओर दूजा पारले कनारे। तेबे जो स्वर्गदूत रेशमो रे टाल्ले पईनी की नदिया रे पाणिए पाँदे खड़ी रा था, तिने तिना मर्दा बीचा ते एकी जणे ते पूछेया, “इना अचम्बे रे कामो रा अन्त कदुओ तक ऊणा”? तेबे जो मर्द रेशमो रे टाल्ले पईनी की नदिया रे पाणिए पाँदे खड़ी रा था, तिने मेरे सुणदे ई आपणे दोनो आथ स्वर्गो रिया तरफा खे चकी की, सदा जिऊँदे रणे वाल़े परमेशरो रे नाओं री कसम खाई की बोलेया, “ये दशा साढ़े तीन साल तक रणी ओर जेबे पवित्र प्रजा री ईम्मत टूटी-टूटी की खत्म ऊई जाणी, तेबे यो गल्ला पुरिया ऊणिया।”3 ये गल्ल आऊँ सुणूँ तो था, पर कुछ नि समजेया। तेबे मैं स्वर्गदूतो खे बोलेया, “ओ मेरे स्वामी, इना गल्ला रे अन्तो रा फल क्या ऊणा?” तिने ज्वाब दित्तेया, “ओ दानिय्येल चली जा, कऊँकि यो गल्ला अन्तो रे बखतो तक बन्द ए ओर इना पाँदे मुहर देई राखी। बऊत लोका तो आपू-आपू खे परखी की शुद्ध करना ओर सेयो साफ ऊई जाणे, पर दुष्ट लोका दुष्टता ई करदे रणा ओर दुष्ट लोका बीचा ते केसी बी यो गल्ला नि समजणियां, पर जो अक्लमंद ए, सेयो ई समजणे। रोजो री होमबलि बन्द करी देणी। ओर नाश करने वाल़ी बुरी चीज खड़ी करी जाणी। तदुओ ते 1,290 दिन ऊणे।” से बऊत ई तन्य ए, जो सब्र राखी की 1,335 दिना रे अन्तो तक बी पऊँचो। इजी री खातर एबे आऊँ तांते बोलूँआ, “ओ दानिय्यल, तूँ आपणे जिऊँदे जिऊए परमेशरो खे परोसे वाल़ा बणेया दा रओ। तुसे मरी जाणे, पर जेबे सब कुछ खत्म ऊई जाणा, तो तुसा परमेशरो रे आपणा ईनाम पाणे खे मरने ते बाद बी ऊबे उठणा।”
Source notes (3)
- Footnote यूह. 5:28, 29
- Footnote मत्ती 13:43
- Footnote प्रका. 10:5-7
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.