Baghlayani Bible
उत्पत्ति 5
आदमो रा खानदान
आदमो रे खानदानो री सूची ये ए। जेबे परमेशरे माणूं बणाया, तेबे तिने से आपू जेड़ा ई बणाया।1 परमेशरे मर्द ओर जवाणस करी की सेयो बणाए ओर जेस दिने परमेशरे सेयो बणाए तेस दिने तिने तिना खे आशीष दित्ती ओर तिना खे आदमी बोलेया।2 जेबे आदम 130 साला रा ऊआ, तेबे तेसरे जरीये, तेसरे जेड़ा ई एक पाऊ जम्मेया। तिने तेसरा नाओं शेत राखेया। शेतो रे जमणे ते बाद आदम 800 साल जिऊँदा रया ओर तेसरे ओर बी माठे-बेटिया ऊए। ईंयाँ आदमो री कुल उम्र 930 साला री ऊई, तिजी ते बाद से मरी गा। जेबे शेत 105 साला रा ऊआ, तेबे तेसरे एनोश जम्मेया। एनोशो रे जमणे ते बाद शेत 807 साला तक जिऊँदा रया ओर तेसरे ओर बी माठे-बेटिया ऊए। कुल मिलाई की शेत 912 साला रा ऊई की मरीगा। जेबे एनोश 90 साला रा ऊआ, तेबे तेसरे केनान जम्मेया। केनानो रे जमणे ते बाद एनोश 815 साला तक जिऊँदा रया ओर तेसरे ओर बी माठे-बेटिया ऊए। कुल मिलाई की एनोश 905 साला रा ऊई कि मरीगा। जेबे केनान 70 साला रा ऊआ, तेबे तेसरे महललेल जम्मेया। महललेलो रे जमणे ते बाद केनान 840 साल तक जिऊँदा रया ओर तेसरे ओर बी माठे-बेटिया ऊए। कुल मिलाई की केनान 910 साला रा ऊई की मरीगा। जेबे महललेल 65 साला रा ऊआ, तेबे तेसरे येरेद जम्मेया। येरेदो रे जमणे ते बाद महललेल 830 साला तक जिऊँदा रया ओर तेसरे ओर बी माठे-बेटिया ऊए। कुल मिलाई की महललेल 895 साला रा ऊई की मरीगा। जेबे येरेद 162 साला रा ऊआ, तेबे तेसरे हनोक जम्मेया। हनोको रे जमणे ते बाद येरेद 800 साला तक जिऊँदा रया ओर तेसरे ओर बी माठे-बेटिया ऊए। ईंयाँ येरेदो री कुल उम्र 962 साला री ऊई। तिजी ते बाद से मरीगा। जेबे हनोक 65 साला रा ऊआ, तेबे तेसरे मतूशेलह जम्मेया। मतूशेलहो रे जमणे ते बाद हनोक 300 साला तक परमेशरो साथे-साथे चलदा रया ओर तेसरे ओर बी माठे-बेटिया ऊए। ईंयाँ हनोको री कुल उम्र 365 साला री ऊई। हनोक परमेशरो साथे-साथे चलदा रया। तेबे से राचीगा, कऊँकि परमेशरे से चकी ला था।3 जेबे मतूशेलह 187 साला रा ऊआ, तेबे तेसरे लेमेक जम्मेया। लेमेको रे जमणे ते बाद मतूशेलह 782 साला तक जिऊँदा रया ओर तेसरे ओर बी माठे-बेटिया ऊए। ईंयाँ मतूशेलहो री कुल उम्र 969 साला री ऊई। तिजी ते बाद से मरीगा। जेबे लेमेक 182 साला रा ऊआ, तेबे तेसरे एक पाऊ जम्मेया। लेमेके ये सोची की तेसरा नाओं नूह4 मतलब राम ये बोली की राखेया कऊँकि यहोवे जो तरतिया खे स्राप देई राखेया, तिजी रे बारे दे एस पाऊए म्हारे कामो रे ओर तेसा कठण मईणता रे, जो आसे करूँए, आसा खे राम देणा। नूह रे जमणे ते बाद, लेमेक 595 साला तक जिऊँदा रया ओर तेसरे ओर बी माठे-बेटिया ऊए। ईंयाँ लेमेको री कुल उम्र 770 साला री ऊई। तिजी ते बाद से मरीगा। नूह 500 साला रा ऊआ ओर नूओ रे शेम, हाम ओर येपेत ऊए।
Source notes (4)
- Footnote मत्ती 1:1, 1 कुरिन्थ 11:7
- Footnote मत्ती 19:4, मरक 10:6
- Footnote इब्रानी 11:5
- Footnote नूह नूह मतलब राम
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.