Baghlayani Bible
उत्पत्ति 23
सारा री मौत ओर तेसा खे दबाणा
जेबे सारा 127 साला री ऊई, तेबे से किर्यतर्बा रे मरी गी जो कनान प्रदेशो रे ए। एतेखे हेब्रोन बी बोलोए। अब्राहम सारा रा शोग मनाणे तेती गया।
तेबे अब्राहम आपणी मरी री लाड़िया गे ते उठी की हित्ती लोका खे बोलणे लगेया, “आँऊ तुसा बीचे मईमान ओर परदेशी ए। माखे आपणा मुड़दा दबाणे खे एड़ी जमीन बेची देओ जो मेरी आपणी ऊई जाओ, ताकि आऊँ आपणी लाड़िया खे दबाई सकूँ।”
हित्तिए अब्राहमो खे बोलेया, “ओ म्हारे मालक, आसा री गल्ल सुण; तूँ तो आसा बीचे बड़ा परदान ए। आसा रिया कब्रा बीचा ते जिदे बी तूँ चाए तिदे आपणा मुड़दा दबा। आसा बीचा ते केसी बी तूँ आपणी कब्र लणे ते नि रोकणा कि तूँ आपणा मुड़दा तिदे दबाई नि सको।”
तेबे अब्राहम उठी की खड़ा ऊआ ओर हित्तिया रे सामणे, जो तेस प्रदेशो रे रणे वाल़े थे, माथा टेकी की बोलणे लगेया, “जे माखे आपणा मुड़दा दबाणे खे तुसा री सहमति ए तो मेरी ये गल्ल सुणी लो कि सोहरो रे पाऊ एप्रोनो ते मेरिया तँईं बिनती करो, कि से आपणी मकपेला वाल़ी गुफा, जो तेसरी जमीना रे बन्ने पाँदे ए, तिजी रा पूरा मोल लई की माखे देई देओ कि से तुसा बीचे कब्रिस्तानो खे मेरी आपणी जमीन बणी जाओ।”
एप्रोन तो हित्तिया बीचे तेती बैठी रा था, तेबे जितणे हित्ती तेसरे शईरो रे फाटको ते ऊई की पीतरे जाओ थे, तिना सबी सामणे तिने अब्राहमो खे जबाब दित्तेया, “ओ मेरे मालक, एड़ा निए, मेरी सुण; से जमीन आऊँ ताखे देऊँआ ओर तिदे जो गुफा ए, से बी आऊँ ताखे देऊँआ, आपणे लोका रे सामणे आऊँ तिजी खे ताखे देऊँआ, इजी खे आपणे मुड़दे खे कब्रा रे राख।”
फेर अब्राहमे तेस प्रदेशो रे रणे वाल़ेया लोका सामणे माथा तेकेया। ओर तिना रे सुणदे ऊए एप्रोनो ते बोलेया, “जे तूँ एड़ा चाए तो मेरी सुण, एसा जमीना रा जो बी मोल ओ, से आऊँ देणा चाऊँआ; तिजी खे मांते लई लो तेबे मां आपणा मुड़दा तेती दबाणा।”
एप्रोने अब्राहमो खे ये जबाब दित्तेया, “ओ मेरे मालक, मेरी गल्ल सुणो; जमीना रा मोल तो चार सौ चाँदिए रे सिक्के ए, फेर बी मां ओर तां बीचे ये क्या गल्ल ए? आपणे मुड़दे खे कब्रा रे राख।”
अब्राहमे एप्रोनो री बोली री रकमा खे मानी की तेसखे चार सौ एड़े शकेल जेड़े तेस बखतो रे बपारिया रे चलो थे तितणी रकम तोली की देईती जो तिने हित्तिया रे सुणदे ऊए बोली थी। ईंयाँ एप्रोनो री जमीन, जो मम्रे रे सामणे मकपेला रे थी, से गुफा समेत ओर तिना सबी डाल़ा समेत बी, जो तिदे ओर तिजी रे चारो कनारे बन्ने पाँदे थे, जितणे हित्ती तेसरे शईरो रे फाटको गे बैठो थे, तिना सबी रे सामणे से जमीन अब्राहमो रे अक्को रे पक्की रीतिया ते आईगी। इजी ते बाद अब्राहमे आपणी लाड़ी सारा तेसा मकपेला वाल़ी जमीना री गुफा रे जो मम्रे रे हेब्रोनो रे सामणे कनान प्रदेशो दे ए, दबाईती। ईंयाँ से जमीन गुफा समेत जो तिदे थी हित्तिया री तरफा ते कब्रिस्तानो खे अब्राहमो रे अक्को रे पक्की रीतिया ते करिती।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.